ءماجىلىس دەپۋتاتى ق. سۇلتانوۆ قازاقستاننىڭ مەملەكەتتىلىگىنە قاتىستى ءوز پىكىرىن ءبىلدىردى
«شىندىعىندا قازاقستان تاۋەلسىزدىك العان كۇننەن باستاپ، سول تاۋەلسىزدىككە ءدال بىزدەي قۋانعان ەشكىم بولعان ەمەس. ءبىزدىڭ حالىق ءوز الدىمىزعا ەگەمەن ەل بولدىق دەپ قۋانىپ جاتساق، سىرتتاعى جۇرت «بۇلار ەل بولا ما، بولماي ما» دەپ باقىلاي قاراپ، نەشە ءتۇرلى قاق-سوق اڭگىمەلەردى اراعا تاراتتى. ءسۇيتىپ، ەگەمەندىكتىڭ اۋەل باسىنان ايتىلعان اڭگىمەلەر ءالى دە جالعاسىپ كەلەدى»، - دەدى قۋانىش سۇلتانوۆ.
سونىمەن قاتار، دەپۋتات قازاقستاننىڭ مەملەكەتتىلىگىنە قاتىستى ايتىلىپ جۇرگەن پىكىرلەرگە ءوز كوزقاراسىن بىلدىرە كەلە، ونداي ارانداتقىش سوزدەرگە مىقتى مەملەكەتتىگىمىزدى دالەلدەپ قانا توسقاۋىل قويۋعا بولاتىنىن اتاپ ءوتتى.
«سىرتتاعى ءتۇرلى ساندىراق اڭگىمەنىڭ ارتىنا ىلەسىپ كەتپەۋمىز ءۇشىن ءوزىمىزدىڭ ىشكى ۇلتتىق تۇتاستىعىمىز مىعىم بولۋى كەرەك. ال ءبىزدىڭ ىشىمىزدە ونداي اڭگىمە جوق، وعان جول بەرىلمەيدى دە. جالپى، «قازاقتاردا مەملەكەت بولماعان، ولاردا شەكارا بولماعان» دەگەن اڭگىمە بەكەر. كەرەك دەسەڭىز ارعى عۇنداردان، بەرگى قازاق حاندىعىنان باستاپ، بىزدە شەكارا شارتتى تۇردە قاشاندا بولىپ كەلدى. الايدا، ونداي شەكارانىڭ كۇشى قاي ۋاقىتتا بولادى؟ ونىڭ كۇشى شەكتەسەتىن كورشى مەملەكەتپەن كەلىسىمگە كەلگەندە جانە ول كەلىسىمدەر ب ۇ ۇ- دا بەكىتىلگەندە، شەكارا شارتتى ەمەس زاڭدى بولادى.
ياعني، قازاقستاندا بۇعان دەيىن شەكارا بولدى، ءبىراق كەلىسىم بولعان جوق. ماسەلەن، 1884-جىلى رەسەي مەن قىتاي اراسىندا شەكارا سىزىعى ءوزارا جۇرگىزىلدى، وعان قازاقستان قاتىسپادى. نەگە؟ ويتكەنى، ءبىزدىڭ مەملەكەتتىگىمىز بولمادى، رەسەيدىڭ قۇرامىندا بولدىق. سوندىقتان دا، مەملەكەت بولۋ ءبىز ءۇشىن بارىنەن قىمبات، مەملەكەتتىلىكتى كوزدىڭ قاراشىعىنداي ساقتاۋىمىز كەرەك»، - دەدى قۋانىش سۇلتانوۆ.
«قازاق مەملەكەتى الىپ كەرۋەن بولىپ ءوز جولىمەن ءجۇرىپ كەلەدى، ءوز داڭعىلىن سالىپ كەلەدى. ماڭگىلىك ەل دەگەن ماقسات جولىنا تۇسكەن كەرۋەنبىز»، - دەپ تۇيىندەدى دەپۋتات ءوز ءسوزىن.
اۆتور: قانات مامەتقازى ۇلى
