قازاقستان كاسپي ماڭى ەلدەرىنەن قىتايعا تاۋار جەتكىزەتىن ترانزيتتىك كوپىر بولۋعا دايىن

استراحان. قازاقپارات - قازاقستان كاسپي ماڭى ەلدەرىنەن وزگە مەملەكەتتەردىڭ نارىعىنا تاۋار جەتكىزەتىن كوپىر رەتىندە ءوزىنىڭ ترانزيتتىك مارشرۋتتارىن پايدالانۋدى ۇسىنادى.

 بۇل تۋرالى بۇگىن كاسپي ماڭىنداعى مەملەكەتتەر باسشىلارىنىڭ IV سامميتىندە ق ر پرەزيدەنتى نۇرسۇلتان نازاربايەۆ ءمالىم ەتتى.

«بۇگىنگى سامميتتە قول جەتكىزىلگەن ماڭىزدى جەتىستىكتەردىڭ ءبىرى - جالپىعا ورتاق حالىقارالىق قۇقىق، نورمالار قاعيداتى نەگىزىندە كاسپي تەڭىزىنەن باسقا تەڭىزدەرگە، الەمدىك مۇحيتقا ەركىن شىعۋ پرينتسيپىن كەلىسۋ بولدى دەپ ەسەپتەيمىن» ، - دەدى مەملەكەت باسشىسى.

 ەلباسى بۇگىنگى تاڭدا قازاقستاندا «سولتۇستىك جانە وڭتۇستىك» ، تراسەكا، قىتايدان قورعاسقا دەيىن، ودان ءارى كاسپي تەڭىزىندەگى اقتاۋ پورتىنا دەيىن ليانيۋنگان پورتى سەكىلدى دامىعان ترانزيتتىك مارشرۋتتار ىسكە قوسىلعانىنا توقتالىپ كەتتى. «باتىس ەۋروپا - باتىس قىتاي» اۆتوموبيل ءدالىزىنىڭ قۇرىلىسى اياقتالىپ كەلەدى. قازاقستان، تۇركىمەنستان جانە يران بيىلعى جىلدىڭ ىشىندە قازاقستان مەن تۇركىمەنستاننان يران مەن پارسى شىعاناعىنا دەيىن سوزىلاتىن تەمىرجولدى ءتۇيىستىرۋدى كوزدەپ وتىر.

«قازاقستان ارقىلى وتەتىن مارشرۋتتاردىڭ اشىلۋىنا وراي، ءبىز ولاردى كاسپي ماڭى ەلدەرىنەن وزگە مەملەكەتتەردىڭ، ءبىرىنشى كەزەكتە قىتاي مەن تىنىق مۇحيتىنا دەيىنگى ەلدەر نارىعىنا تاۋار جەتكىزەتىن ترانزيتتىك كوپىر رەتىندە پايدالانۋدى ۇسىنامىز. وسى ماقساتتا ءبىزدىڭ ەلدەردىڭ ۇكىمەتتەرى ۇكىمەتارالىق كەلىسىمگە قول قويۋ مۇمكىندىگىن قاراستىرا الادى» ، - دەپ قورىتىندىلادى ن. نازاربايەۆ.