ازەربايجاندىق ينۆەستورلار ق ر پرەزيدەنتىنە ا و ك ءۇشىن فابريكا قۇرۋدى ۇسىندى

اقتاۋ. قازاقپارات - ماڭعىستاۋ وبلىسىنا جۇمىس ساپارى اياسىندا مەملەكەت باسشىسى نۇرسۇلتان نازاربايەۆ مينيسترلەر، ينۆەستورلار جانە مەملەكەتتىك قىزمەتكەرلەرمەن قورىتىندى كەڭەس وتكىزدى.

پرەزيدەنت الدىندا ماڭعىستاۋ وبلىسىنىڭ اكىمى اليك ايداربايەۆ سويلەدى.

ول ەلباسىن ءوڭىردىڭ الەۋمەتتى-ەكونوميكالىق دامۋىنىڭ نەگىزگى كورسەتكىشتەرى تۋرالى اقپاراتتاندىردى.

«5 باعىت: مۇناي-گاز ءوندىرۋ، مۇناي قىزمەتى، لوگيستيكا، تۋريزم، قۇرىلىس بار. ەكىنشى باعىت ءبىزدىڭ وبلىستا عانا ەمەس، سونىمەن بىرگە اتىراۋ جانە باتىس قازاقستان وبلىستارىندا دامۋدا. العاشقى ەكى باعىت بويىنشا كوش باستايمىز دەپ ايتا المايمىز، الايدا ەكىنشى باعىت بويىنشا مۇمكىندىگىمىز بار»، - دەدى ا. ايداربايەۆ.

مەملەكەت باسشىسى اقتاۋ تەڭىز ساۋدا پورتى مەن ا ە ا دامۋى تۋرالى تالقىلاۋ كەزىندە، №3 سۋبايماقتا كولەمى 4,2 گەكتار بولاتىن قويما سالۋدى جوسپارلاعان ازەربايجاندىق ينۆەستورلارعا جەر ءبولۋ ءۇردىسى نەلىكتەن سوزىلىپ كەتكەنىن سۇرادى.

«جەر ءبولىندى، باتىس قازاقستانداعى ەڭ ءىرى قويمانىڭ (10 مىڭ تەكشە مەتر) قۇرىلىس جۇمىستارى باستالدى. جابدىقتار گوللانديا، جاپونيا جانە گەرمانيادان ساتىپ الىنادى»، - دەپ اتاپ ءوتتى «ازەرسۋن» حولدينگىنىڭ ۆيتسە-پرەزيدەنتى تاحير گەزال.

سونداي-اق ق ر پرەزيدەنتى ن. نازاربايەۆ ءوڭىردىڭ كليماتتىق جاعدايىنا قاراماستان اگروونەركاسىپتىك كەشەندى دامىتۋ قاجەتتىلىگىنە توقتالىپ ءوتتى. مەملەكەت باسشىسى قۇس ەتى، جۇمىرتقا، كوكونىستەرمەن ءوزىن ءوزى قامتاماسىز ەتىپ قانا قويماي، رەسەيگە ەكسپورتقا شىعارىپ وتىرعان اتىراۋ وبلىسىن مىسالعا كەلتىردى. سونىمەن بىرگە كورشىلەس وڭىردە يسپاندىق تەحنولوگيا بويىنشا جىلىجاي شارۋاشىلىعى دا دامىتىلۋدا.

«وڭىردەگى اگرارلىق سالانى دامىتۋ ماسەلەلەرىن كەشەندى تۇردە شەشۋ قاجەت»، - دەپ اتاپ وتكەن ەلباسى ق ر اۋىل شارۋاشىلىعى مينيسترلىگىمەن بىرلەسىپ مال ازىعىن دايىندايتىن جەم بازاسىمەن قامتۋ ماسەلەسىن شەشۋدى تاپسىردى. «ازەرسۋن» وكىلدەرى وسى مۇمكىندىكتى پايدالانىپ، جاڭا ۇسىنىس ءبىلدىردى.

«ەگەر بىزگە تەڭىزگە شىعۋ مۇمكىندىگىن بەرسە، جەم شىعاراتىن فابريكانى وسى جەردە سالۋدى ۇسىنامىز»، - دەدى تاحير گەزال.