ن. نازاربايەۆ اقتاۋ پورتىن سولتۇستىك باعىتتا كەڭەيتۋ جوباسىن جۇزەگە اسىرۋ بارىسىمەن تانىستى

استانا. قازاقپارات - مەملەكەت باسشىسى نۇرسۇلتان نازاربايەۆ ماڭعىستاۋ وبلىسىنا جۇمىس ساپارى اياسىندا اقتاۋ پورتىنىڭ سولتۇستىك باعىتتا كەڭەيتىلۋ بارىسىمەن تانىستى.

ەلباسىنا جوبانى جۇزەگە اسىرۋ بارىسى تۋرالى كەڭىنەن باياندالدى. جوباعا سايكەس، قۋاتى جىلىنا 1,5 ميلليون توننا بولاتىن استىق تەرمينالىن، سونداي-اق نەگىزگى جۇكتەر مەن كونتەينەرلەرگە ارنالعان، قۋاتى جىلىنا 1,5 ميلليون توننا بولاتىن ەكى تەرمينال سالۋ ەسەبىنەن پورتتىڭ جۇك اۋىستىرىپ تيەۋ مۇمكىندىگىن جىلىنا 19,5 ميلليون تونناعا دەيىن ۇلعايتۋ كوزدەلگەن. جوبانى جۇزەگە اسىرۋ ناتيجەسىندە پورتتىڭ جالپى الاڭى 22 گەكتارعا ۇلعايادى. قۇرىلىستىڭ ءبىرىنشى كەزەڭىن 2014-جىلدىڭ جەلتوقسانىندا اياقتاۋ جوسپارلانعان.

مەملەكەت باسشىسىنا سونداي-اق كاسپي تەڭىزىندەگى پورتتىڭ، ترانسكاسپيلىك باعىتتىڭ جانە ماڭعىستاۋ وبلىسىنىڭ كولىك تورابىنىڭ ينفراقۇرىلىمىن دامىتۋ تۋراسىندا باياندالدى.

سونىمەن قاتار، ەڭبەك ۇجىمىنىڭ وكىلدەرىمەن اڭگىمەلەسكەن نۇرسۇلتان نازاربايەۆ قازاقستاننىڭ تەڭىز قاقپاسى رەتىندەگى ماڭىزى وسە بەرەتىن پورتقا مەملەكەت تاراپىنان ايرىقشا كوڭىل ءبولىنىپ وتىرعانىن ايتتى.

- استراحاندا وتكەن سامميتتە كاسپي ماڭى مەملەكەتتەرىنىڭ باسشىلارى تاراپىنان كاسپيدىڭ ەكولوگياسىن ساقتاۋ جانە وسى سۋ قويماسىنداعى قاۋىپسىزدىكتى قامتاماسىز ەتۋ ماسەلەلەرىن قامتيتىن كوپتەگەن جايتتار شەشىلدى. وسىنىڭ ءبارى ىنتىماقتاستىقتى نىعايتۋعا باعىتتالعان جانە ول بۇكىل كاسپي ماڭى ءوڭىرىنىڭ ارى قارايعى دامۋىنا سەرپىن بەرەدى، - دەدى مەملەكەت باسشىسى.