قازاق ونەرىنىڭ ساڭلاقتارى: ايمان قوجابەك قىزى مۇساقوجايەۆا
ايمان- سكريپكادا ويناۋشى. قازاقستاننىڭ حالىق ءارتيسى، «الەم ءارتيسى» (يۋنەسكو، 1998 ج. ) ، حالىقارالىق شىعارماشىلىق اكادەمياسىنىڭ اكادەميگى. 1958 ج. الماتى قالاسىندا تۋعان. قۇرمانعازى اتىنداعى الماتى مەملەكەتتىك كونسەرۆاتورياسىن، پ. ي. چايكوۆسكي اتىنداعى ماسكەۋ مەملەكەتتىك كونسەرۆاتورياسىن ءبىتىردى. ايمان ۇيىمداستىرۋشى، تالانتتى ۇستاز. 1993 - جىلدان «سوليستەر اكادەمياسى» مەملەكەتتىك كامەرالىق وركەسترىن ۇيىمداستىردى. 1998 - جىلدان ول استاناداعى قازاقتىڭ ۇلتتىق مۋزىكا اكادەمياسىنىڭ رەكتورى قىزمەتىنە تاعايىندالدى. قازىرگى كەزدە پرەزيدەنت وركەسترىنىڭ كوركەمدىك جەتەكشىسى. ا. مۇساحودجايەۆانىڭ اتى مۋزىكالىق وليمپتە م. پلەتنيەۆ، گ. كرەمەر، ە. گراچ، ۆ. ترەتياكوۆ، ي. گاۆرش سياقتى الەم جۇلدىزدارىمەن قاتار تۇر. ول شىعىس مۋزىكاسىنىڭ نازىكتىگىن، سەزىمتالدىعىن ەۋروپانىڭ مۋزىكالىق مادەنيەتىنىڭ رۋحانيلىعىمەن، كوپقىرلىعىمەن ۇندەستىرىپ، ۇلتتىق ونەردى الەم حالقىنا تانىتتى.
الەمگە ايگىلى ايمان مۇساقوجايەۆانىڭ ءان- كۇيگە دەگەن اۋەستىگى بالا كەزىنەن باستالدى. اناسى راحيلا بالالارىنىڭ جان- جاقتى ءبىلىمدى, جىگەرلى بولىپ وسۋىنە كوپ كۇش سالدى.
اكەسى قوجابەك مۇساقوجايەۆ ءار جەردە ءتۇرلى جاۋاپتى قىزمەتتەردە ءجۇردى, وبلىستىق پارتيا كوميتەتىنىڭ حاتشىسى بولدى. ۇيدەگى ءتورت بالا الماتىداعى ينتەرناتتا تۇرىپ وقىدى. شەشەسى قاسكەلەڭ اۋدانىنان قالاعا كەلگەندە ءتورت قىزدى جەتەكتەپ، وپەرا جانە بالەت تەاترىنا الىپ باراتىن.
ايمان كۇلاش بايسەيىتوۆا اتىنداعى رەسپۋبليكالىق مۋزىكا مەكتەبىندە پروفەسسور ن. پاترۋشيەۆانىڭ سىنىبىندا وقىدى. ونى ويداعىداي بىتىرگەن سوڭ ماسكەۋدەگى پ. چايكوۆسكي اتىنداعى مەملەكەتتىك كونسەرۆاتورياسىندا كەڭەس وداعىنىڭ ءارتىسى, پروفەسسور ۆ. كليموۆتىڭ سىنىبىندا وقۋىن جالعاستىردى.
ايمان مۇساقوجايەۆا 1976 - جىلى يۋگوسلاۆيادا، بەلگراد قالاسىندا وتكەن حالىقارالىق كونكۋرستا لاۋرەات اتاندى. نەبارى 18 جاستاعى قىزدىڭ حالىقارالىق سايىستا قازاقستان اتىنان جاسقانباي ونەر كورسەتىپ، جەڭىمپازدىق تۇعىردان كورىنۋى جينالعانداردى ايرىقشا تاڭ قالدىرعان ەدى. بۇل ونىڭ العاشقى شىققان بيىگى بولاتىن.
وسىدان كەيىن ايماننىڭ ءوسىپ، ورلەۋ جولدارى باستالدى. 1981 - جىلى گەنۋياداعى پاگانيني اتىنداعى، 1983 - جىلى توكيوداعى، 1985 - جىلى حەلسينكيدەگى يا. سيبەليۋس اتىنداعى، 1986 -جىلى ماسكەۋدەگى پ. چايكوۆسكي اتىنداعى VIII حالىقارالىق كونكۋرستاردىڭ لاۋرەاتى اتاندى.
تاڭداۋلى تەحنيكا، ءتۇرلى اۋەندەردى تەرەڭ ءتۇسىنۋ ونىڭ ەڭ قيىن سكريپكالىق تۋىندىلاردى يكەمگە كەلتىرىپ، الەمنىڭ تاماشا كونتسەرت زالدارىندا ناقىشىنا كەلتىرە ورىنداۋىنا مۇمكىندىك بەردى. كونتسەرتتىك قىزمەت جىلدارىندا ايمان مۇساقوجايەۆا سكريپكالىق مۋزىكانىڭ باي رەپەرتۋارىن جيناقتادى. سونىڭ ىشىندە باح، گايدن، موتسارت، بەتحوۆەن، پاگانيني، برامس، چايكوۆسكيي، سيبەليۋس سەكىلدى جارقىن تۇلعالاردىڭ، وسى زامانعى سازگەرلەردىڭ، قازاقستان سازگەرلەرىنىڭ شىعارمالارى بار.
1992 - جىلى ول «سوليستەر اكادەمياسى» مەملەكەتتىك كامەرالىق وركەسترىن قۇردى جانە قازىر دە ونىڭ كوركەمدىك جەتەكشىسى بولىپ سانالادى. العاشقى قۇرىلعان كۇننەن وركەستر كلاسسيكادان باستاپ بۇگىنگى كومپوزيتورلاردىڭ تۋىندىلارىنا دەيىن يگەردى. ول XVII- XVIII عاسىرلارداعى كونە دە اسپەتتى، سونداي- اق وسى زامانعى وزىق ۇلگىدەگى مۋزىكالىق قۇرالدارمەن قامتاماسىز ەتىلگەن.
وركەستر ۇجىمىنىڭ جوعارى ورىنداۋشىلىق شەبەرلىگىن رەسەيدە، امەريكادا، جاپونيادا، گەرمانيادا، اۆستريادا جانە باسقا دا ەلدەردە لايىقتى باعالادى.
1993 -جىلدان بەرى ايمان قوجابەك قىزى رەسەيدەگى پەتر چايكوۆسكي اتىنداعى، ابرام يامپولسكي اتىنداعى (دۋبنا) حالىقارالىق سكريپكاشىلار كونكۋرسىنىڭ، يتالياداعى ميلان قالاسىندا وتەتىن ميكەلانجەلو اببادو اتىنداعى حالىقارالىق سكريپكاشىلار كونكۋرسىنىڭ قازىلار القاسىنىڭ مۇشەسى. ماسكەۋ، الماتى، بىشكەك كونسەرۆاتوريالارىنىڭ پروفەسسورى رەتىندە بەلسەندى, ءارى پەداگوگيكالىق قىزمەت اتقارىپ كەلەدى.
شاكىرتتەرىنىڭ اراسىندا حالىقارالىق جانە رەسپۋبليكالىق كونكۋرستاردىڭ لاۋرەاتتارى از ەمەس. ءبىراق ايماننىڭ ورىنداۋشىلىق جانە پەداگوگيكالىق قىزمەتىنىڭ شىڭى 1998 - جىلى قازاق ۇلتتىق مۋزىكا اكادەمياسىنىڭ اشىلۋى بولىپ تابىلادى. بۇل استانانىڭ الماتىدان تسەلينوگرادقا اۋىسىپ جاتقان كەزى بولاتىن. قازاق ۇلتتىق مۋزىكا اكادەمياسى ايمان مۇساقوجايەۆانىڭ ۇسىنىسى بويىنشا سول جىلدىڭ 31 - ناۋرىزىندا قازاقستان پرەزيدەنتىنىڭ باستاماسىمەن اشىلدى. ول رەسپۋبليكاداعى جاس وقۋ ورىندارىنىڭ ءبىرى بولىپ سانالادى.
مۋزىكا سالاسىنداعى جوعارى جەتىستىكتەرى ءۇشىن وعان 1988- جىلى قازاقستان رەسپۋبليكاسىنىڭ حالىق ءارتىسى, حالىقارالىق شىعارماشىلىق اكادەمياسىنىڭ اكادەميگى اتاعى، يۋنەسكو- نىڭ شەشىمىمەن «الەم ءارتىسى» قۇرمەتتى اتاعى بەرىلدى.
2000 - جىلى مەملەكەتتىك سىيلىققا يە بولدى.
قازاقستان مەتسەناتتار كلۋبى «پلاتيندى تارلان» سىيلىعىمەن ماراپاتتادى.
ەسىمى كەمبريدج ۋنيۆەرسيتەتىندەگى حالىقارالىق ءومىربايان ورتالىعى جاريالايتىن «XX عاسىردىڭ 2000 كورنەكتى مۋزىكانتى» اتتى دۇنيەجۇزىلىك قۇرمەتتى تىزىمگە ەنگىزىلىپ، وسى ورتالىقتىڭ مەدالىن ومىراۋىنا تاقتى.
