كاسپي ماڭى ءوڭىرى ەكپىندى دامىپ كەلەدى جانە وعان اۋعان الەم نازارى دا ۇلعايا ءتۇستى - ق ر پرەزيدەنتى
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەت باسشىسى كاسپي تەڭىزىنىڭ ءبىزدىڭ ەلدەرىمىز ءۇشىن ايرىقشا ماڭىزىن جانە وتكەن ءسامميتىڭ جەمىستى بولعانىن اتاپ ايتتى.
- بۇكىل كاسپي ماڭى ءوڭىرى ەكپىندى دامىپ كەلەدى جانە ونداعى ەنەرگيا كوزدەرى مەن بيولوگيالىق رەسۋرستارعا وراي وعان اۋعان الەم نازارى دا ۇلعايا ءتۇستى. بۇگىنگى سامميت كاسپي ماڭى مەملەكەتتەرىنىڭ بارلىق كۇردەلى ماسەلەلەردى كەلىسۋگە دەگەن نيەتىن تاعى دا بايقاتتى. ءبىز وسىنداي كەلەسى شارا قازاقستاندا وتەدى دەپ شەشتىك، - دەدى نۇرسۇلتان نازاربايەۆ.
قازاقستان پرەزيدەنتى استراحانداعى سامميت قورىتىندىسىن ناعىز ىلگەرى ۇمتىلىس دەپ اتادى.
- كەلىسسوزدەر ناتيجەسىندە كاسپي جاعالاۋى ەلدەرى ءىس-قيمىلىنىڭ نەگىزگى اسپەكتىلەرى بويىنشا ۇستانىمدارىن جاقىنداتتىق، ءبىرقاتار ماڭىزدى وڭىرلىك ماسەلەلەردى تالقىلادىق. استراحان ءسامميتىنىڭ قورىتىندىسى باستى قۇجات - كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى قابىلداۋ ماقساتىنداعى ىلگەرىلەۋگە مۇلدە جاڭا سەرپىن بەرەتىندىگىنە سەنىمدىمىن، - دەدى مەملەكەت باسشىسى.
نۇرسۇلتان نازاربايەۆ سونداي-اق سامميت بارىسىندا ۇسىنىلعان ءبىرقاتار باستامالار تۋرالى دا ايتتى. ولاردىڭ ىشىندە تۇرىكمەنستاننىڭ تۇراقتى جۇمىس ىستەيتىن كاسپي ەكونوميكالىق فورۋمىن قۇرۋ تۋرالى جانە قازاقستاننىڭ كاسپي ەركىن ساۋدا ايماعىن قۇرۋ تۋرالى ۇسىنىستارى بار.
- ءسىرا، ءبىز ەندى ءوزىمىز قابىلداعان شەشىمدەردىڭ ورىندالۋىن باقىلايتىن جانە وڭىردەگى ىنتىماقتاستىقتى ىلگەرىلەتۋمەن اينالىساتىن ءبىر ۇيىم قۇرۋعا اياق باساتىن شىعارمىز. جالپى العاندا، ءبىز ەلدەرىمىزدىڭ بارلىعى ءۇشىن وتە ماڭىزدى، ناتيجەلەرى ايقىن كەلىسسوزدەر وتكىزدىك دەپ سانايمىن. استراحانداعى كەزدەسۋ كاسپيدىڭ تاتۋلىق پەن دوستىق تەڭىزى ەكەندىگىنە دەگەن ءبىزدىڭ سەنىمىمىزدى نىعايتتى، - دەدى قازاقستان پرەزيدەنتى.
ءتورتىنشى سامميت جۇمىسىنىڭ سوڭىندا بەس مەملەكەتتىڭ كوشباسشىلارى ەدىلگە بەكىرە تۇقىمداس بالىقتاردىڭ شاباقتارىن جىبەرۋ جونىندەگى سيمۆولدىق شارا راسىمىنە قاتىستى.
ءتورتىنشى سامميتتىڭ بارىسىندا مەملەكەت باسشىلارى كومميۋنيكە قابىلدادى. سونداي- اق ولاردىڭ قاتىسۋىمەن مىناداي قۇجاتتارعا قول قويىلدى:
- كاسپي تەڭىزىندەگى گيدرومەتەورولوگيا سالاسىنداعى ىنتىماقتاستىق تۋرالى كەلىسىم؛
- كاسپي تەڭىزىندەگى توتەنشە جاعدايلاردىڭ الدىن الۋ جانە جويۋ سالاسىنداعى ىنتىماقتاستىق تۋرالى كەلىسىم؛
- كاسپي تەڭىزىنىڭ سۋ جانە بيولوگيالىق رەسۋرستارىن ساقتاۋ مەن ۇسىناقتى پايدالانۋ تۋرالى كەلىسىم.
سونىمەن قاتار، ازەربايجان رەسپۋبليكاسى، يران يسلام رەسپۋبليكاسى، قازاقستان رەسپۋبليكاسى، رەسەي فەدەراتسياسى جانە تۇرىكمەنستان رەسپۋبليكاسى پرەزيدەنتتەرىنىڭ مالىمدەمەسىنە قول قويىلدى.
