قاراعاندى وبلىسىندا تاعى ەكى شەنەۋنىككە ايىپ تاعىلدى
ناقتىسىن ايتقاندا، ولارعا قاراعاندى وبلىسىنىڭ بۇرىنعى اكىمىمەن قاتىستى فيرمانىڭ مۇددەسىن لوببيلەندىردى دەگەن ايىپ تاعىلۋدا.
قازىر ولار ەشقايدا كەتپەۋ تۋرالى قولحاتپەن ۇيىندە وتىر دەپ حابارلايدى Tengrinews.kz.
ادامبەكوۆ پەن جاكەنوۆكە تەندەرلىك بايقاۋ جاريالاماي-اق "ەۋروستاندارت قاراعاندى" ج ش س-نە بورديۋرلەر، تاس توسەۋىش جانە جول جيەگىنە ارنالعان پليتالار جاساۋ قۇقىعىن بەردى دەگەن ايىپ تاعىلىپ وتىر.
"اتالعان ج ش س-نىڭ باۋىرجان ابدىشيەۆكە تيەسىلى ەكەنىنە تەرگەۋ ءىسىنىڭ دالەلى بار. ج ش س-نىڭ ديرەكتورى رەتىندە شارتتى ءبىر تۇلعانى بەكىتە سالعان. كاسىپورىننىڭ بازاسىندا بەتون ونىمدەرىن جانە ساياباقتار مەن گۇلزارلارعا قاجەتتى وزگە دە بۇيىمدار جاسايتىن زاۆود سىلانعان" دەلىنگەن شۇعىل-تەرگەۋ توبىنىڭ تاراتقان حابارلاماسىندا.
2012 - جىلى قاراعاندى اكىمىنىڭ ورىنباسارى قىزمەتىن اتقارعان مۇحتار ادامبەكوۆ ەكس-اكىم باۋىرجان ابدىشيەۆتىڭ تاپسىرماسىمەن تۇرعىن ءۇي كوممۋنالدىق شارۋاشىلىعى ءبولىمىنىڭ باسشىسى ايدوس جاكەنوۆكە بورديۋرلار مەن جول جيەگىنىڭ پليتالارىن تەك "ەۋروستاندارت قاراعاندى" ج ش س-نان ساتىپ الۋدى بۇيىرعان كورىنەدى.
"جاكەنوۆ پەن ادامبەكوۆ وزدەرىنىڭ زاڭدى بەلدەن باسىپ وتىرعانىن جاقسى بىلگەن. ويتكەنى، "مەملەكەتتىك ساتىپ الۋلار" تۋرالى زاڭدا بارلىق ورىنداۋشىلاردىڭ مۇمكىندىگى بىردەي دەپ كورسەتىلگەن. دەگەنمەن، ەكى شەنەۋنىك جوعارىدان كەلگەن تاپسىرمانى ورىنداي وتىرىپ، وزگە كاسىپكەرلەردىڭ قۇقىعىن تاپتادى" دەيدى شۇعىل-تەرگەۋ توبىنىڭ وكىلدەرى.
قازىرگى تاڭدا ادامبەكوۆ پەن جاكەنوۆ تۇسىنىكتەمە بەرىپ جاتىر. ولار وبلىس ەكس-اكىمىنىڭ تىكەلەي قاراماعىندا بولعاندىعىن جانە ونىڭ تاپسىرمالارىن ورىنداعانىن ايتۋدا. تەرگەۋ توبى كۇدىكتىلەردەن ەشقايدا كەتپەۋ تۋرالى قولحات الىپ، ۇيلەرىنە جىبەردى.
