مەملەكەت باسشىسى «مەنىڭ ەلىم. كاسپيدەن التايعا دەيىن» ەكسپەديتسياسىنىڭ قاتىسۋشىلارىنا ساتتىلىك تىلەدى - فوتو
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەت باسشىسى اقتاۋ قالاسىنىڭ جاعالاۋىندا ەكسپەديسياعا قاتىسۋشىلارمەن كەزدەستى. ولار جوبانىڭ ماقساتى مەن وڭىرلەر اراسىنداعى مادەني الماسۋعا ۇلەس قوسساق دەگەن وزدەرىنىڭ ۇمتىلىستارى تۋرالى اڭگىمەلەدى.
نۇرسۇلتان نازاربايەۆ پاتريوتيزمدى نىعايتۋدا جانە ەلدىڭ تۋريستىك الەۋەتىن دامىتۋدا وسىنداي باستامالاردىڭ ماڭىزدى ەكەندىگىن اتاي وتىرىپ، ەكسپەديسياعا قاتىسۋشىلارعا ساتتىلىك تىلەدى.
كەزدەسۋگە سونداي-اق ءوڭىر جاستارىنىڭ وكىلدەرى، سونىڭ ىشىندە ماڭعىستاۋ وبلىسىنان شىققان «بولاشاق» ستيپەندياسىنىڭ تۇلەكتەرى، نازاربايەۆ ۋنيۆەرسيتەتىنىڭ تىڭداۋشىلارى، «ديپلوممەن اۋىلعا» مەملەكەتتىك باعدارلاماسىنا قاتىسۋشىلار، جاستار بىرلەستىكتەرىنىڭ كوشباسشىلارى، ەتنو-مادەني ورتالىقتاردىڭ وكىلدەرى، حالىقارالىق سپورت جارىستارىنىڭ جەڭىمپازدارى، مادەنيەت پەن عىلىمداعى جاس قىزمەتكەرلەر قاتىستى.
اڭگىمە بارىسىندا ولار وزدەرىنىڭ جەتىستىكتەرىن ورتاعا سالدى جانە جاستاردىڭ باستامالارىن دامىتۋعا كورسەتىلىپ وتىرعان مەملەكەتتىك قولداۋ ءۇشىن العىستارىن ءبىلدىردى.
«مەنىڭ ەلىم. كاسپيدەن التايعا دەيىن» ەكسپەديسياسى قازاقستان جاستارىن ەلىمىزدىڭ سۇلۋلىعى مەن وزىندىك ەرەكشەلىگى تۋرالى ورتاق يدەياعا بىرىكتىرۋگە باعىتتالعان. ونىڭ قۇرامىندا ەتنوگراف، بلوگشى، جۋرناليستەر مەن فوتوگرافتاردان قۇرالعان 20 ادام بار.
قازاقستاندا قۇراستىرىلعان بەس اۆتوموبيلگە مىنگەن ولار ەكى اي بويىندا رەسپۋبليكانى ارالاپ شىعادى. وعان قاتىسۋشىلار ەكسپەديسيا اياقتالعان سوڭ فيلم جاساپ، فوتوكىتاپ شىعارادى.
