ەلباسى: قۇربان ايت قازاقستاندىقتاردىڭ رۋحاني ومىرىندەگى ماڭىزدى وقيعاعا اينالدى
***
ق ر پرەزيدەنتى نۇرسۇلتان نازاربايەۆتىڭ قۇربان ايت مەيرامىنا وراي قازاقستان حالقىنا ارناعان قۇتتىقتاۋى
قىمباتتى وتانداستار!
سىزدەردى قۇربان ايت مەرەكەسىمەن قۇتتىقتايمىن!
عاسىرلار بويى قۇربان ايت كۇللى مۇسىلمان قاۋىمىنىڭ ماڭگىلىك ادامزاتتىق قۇندىلىقتاردى باعالاۋعا، بىرلىككە، قايىرىمدىلىققا جانە قامقورلىق تانىتۋعا شاقىراتىن ەڭ باستى دا قاسيەتتى مەيرامدارىنىڭ ءبىرى بولىپ كەلەدى.
ءبىزدىڭ ەلىمىزدە قۇربان ايتتى تويلاۋ قوعامدا مادەني جانە رۋحاني قۇندىلىقتاردى قاستەرلەۋدە، بەيبىتشىلىك پەن كەلىسىمدى نىعايتۋدا ماڭىزدى ورىن الادى.
قۇربان ايت حالىقتىڭ وزگە دە ءدىني مەيرامدارى ءتارىزدى قوعامدى توپتاستىرۋدىڭ بەرىك نەگىزىن قالاۋدا قازاقستاندىقتاردىڭ رۋحاني ومىرىندەگى ماڭىزدى وقيعاعا اينالدى.
قاسيەتتى قۇربان ايت رۋحاني تازالىقتى، ىزگىلىكتى، ادالدىق پەن تەرەڭ سەنىمدى ۇلىقتايتىن، جاقىندارىنا قايىرىمدىلىق پەن قامقورلىق تانىتۋعا شاقىراتىن مەرەكە.
بۇل كۇندەرى مۇگەدەكتەرگە، جەتىمدەرگە، قاراۋسىز قالعان قارتتارعا كورسەتىلگەن كومەك ولاردىڭ سەنىمىن ۇشتاپ، جۇرەكتەرىن قۋانىشقا تولتىرادى جانە العىس سەزىمىنە بولەيدى.
اللا تاعالا بارلىق دۇعا-تىلەكتەرىڭىزدى قابىل ەتسىن!
ەلىمىزدە ءارقاشاندا بەيبىتشىلىك، بىرلىك پەن كەلىسىم وركەن جايا بەرسىن!
بارشا قازاقستاندىقتارعا زور دەنساۋلىق، بەرەكە-بىرلىك تىلەيمىن!
