قازاق ونەرىنىڭ ساڭلاقتارى: ماناربەك ەرجانوۆ
ول اقان سەرى، ءبىرجان سال (جانە باسقالارى) سياقتى كومپوزيتورلار - انشىلەردىڭ كومپوزيتورلىق- انشىلىك مەكتەبىن لايىقتى تۇراقتى جالعاستىرۋشى بولىپ تابىلادى. ول بەلگىلى ءانشى جانە دومبىراشى. كۇسەنبايدى ءوزىنىڭ تىكەلەي ۇستازى رەتىندە سانايدى.
ەرجانوۆتىڭ كوپ قىرلى تالانتى ونىڭ اندەرىنەن انىق بايقالادى. ول 150 دەن اسا ءان مەن كۇي شىعاردى.
اكەسى كۇيشى، زەرگەر، ۇستا بولعان. اناسى ناقبالا دا انشىلىگىمەن اۋىل اراسىنا تانىلعان. بولاشاق ونەر يەسىنىڭ مۋزىكاعا دەگەن قۇمارلىعى اناسىنىڭ ىقپالى ارقىلى ەرتە ويانادى. ەرجانوۆتى مۋزىكا الەمىنە جەتەلەپ، ونىڭ اسەم سازىن كوكىرەگىنە ۇيالاتا بىلگەن ۇستازى - ءانشى ءارى كۇيشى كۇسەنباي. بۇدان كەيىن ماناربەكتىڭ انشىلىك شەبەرلىگىن ۇشتاۋدا شاشۋباي قوشقارباي ۇلى مەن امىرە قاشاۋبايەۆ يگى اسەر ەتتى . 16 - 17 جاسىندا- اق ەرجانوۆ ءبىرجان سال، اقان سەرى، جارىلعاپبەردى، ەستاي، شاشۋباي اندەرىن ايتىپ، اۋىل اراسىنداعى ايتىستارعا قاتىسىپ، ەل اۋزىنا ىلىككەن. 1928 - جىلى قازاق دراما تەاترىنا قابىلدانىپ، العاشقى اكتەرلەرىنىڭ ءبىرى بولدى؛ وسى تەاتردا قويىلعان سپەكتاكلدەردە ويناپ، سان قىرلى بەينەلەردى سومدادى . 1931 - 32 - جىلى ريددەردەگى جۇمىسشى جاستار تەاترىندا قىزمەت ەتتى. 1934 - جىلى الماتى مۋزيكالىق تەاترىندا (قازىرگى قازاق وپەرا جانە بالەت تەاترى) ونەر كورسەتتى. ي. ۆ. كوتسىكتىڭ «ايمان-شولپان» سپەكتاكلىندەگى جاراس، ا. ق. جۇبانوۆ پەن ل. ا. ءحاميديدىڭ «ابايىنداعى» ءازىم، م. تولەبايەۆتىڭ «ءبىرجان - ساراسىنداعى» ەستاي، ت. ب. رولدەرى ونىڭ انشىلىك ءارى ارتيستىك تالانتىن كەڭ تانىتىپ، داڭققا بولەدى. 1936 - جىلى ماسكەۋدە وتكەن قازاق ونەرى مەن ادەبيەتىنىڭ ونكۇندىگىندە ە. گ. برۋسيلوۆسكيدىڭ وپەرالارى - «قىز جىبەكتەگى» شەگەنىڭ، «ەر تارعىنداعى» ساقاننىڭ، «جالبىرداعى» ەلەمەستىڭ ءرولىن ويناپ، كورەرمەندەردىڭ ەرەكشە ىقىلاسىنا بولەندى. ول 1953 - جىلدان ءومىرىنىڭ اقىرىنا دەيىن قازاق فيلارمونياسىندا جەكە داۋىستاعى ءانشى بولىپ، حالىقتىق ءان ونەرىندە كەڭ ورىن الاتىن تەرمە، جەلدىرمەلەردى، كەڭ تىنىستى اندەردى («ارداق»، «اعاشاياق»، «سمەت»، «توپايكوك»، «جانبوتا»، «بالقاديشا»، «اق قايىڭ»، «تولىباي»، «حورلان»، «اق سيسا»، ت. ب. ) ناقىشىنا كەلتىرە ورىندادى. ءسويتىپ، ۇلتتىق ونەردەگى ارقا ءانى داستۇرىندە ءوز مەكتەبىن قالىپتاستىردى. ەرجانوۆ كومپوزيتور رەتىندە دە حالىققا كەڭ تانىمال. ونىڭ «جەتىسۋ»، «استانادا»، «باتىر جورىعى»، «كۇسەنباي»، «زرنەك»، «شالقار كول»، «اققۋ كولى» كۇيلەرى، حورعا ارنالعان «پارتيزان جورىعى»، « 28 گۆاردياشى - پانفيلوۆشىلار»، «جاستار تويى»، «جاستار ءانى»، «بەيبىتشىلىك مارشى» اتتى شىعارمالارى ، «پاروۆوز»، «امانگەلدى»،«باقىت جىرى»، «قۋانامىن»، «قويشىنىڭ ءانى»، «ءانشى ءبىرجانعا»، «سايرا، بۇلبۇل»، «شەگەنىڭ تەرمەسى»، ت. ب. اندەرى بار. مۋزيكالىق جيناقتارى جارىق كوردى. ەڭبەك قىزىل تۋ، «قۇرمەت بەلگىسى» وردەندەرىمەن، مەدالدەرمەن ماراپاتتالعان .
