بەرۋشى دە، الۋشى دا جەمقورلىققا مۇددەلى بولسا، وندا بۇل زۇلىمدىقتى جويۋ مۇمكىن ەمەس - ف. قۋانعانوۆ

استانا. قازاقپارات - «ءبىز بۇگىندە ازاماتتار ءۇشىن سىبايلاس جەمقورلىق بارىنشا ءتيىمسىز بولاتىنداي جاعداي قالىپتاستىرۋىمىز كەرەك»، دەپ ەسەپتەيدى «نۇر وتان» پارتياسىنىڭ حاتشىسى فارحات قۋانعانوۆ.

بۇل تۋرالى nurotan.kz حابارلادى.

«ءارالۋان سالاداعى جەمقورلىق كورىنىستەرىن سارالاي كەلە، ءبىز، بەرۋشى دە، الۋشى دا مۇددەلى بولسا، وندا بۇل زۇلىمدىقتى جويۋ مۇمكىن ەمەس دەگەن توقتامعا كەلدىك. سوندىقتان دا، جەمقورلىق جولى ءتيىمسىز بولاتىنداي جاعداي جاساۋىمىز كەرەك»، - دەدى فارحات قۋانعانوۆ «نۇر وتاننىڭ» سىبايلاس جەمقورلىققا قارسى جاڭا باعدارلاماسى جوباسىن جاستار ۇيىمدارى كوشباسشىلارىنىڭ تالقىلاۋىنا ارنالعان جيىندا.

پارتيا حاتشىسىنىڭ ايتۋىنشا، وسىناۋ قۇبىلىسپەن ۇزاق كۇرەسە بەرۋگە بولادى. دەگەنمەن، ەڭ وڭتايلى جولى - سەبەپتەرىمەن كۇرەسۋ. سوندا عانا ءىس جەمىستى بولماق.

سونداي-اق، ول، جاستارمەن پىكىر الماسا وتىرىپ ەلىمىزدە ازىرلەنىپ جاتقان سىبايلاس جەمقورلىققا قارسى ۇلتتىق ستراتەگيا مەن پارتيانىڭ باعدارلاماسىن اتاپ ءوتتى.

«باعدارلامالار مەرزىمدەرى بويىنشا ۇيلەستىرىلگەن، الايدا، ءار باعىتتا جۇمىس جاسايدى. تىپتەن، كەي تۇستارىندا قاعيداتتىق ەرەكشەلىكتەرگە يە. ءوز كەزەگىندە، «نۇر وتاننىڭ» باستى ەرەكشەلىگى - بۇل قۇبىلىستى تىكەلەي قۇرتىپ جويۋدان بۇرىن، پايدا بولۋ جولدارىنا كوپ ءمان بەرەدى»، - دەدى ف. قۋانعانوۆ.

پارتيا حاتشىسىنىڭ پىكىرىنشە، سىبايلاس جەمقورلىق ماسەلەلەرى شەتەلدىك ساراپشىلارمەن دە بىرنەشە رەت تالقىلانىپ، نورۆەگيا، ا ق ش سىندى ەلدەردىڭ تاجىريبەلەرى نازارعا الىنعان.

«شەتەلدەردەگى ج و و-دا جەمقورلىق جوق. ولاردىڭ ستۋدەنتتەرى ەڭ الدىمەن، ءبىلىم الۋعا ىنتالى. ال بىزدىكىلەر بولسا، ديپلوم پاراعىنا ىنتالى. ويتكەنى، وسىنىڭ ءوزى اۆتوماتتى تۇردە كاسىپكە، جۇمىسقا جول اشادى. ال باتىستا بولسا، ديپلومنان بولەك، قانداي دا ءبىر كاسىپ نەمەسە جۇمىسپەن اينالىسۋ ءۇشىن ليتسەنزيا الۋ كەرەك. ونىڭ وزىندە ءار ءۇش جىل سايىن ونى قورعاپ قالۋعا ءتيىسسىڭ. مۇنداي جاعدايدا، باعاعا، ديپلومعا اقشا تولەۋ پايداسىز بولىپ قالادى»، - دەپ ءتۇسىندىردى فارحات قۋانعانوۆ.

وسىلايشا، تەجەۋىش فاكتور پايدا بولادى. ياعني، ونىڭ نەگىزىندە ءبۇتىن ءبىر مادەنيەت جاسالىپ، جەمقورلىققا نولدىك توزىمدىلىك ورتاسى قالىپتاستىرىلادى.

«وسى تاجىريبەنىڭ ءبارىن زەرتتەپ زەردەلەي كەلە، پارتيانىڭ باعدارلاما جوباسىندا نەگىزگى باسىمدىق رەتىندە وعان قارسى قوعامنىڭ بارلىق توپتارىن تارتۋعا باسا ءمان بەرىلدى. ياعني، جەمقورلىقپەن كۇرەسكە ءاربىر ازاماتتى تارتپايىنشا، ناتيجەگە جەتۋ مۇمكىن ەمەس. بۇل پارتيالىق باعدارلامانىڭ نەگىزگى ەرەكشەلىگى»، - دەپ تۇيىندەدى ويىن پارتيا حاتشىسى.

ەسكە سالا كەتەيىك، كەشە استاناداعى س. سەيفۋللين اتىنداعى قازاق اگروتەحنيكالىق ۋنيۆەرسيتەتىندە جاستار ۇيىمدارى كوشباسشىلارىمەن كەزدەسۋ وتكىزىلىپ، وندا 2015 - 2025 - جىلدارعا ارنالعان سىبايلاس جەمقورلىققا قارسى ءىس-قيمىل باعدارلاماسى جوباسى تالقىلاندى.

بۇعان دەيىن حابارلانعانداي، ونى پارتيانىڭ ساياسي كەڭەسىندە قاراستىرۋ جوسپارلانۋدا. باعدارلاما جوباسى بويىنشا پارتيانىڭ وڭىرلەردەگى فيليالدارىنان، ساراپشى قاۋىمداستىق پەن ينتەرنەت قولدانۋشىلاردان 800 گە جۋىق ۇسىنىستار ءتۇستى.