قازاق ونەرىنىڭ ساڭلاقتارى: بايعالي دوسىمجانوۆ
ول 1936 - 39 - جىلدارى الماتى مۋزىكالىق ۋچيليشەسىندە ، 1939 - 41 - جىلدارى ماسكەۋكونسەرۆاتورياسى جانىنداعى قازاق ستۋدياسىندا وقىعان، 1947 - جىلى الماتى كونسەرۆاتورياسىن (قازىرگى قازاق ۇلتتىق كونسەرۆاتورياسى) بىتىرگەن. 1941 - جىلى قازاق وپەرا جانە بالەت تەاترىنىڭ، 1942 - جىلى ىشكى ىستەر جاۋىنگەرلەرىنىڭ، كەيىن (1943) شەكاراشىلار ءان- ءبي انسامبلدەرىنىڭ جەكە داۋىستاعى ءانشىسى بولدى. 1944 - جىلدان قازاق وپەرا جانە بالەت تەاترىندا تولەگەن (ە. گ. برۋسيلوۆسكيدىڭ «قىز جىبەگىندە») ، ءبىرجان (م. تولەبايەۆتىڭ « ءبىرجان - ساراسىندا»، ك س ر و مەملەكەتتىك سىيلىعىنىڭ، 1949) ، ايدار (ا. جۇبانوۆ پەن ل. ءحاميديدىڭ«ابايىندا») ، ت. ب. پارتيالاردى ورىنداپ، ۇلتتىق وپەرا ونەرىنىڭ دامۋىنا ەلەۋلى ۇلەس قوستى. قازاق حالىق اندەرى مەن حالىق كومپوزيتورلارىنىڭ اندەرىن («جيىرما بەس»، «بۋرىلتاي»، «اقباقاي»، «سىرىمبەت»، «ايتتىم سالەم، قالامقاس»، «ۇايني») ناسيحاتتادى. ونىڭ انشىلىك ونەرى جوعارى مادەنيەتىمەن، جارقىن بوياۋىمەن، شىنايى تەرەڭ تەبىرەنىستى وزىندىك ورنەگىمەن ەرەكشەلەندى. 1960 - جىلدان رەجيسسەرلىك قىزمەتپەن اينالىسا باستادى. ە. راحماديەۆتىڭ «قامار سۇلۋى» مەن «الپامىسىن»، برۋسيلوۆسكيدىڭ «قىز جىبەگىن» (ق. بايسەيىتوۆپەن بىرگە) ، ز. گ. يسماگيلوۆتىڭ «قۇداشا»، د. ۆەرديدىڭ «بالماسكاراد»، ت. ب. سپەكتاكلدەردى ساحنالادى . 1975 - 76 -جىلدارى « ءبىرجان- سارا» مەن «اباي» (قازاقستان مەملەكەتتىك سىيلىعىنىڭ، 1978) وپەرالارىن قايتا قويدى. 1975 - جىلدان الماتى كونسەرۆاتورياسىنىڭ وپەرالىق دايارلىق كافەدراسىنىڭ مەڭگەرۋشىسى بولدى. دوسىمجانوۆ كوپتەگەن دارىندى انشىلەردى دايارلاپ، كوركەمونەرپازدىقتى دامىتۋعا ۇلكەن ۇلەس قوستى. جۇرتشىلىققا تانىمال بولعان «قالامقاس»، «نۇرگۇل» انسامبلدەرىنىڭ قامقورشىسى بولدى. ءۇش مارتە ەڭبەك قىزىل تۋ جانە «پاراسات» وردەنىمەن، كوپتەگەن مەدالدەرمەن ماراپاتتالعان.
