كاسپيدە قازاقستاننىڭ كوك بايراعىن جەلبىرەتكەن كەمەلەر جىل ساناپ كوبەيىپ كەلەدى
بۇل تۋرالى بۇگىن استانادا ءوتىپ جاتقان «سۋ كولىگىندەگى قاۋىپسىزدىكتى قامتاماسىز ەتۋدىڭ ماڭىزدى ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيادا ق ر ينۆەستيتسيالار جانە دامۋ مينيسترلىگىنىڭ جاۋاپتى حاتشىسى بەيبىت اتامقۇلوۆ ايتتى.
ونىڭ اتاپ وتۋىنشە، حالىقارالىق كولىكتىك-ترانزيتتىك دالىزدەر ارقىلى جۇك تاسىمالىن ۇلعايتۋ ءۇشىن قازاقستان كاسپيدەگى جاعالاۋ ينفراقۇرىلىمىن جان-جاقتى دامىتۋدا.
«بۇل رەتتە اقتاۋ پورتىنىڭ جۇك وتكىزۋ مۇمكىندىگىن ۇلعايتۋ بويىنشا جۇمىستار جۇرگىزىلىپ، باۋتينو پورتىندا كاسپي تەڭىزىندەگى قازاقستان قايراڭىنداعى مۇناي كوزدەرىن يگەرۋگە قوسىمشا كومەك بەرەتىن بازا سالىنۋدا. قۇرىق پورتىن دامىتۋ الەۋەتى دە جوعارى دەپ ايتۋعا بولادى»، - دەدى ب. اتامقۇلوۆ.
ونىڭ ايتۋىنشا، بۇگىندە وتاندىق سۋ جولى كولىگى تۇراقتى تۇردە دامىپ كەلەدى.
«تەڭىز تاسىمالدارى نارىعىندا باستى نازار وتاندىق تاسىمالداۋشىلارعا ءبولىنىپ وتىر. وسىنىڭ ناتيجەسىندە قازاقستاننىڭ كوك بايراعىن جەلبىرەتكەن كەمەلەر جىل ساناپ كوبەيىپ كەلەدى»، - دەپ اتاپ ءوتتى ب. اتامقۇلوۆ.
اۆتور: ءابۋ- اسقار مەكەش ۇلى
