پرەزيدەنت ماڭعىستاۋ وبلىسىندا مۇناي وندىرۋدەن باسقا دا سالالاردى دامىتۋ كەرەكتىگىن ايتتى

استانا. قازاقپارات - ەلباسى ماڭعىستاۋ وبلىسىنىڭ كاسىپكەرلەرىمەن جانە جۇرتشىلىق وكىلدەرىمەن كەزدەستى.

مەملەكەت باسشىسى ءوز سوزىندە وبلىستىڭ ورنالاسۋ اۋماعىن ءتيىمدى پايدالانۋعا باعىتتالعان ينفراقۇرىلىمدىق جوبالاردىڭ جۇزەگە اسىرىلۋىنا نازار اۋدارا وتىرىپ، ءوڭىردىڭ وڭ سيپاتتا دامىپ كەلە جاتقاندىعىنا توقتالدى.

بۇل تۋرالى اقوردانىڭ رەسمي سايتى حابارلايدى.

- مەنىڭ تاپسىرمام بويىنشا، اقتاۋ تەڭىز پورتىنىڭ جۇك وتكىزۋ قۋاتى 12,5 ميلليوننان 16 ميلليون تونناعا دەيىن ۇلعايتىلدى، ال 2020 - جىلعا قاراي ونىڭ كولەمى جىلىنا 22 ميلليون تونناعا دەيىن جەتكىزىلەتىن بولادى. يران جىل سايىن 6 ميلليون توننا استىق ساتىپ الۋعا دايىن. ولارمەن وسى جانە باسقا دا سالالاردا قول جەتكىزىلگەن ۋاعدالاستىقتار سىرتقى نارىقتارعا شىعۋ ءۇشىن جاڭا مۇمكىندىكتەر اشادى. جالپى العاندا، اقتاۋ تەڭىز پورتىن ەسكەرسەك، ءبىزدىڭ ەلىمىزدىڭ ەكسپورتتىق الەۋەتى زور، - دەدى نۇرسۇلتان نازاربايەۆ.

قازاقستان پرەزيدەنتى سونداي-اق ازەربايجاندىق كاپيتالدىڭ قاتىسۋىمەن اقتاۋدا جۇزەگە اسىرىلىپ جاتقان لوگيستيكالىق ورتالىق قۇرىلىسىنىڭ جوباسى قازاقستاننىڭ بارلىق تۇتىنۋشىلارى ءۇشىن ساپالى ءارى ارزان جەمىس جانە كوكونىس ونىمدەرىنە جول اشاتىنىن اتاپ ءوتتى.

نۇرسۇلتان نازاربايەۆ اقتاۋداعى ارنايى ەكونوميكالىق ايماقتى ءارى قاراي دامىتۋ ماسەلەلەرىن دە قوزعادى.

- ارنايى ەكونوميكالىق ايماق (ا ە ا) 2002 - جىلى قۇرىلدى، ال ونىڭ ينفراقۇرىلىمى تەك 2009 - جىلى عانا سالىنا باستادى. العاشقى الاڭى 2012 - جىلى بەرىلدى، وعان 7 ميلليارد تەڭگە بيۋدجەت قاراجاتى جۇمسالدى. الايدا، ا ە ا اۋماعىندا تىركەلگەن 31 جوبانىڭ بۇگىنگى تاڭدا تەك 5 ەۋى عانا جۇمىس ىستەيدى. ونداعى كاسىپورىندار 220 ميلليارد تەڭگەدەن استام سومانىڭ ءونىمىن شىعارىپ، 10 ميللياردقا جۋىق سالىق تولەدى. قايتارىم بار، سوندىقتان ولاردىڭ الەۋەتىن جۇزەگە اسىرۋدى جالعاستىرعان ءجون. قالعان بارلىق جوبالار بويىنشا جۇمىستى جانداندىرىپ، ينۆەستور تارتۋدى باستاۋ كەرەك، - دەدى مەملەكەت باسشىسى.

قازاقستان پرەزيدەنتى وبلىستىڭ ءوندىرۋشى ونەركاسىبىنىڭ ماماندانۋىن كەڭەيتۋدىڭ ماڭىزدىلىعىنا نازار اۋداردى.

- ماڭعىستاۋ وبلىسىندا ۋراننىڭ، سترونتسيدىڭ، مارگانەتستىڭ، مىستىڭ، مينەرالدى تۇزداردىڭ ەداۋىر كەنى بار. ولاردىڭ كوپشىلىگى بارلانعان، ءبىراق ءوندىرىلىپ جاتقان جوق. تۇپتەپ كەلگەندە، ولار مەتاللۋرگيالىق ونەركاسىپتىڭ ءبىرقاتار باعىتتارىنا، جاڭا يندۋستريالىق-يننوۆاتسيالىق جوبالار جاساۋعا قاجەتتى الەۋەت بولا الادى. ءوڭىردىڭ ەكونوميكاسى ازىرگە مۇناي وندىرىسىنە سۇيەنىپ تۇر، بۇل رەتتە شاعىن جانە ورتا كاسىپتىڭ ۇلەسى نەبارى 18 پايىز عانا. سوعان وراي ءبىز وزگە سالالارعا دا كوبىرەك كوڭىل بولۋگە ءتيىسپىز، - دەدى نۇرسۇلتان نازاربايەۆ.

وسىعان وراي مەملەكەت باسشىسى مۇناي وندىرىسىمەن بايلانىستى ەمەس سالالاردى، اتاپ ايتقاندا، لوگيستيكا، ترانزيت، سەرۆيستىك قىزمەت جانە تۋريزمدى دامىتۋدىڭ قاجەتتىلىگىن ايتتى. قازاقستان پرەزيدەنتى ارنايى جۇمىس توبىن قۇرىپ، ۇكىمەتتە الدىن الا تالقىلاپ الۋ ارقىلى كەندىرلى ايماعىن جانە باسقا دا تارتىمدى اۋدانداردى دامىتۋ بويىنشا ۇسىنىس ەنگىزۋدى تاپسىردى.

نۇرسۇلتان نازاربايەۆ وبلىستىڭ اۋماعى شولەيتتى وڭىرگە جاتاتىنىنا، بۇل اۋىل شارۋاشىلىعىن جۇرگىزۋدى قيىنداتاتىنىنا دا توقتالدى.

- وبلىس جىلىنا 20 مىڭ توننا ەت تۇتىنادى، ال وندىرەتىنى 5,5 مىڭ توننا عانا. وڭىردە جىلىنا 500 توننا بالىق اۋلانادى، ال سۇرانىس - 5 مىڭ توننا. بۇل رەتتە كورشى اتىراۋ وبلىسى كوكونىس، جەمىس-جيدەك جانە ەتتى قوسا قامتىعاندا، بارلىق قاجەتتى ونىمدەرمەن ءوزىن ءوزى قامتاماسىز ەتىپ وتىر. وڭىردەگى اگرارلىق سالانى دامۋ ماسەلەلەرىن كەشەندى تۇردە شەشۋ قاجەت، بۇعان شاعىن جانە ورتا بيزنەستىڭ وكىلدەرى اتسالىسۋى ءتيىس، - دەدى مەملەكەت باسشىسى.

قازاقستان پرەزيدەنتى وبلىستا تۋۋ مەن ءومىر جاسىنىڭ ۇزاقتىعىنا قاتىستى جاقسى كورسەتكىشتەر بايقالىپ وتىرعانىن، انا مەن بالا ءولىمى تومەندەگەنىن اتاپ ايتتى.

- الايدا، دارىگەر ماماندارمەن قامتىلۋ دەڭگەيى ورتاشا رەسپۋبليكالىق كورسەتكىشتەن 20 پايىزعا تومەن. بالاباقشاداعى ورىن تاپشىلىعى 12 مىڭدى قۇرايدى، بۇل - ەل بويىنشا ناشار كورسەتكىشتىڭ ءبىرى. ال وبلىس باسقا وڭىرلەر مەن كورشىلەس مەملەكەتتەردەن كەلەتىن حالىق سانى جاعىنان رەسپۋبليكادا الدىڭعى ورىندا، - دەدى نۇرسۇلتان نازاربايەۆ.

مەملەكەت باسشىسى كوشى-قون اعىنىن باسىمدىعى بار وزگە وڭىرلەرگە بۇرۋ ءۇشىن ۇكىمەت قاجەتتى جاعدايلار جاساۋى كەرەكتىگىن ايتتى.

سوڭىندا نۇرسۇلتان نازاربايەۆ شەتەلدىك ينۆەستيتسيالار تارتۋدىڭ ماڭىزىنا تاعى ءبىر رەت نازار اۋداردى، سونداي- اق وبلىستى قارقىندى دامىتۋ ءۇشىن جاسالعان شارتتاردى بەلسەندى پايدالانۋ قاجەتتىگىن اتاپ ءوتتى.

كەزدەسۋ بارىسىندا ماڭعىستاۋ وبلىسىنىڭ اكىمى ءا. ايداربايەۆ ءوڭىردىڭ الەۋمەتتىك-ەكونوميكالىق دامۋى تۋرالى، ينۆەستيتسيا جانە دامۋ جونىندەگى مينيستر ءا. يسەكەشەۆ وبلىستاعى يندۋستريالىق-يننوۆاتسيالىق باعدارلامانىڭ جۇزەگە اسىرىلۋى بارىسى تۋرالى بايانداما جاسادى.

سونىمەن قاتار، كەزدەسۋدە مەملەكەت باسشىسىنا ۇزىندىعى 13,8 شاقىرىم بولاتىن بورجاقتى - ەرساي جاڭا تەمىرجولىنىڭ قۇرىلىس جوسپارى تانىستىرىلدى. سونىمەن قاتار بورجاقتى ستانساسىنان تىكەلەي بەينەترانسلياتسيا ۇيىمداستىرىلدى جانە ونىڭ بارىسىندا پرەزيدەنت تەمىرجول قۇرىلىسىن باستاۋعا رۇقسات بەردى.

بورجاقتى - ەرساي جەلىسىنىڭ قۇرىلىسى قۇرىق پورتىنىڭ جاعالاۋ ينفراقۇرىلىمىنىڭ سالىنىپ جاتقان نىساندارىنا تۇراقتى جۇك جەتكىزىلىمىن قامتاماسىز ەتۋگە، «قاز تەڭىز ترانس فلوت» ا ق، «تەڭىز- سەرۆيس»، «گلوبال. ينك»، «ەرساي كاسپيان كونتراكتور» ج ش س- لارىنىڭ دامۋىن قولداۋعا، قۇرىق پورتى ارقىلى مۇناي تيەۋگە باعدارلانعان.