الماتىدا كاسىپكەردىڭ جۇمىسىنا زاڭسىز ارالاسقان شەنەۋنىك جازاعا تارتىلدى
پروكۋراتۋرا وكىلدەرىمەن بىرگە جۇرگىزىلگەن تەكسەرۋ بارىسىندا جەرگىلىكتى مەملەكەتتىك ورگانداردىڭ جارناما كونسترۋكسيالارىنا ارنالعان جەردى بولۋدە ءبىرقاتار زاڭسىزدىقتارعا باراتىندارى انىقتالدى.
ايتۋار قوشمامبەتوۆتىڭ ايتۋىنشا، جەكە جارناما ۇيىمدارىنىڭ جارناما كونسترۋكسياسىن ورناتۋ ءۇشىن جەر تەلىمىن الۋ قۇقىعى ءجيى تاپتالاتىنى بەلگىلى بولعان.
«جارناما كونسترۋكسياسىنا ارنالعان جەر تەلىمدەرىنىڭ باسىم كوپشىلىگى قۇرىلىسقا ارنالماعان جەرلەردەن بولىنگەن. پروكۋراتۋرا قىزمەتكەرلەرى قالالىق ساۋلەت جانە قۇرىلىس باسقارماسىنا جارناما ۇيىمدارىنىڭ بيلبوردتارىن قۇرىلىس رەگلامەنتتەرى مەن نورمالارىنا ساي وزگە جەرگە شوعىرلاندىرۋ بويىنشا جۇمىس جاساۋدى تاپسىردى»، - دەدى ايتۋار قوشمامبەتوۆ.
سونىمەن قاتار جارناما ۇيىمدارىنىڭ ورناتقان كونسترۋكسيالارىن جەرگىلىكتى اتقارۋ ورگاندارىنىڭ ەش سوزگە كەلمەستەن بۇزاتىنى انىقتالدى.
تۇركسىب اۋدانى اكىمىنىڭ ورىنباسارى اۋداندا ورنالاسقان جارناما بيلبوردتارىنىڭ يەلەرىنە حات جولداپ، بارلىق اقپاراتتى جازباشا تاپسىرۋلارىن تالاپ ەتكەن.
سونداي-اق كاسىپكەرلەرگە ايتىلعان تالاپ ورىندالماسا، بيلبوردتاردىڭ اكىمدىك كۇشىمەن بۇزىلاتىنى دا اشىق ەسكەرتىلگەن. بوستاندىق اۋدانى پروكۋراتۋراسى تۇركسىب اۋدانى اكىمىنىڭ ورىنباسارى ءوزىنىڭ وكىلەتتىلىگىن زاڭسىز پايدالانعانى ءۇشىن تۇركسىب اۋدانى اكىمىنىڭ اپپاراتىنا بۇل زاڭسىزدىقتى جويۋ جايلى تاپسىرما بەرگەن. ال شەنەۋنىكتىڭ ءوزى تارتىپتىك جاۋاپكەرشىلىككە تارتىلدى.
«كاسىپكەرلەردىڭ قۇقىعىن قورعاۋ ماقساتىندا جۇرگىزىلگەن جۇمىس ناتيجەسىندە 6 جارناما ۇيىمىنا 5 جىلدىق مەرزىمگە بيلبورد ورناتۋعا جەر تەلىمدەرى بەرىلدى»، - دەپ قورىتىندىلادى ا. قوشمامبەتوۆ.
اۆتور: گۇلميرا ءعوسمانالي
