رەسەي مەن قازاقستاننىڭ اراسىندا تاريحي بايلانىستار ورنىققان - رەسەي پرەزيدەنتى
كەزدەسۋ بارىسىندا نۇرسۇلتان نازاربايەۆ پەن ۆلاديمير پۋتين ساۋدا- ەكونوميكا، ينۆەستيتسيا جانە وتىن- ەنەرگەتيكا سالالارىنداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
قازاقستان مەن رەسەي كوشباسشىلارى حالىقارالىق جانە وڭىرلىك قۇرىلىمدار اياسىنداعى، سونىڭ ىشىندە ەۋرازيالىق ەكونوميكالىق وداق جانە كەدەن وداعى اياسىنداعى ءوزارا ءىس- قيمىل ماسەلەلەرىنە ايرىقشا نازار اۋداردى.
مەملەكەت باسشىلارى استراحان قالاسىنداعى كاسپي ماڭى مەملەكەتتەرىنىڭ سامميتى تابىستى بولعانىن دا اتاپ ءوتتى.
قازاقستان پرەزيدەنتى ەكى ەلدىڭ الداعى Ⅺ ءوڭىر ارالىق ىنتىماقتاستىق فورۋمى ءوزارا ءتيىمدى قارىم- قاتىناستاردى دامىتۋ جولىنداعى كەزەكتى قادام بولاتىندىعىنا سەنىم ءبىلدىردى.
- بۇگىن ءبىز ءوڭىر ارالىق فورۋم وتكىزەمىز، ونىڭ اياسىندا ءتۇرلى سالالارداعى كەلىسىمدەرگە قول قويىلاتىن بولادى. قازىر ەلدەرىمىزدىڭ اراسىنداعى ءوزارا تاۋار اينالىمى ازداپ تومەندەپ وتىر، ءبىراق مۇنى مەن ۋاقىتشا قۇبىلىس دەپ ويلايمىن. ءبىزدىڭ ەۋرازيالىق ەكونوميكالىق وداق تولىق قۋاتىندا جۇمىس ىستەيتىنىنە سەنىمدىمىن، ول بارىمىزگە ورتاق پايدا اكەلەدى، - دەدى قازاقستان پرەزيدەنتى.
ءوز كەزەگىندە ۆلاديمير پۋتين فورۋمعا قاتىسۋعا شاقىرعانى ءۇشىن نۇرسۇلتان نازاربايەۆقا العىسىن ايتتى.
- رەسەي مەن قازاقستاننىڭ اراسىندا تاريحي بايلانىستار ورنىققان. ءبىزدى بىرىكتىرىپ تۇرعان مىڭداعان دانەكەرلىكتەر دامۋىمىزعا، ءبىر- بىرىمىزگە قولداۋ كورسەتۋگە سەپتىگىن تيگىزۋدە، - دەپ اتاپ ءوتتى رەسەي پرەزيدەنتى.
نۇرسۇلتان نازاربايەۆ پەن ۆلاديمير پۋتين سونداي- اق حالىقارالىق كۇن تارتىبىندەگى وزەكتى ماسەلەلەرگە قاتىستى دا پىكىر الماستى.
كەزدەسۋ الدىندا مەملەكەت باسشىلارى قازاقستان مەن رەسەيدىڭ 60 قا جۋىق كومپانياسى قاتىسقان «كومىرسۋتەك سالاسىنداعى يننوۆاتسيالار» كورمەسىن ارالاپ كوردى.
