كوڭىل ايتۋعا كەلگەن قۇداشا ۇيالى تەلەفون ۇرلاپ كەتتى

استانا. قازاقپارات - قىزىلوردادا ءبىر ازاماتشا دۇنيەدەن وتكەن تۋىسىنا كوڭىل ايتىپ بارىپ، ۇيالى تەلەفونىن قولدى قىلامىن دەپ سوتتى بولا جازدادى.

بۇل تۋرالى  قىزىلوردا قالاسى №2- سوتىنىڭ باسپا ءسوز قىزمەتى حابارلادى.

كىنالى ازاماتشا قايتىس بولعان تۋىسىنىڭ ۇيىنە كوڭىل ايتىپ بارىپ، اسحاناسىندا قاراۋسىز قالعان قۇنى 40000 تەڭگە تۇراتىن ۇيالى تەلەفوندى قولدى قىلادى.

الايدا سوت وتىرىسىندا قۇداشا بولىپ كەلەتىن ازاماتشالار ءوزارا ىمىراعا كەلىپ، ءىستى «مەدياتسيا تۋرالى» زاڭعا سايكەس قىسقارتۋ ءۇشىن «داۋدى رەتتەۋ تۋرالى كەلىسىمدى» سوتقا ۇسىنعان.

سوتتالۋشىنىڭ كەلتىرگەن مۇلىكتىك زالالدىڭ ورنىن تولتىرىپ، جابىرلەنۋشىمەن «مەدياتسيا تۋرالى» زاڭنىڭ تارتىبىمەن تاتۋلاسۋىنا بايلانىستى قىلمىستىق ءىستى قازاقستان رەسپۋبليكاسى ق ك-نىڭ 67-بابىنىڭ 1-بولىگىنىڭ نەگىزىندە وندىرىستەن قىسقارتىلۋعا قاۋلى ەتىلگەن.

syrboyi.kz