قازاقستان وفيتسەرلەرى تۇركيانىڭ اسكەري وقۋ ورىندارىندا جاتتىعا ما؟
انكارا مەن ىستامبۇل قالالارىندا وتكەن بۇل ساپاردىڭ ماقساتى - تۇرىك قارۋلى كۇشتەرى مەن قورعانىس ءوندىرىسىنىڭ الەۋەتىن زەردەلەۋ جانە ەكى ەلدىڭ اراسىنداعى اتالعان سالالار بويىنشا ىنتىماقتاستىقتى نىعايتۋ بولىپ تابىلدى، دەپ حابارلايدى ق ر س ءى م باسپا ءسوز قىزمەتىنەن.
قازاقستان دەلەگاتسياسى تۇركيا قورعانىس ءمينيسترىنىڭ ءبىرىنشى ورىنباسارى شابان ۇمىتپەن كەزدەسۋ وتكىزىپ، قورعانىس ءوندىرىسىنىڭ بەدەلدى تۇرىك كومپانيالارىندا، ونىڭ ىشىندە وپتيكالىق جابدىقتار مەن راديولوكاتسيالىق قۇرالداردى وندىرەتىن «اسەلسان» كورپوراتسياسىندا، اسكەري رەاكتيۆتىك ۇشاقتارعا قوندىرعىلاردى وندىرەتىن «تاي» كورپوراتسياسىندا، بروندالعان تەحنيكانى شىعاراتىن «وتوكار» كورپوراتسياسىندا جانە ت. ب. بولدى.
قازاقستاننىڭ اسكەري دەلەگاتسياسى الدىمەن «تاي» كومپانياسىنىڭ جۇمىسىمەن ەتەنە تانىستى. قازىرگى كەزدە بۇل كومپانيا اۋە تەحنيكاسىنىڭ بارلىق تۇرلەرىن، ونىڭ ىشىندە شابۋىلداۋشى تىكۇشاقتاردى، ۇشقىشسىز اۋە كولىكتەرىن، اۋە نىسانالارىن، جاتتىقتىرۋ-شابۋىلداۋشى ۇشاقتاردى، سونداي-اق «ەيرباس» اۋە كەمەسىنىڭ كەيبىر بولشەكتەرىن وندىرەتىن كوپسالالى كاسىپورىن بولىپ تابىلادى.
ساپار بارىسىندا قورعانىس ءوندىرىسى سالاسىنداعى ىنتىماقتاستىق جونىندە قازاق-تۇرىك كوميسسياسىنىڭ جەتىنشى وتىرىسى وتكىزىلىپ، ونىڭ قورىتىندىلارى بويىنشا ىنتىماقتاستىق تۋرالى حاتتاماعا قول قويىلدى. سونداي-اق تاراپتار اسكەري، اسكەري-تەحنيكالىق جانە اسكەري ءبىلىم بەرۋ اياسىنداعى ەكىجاقتى ىنتىماقتاستىقتى دامىتۋ بولاشاعى تۋرالى پىكىر الماستى. قازاقستاننىڭ اسكەري كادرلارىن شەتەلدە دايارلاۋ بويىنشا تۇركيانىڭ اسكەري وقۋ ورىندارىندا كۋرسانتتارمەن قاتار، وفيتسەرلەردى وقىتۋ ماسەلەسى دە كوتەرىلدى. تۇركيانىڭ اسكەري ەلەكتروندىق ءوندىرىسى بويىنشا قورعانىس ءوندىرىسى سالاسىنداعى ءىرى كاسىپورىن بولىپ تابىلاتىن «اسەلسان» كومپانياسىمەن ۇسىنىلعان، 2013-جىلعى جەلتوقساندا استانادا اشىلعان «قازاقستان اسەلسان ينجينيرينگ» قازاق-تۇرىك قورعانىستىق-وندىرىستىك زاۋىتىنىڭ الداعى دامۋ پەرسپەكتيۆالارى جانە ونىڭ ىسكە اسىرىلۋى تۋرالى پىكىرلەر الماسىلدى.
تاراپتار قازاقستان دەلەگاتسياسىنىڭ ساپارى قازاق-تۇرىك ىنتىماقتاستىعىنىڭ ودان ءارى دامۋىنا ايتارلىقتاي سەپتىگىن تيگىزەتىنىن اتاپ ءوتتى.
