يماندىلىق يىرىمدەرى
ساپارعا شىققانداردىڭ الدىڭعى لەگىن الماتىداعى ورتالىق مەشىتتە مەككەگە شىعارىپ سالۋ ءراسىمى دە ءوتتى.
«قاجىلىق - ادام ءومىرىن ىزگى باعىتقا وزگەرتەتىن، رۋحاني كەمەلدەنەتىن، يماندىلىقتى ارتتىراتىن قۇلشىلىق. بيىل باس ءمۇفتي ەرجان قاجى مالعاجى ۇلىنىڭ باستاماسىمەن قاجىلىق ميسسياسىنا 30 ادام ءبولىندى. دارىگەرلەرىمىز بەن يمامدارىمىز، قاجىلىق كومپانيا وكىلدەرى بارشاڭىزعا 24 ساعات بويى قىزمەت ەتەدى»، - دەدى قازاقستان مۇسىلماندارى ءدىني باسقارماسى قاجىلىق ميسسياسىنىڭ ءتوراعاسى، اپپارات باسشىسى عىلىمبەك ماجيەۆ.
قۇربان ايت قارساڭىنداعى بۇل ساپاردىڭ ءمانى دە، ماڭىزى دا زور. ميلليونداعان ادام يىق تىرەسىپ، اللا تاعالاعا قۇلشىلىق ەتەدى. ولار ادامزاتتى بىرلىككە، تاتۋلىققا، قامقورلىققا، مەيىرىمدىلىككە شاقىرادى.
قۇربان ايت ارازداسقان اعايىندى تابىستىراتىن، ساۋابى مول ءىس جاساۋعا قۇلشىندىراتىن مەرەكە. سوندىقتان دا بولار، يسلام ءدىنىن ۇستانعان الەمدەگى بارشا قاۋىم جاقسىلىق جاساۋعا، قولىنان كەلگەنشە وزگەلەرگە كومەكتەسۋگە ۇمتىلادى.
جاڭا اقپاراتتارعا قاراعاندا، مەككە قالاسىنىڭ گۋبەرناتورى جانە ورتالىق قاجى كوميتەتىنىڭ باسشىسى ماشالل بين ابداللا جيددا قالاسىنداعى كورول ابدۋلازيز اتىنداعى اۋەجايداعى قاۋىپسىزدىك جانە قوناقجايلىلىق شارالارىن ءوز كوزىمەن كورىپ قايتقان. حانزادا قوناقتاردىڭ ەل اۋماعىنا تابانى تيگەن ساتتەن باستاپ، وتاندارىنا ورالعانعا دەيىنگى ارالىقتا بارلىق جايلىلىق پەن جاقسىلىقتى سەزىنۋلەرى كەرەكتىگىن كەسىپ ايتتى.
مىنە، قاجىلارعا وسىنداي قۇرمەت كورسەتىلىپ جاتىر. ال اسىل ءدىنىمىزدى ارداقتاپ، قۇربان ايت قارساڭىندا جاعىمدى جاڭالىقتارىن جاريا ەتىپ جاتقاندار ءتىپتى كوپ.
ايتالىق...
تۇركيادا قۇران ساباعى ەنگىزىلەدى
«وسى وقۋ جىلىندا تۇركياداعى مەكتەپ رەفورماسى ورتا مەكتەپتەردە يسلام ءدىنى ءبىلىمىن وقىتۋدى ەنگىزۋمەن باستالادى» ، - دەپ جازادى جەرگىلىكتى ب ا ق.
قۇران ساباعىن ەنگىزۋدەن سوڭ اراب ءتىلىن ەكىنشى قولدانىستاعى ءتىل رەتىندە وقۋ باعدارلاماسىنا قوسۋ دا جوسپاردا بار. بۇل باستامالار قاسيەتتى قۇران اياتتارىن مەڭگەرۋ ءۇشىن جاسالىپ وتىر.
سونداي-اق ءبىلىم سالاسىنداعى تاعى ءبىر جاعىمدى جاڭالىق - ءدىني وقۋ ورىندارىن، مەدرەسە ءتامامداعان وقۋشىلار بولاشاقتا مەملەكەتتىك قىزمەتتە جۇمىس ىستەۋىنە جول اشاتىن زايىرلى وقۋ ورىندارىندا، ۋنيۆەرسيتەت، كوللەدجدەردە ءبىلىم الۋىنا مۇمكىنشىلىك جاسالدى (بۇل ۋاقىتقا دەيىن ءدىني مەكتەپتى بىتىرگەن بالالار وزگە ۋنيۆەرسيتەتتەرگە تۇسە المايتىن، تەك قۇران ساباعىنا قاتىستى، ءدىني جوعارى وقۋ ورنىندا عانا ءبىلىمىن جالعاستىرا الاتىن).
ەندى تۇركيانىڭ 8-12 سىنىبىنىڭ بارلىق وقۋشىلارى قاسيەتتى قۇران ساباقتارىن دا وقيدى.
ايتپاقشى، «جاھاندىق گۋمانيتارلىق كومەك» ۇيىمى جومارت مەملەكەتتەردىڭ ءتىزىمىن جاريالاپ، وندا تۇرىك ەلى 3-ورىنعا جايعاستى. وتكەن جىلى بۇل ەل قايىرىمدىلىق شارالارىنا 1,6 ميلليارد دوللار بولگەن).
مۇسىلماندار شەرۋ ۇيىمداستىردى
نيۋ-يوركتەگى مەديسون اۆەنيۋ كوشەسىندە مۇسىلماندار كۇنىنە وراي ءداستۇرلى 29- بەيبىت شەرۋ ۇيىمداستىرىلىپ، وعان ءتۇرلى ەتنيكالىق توپتار دا قاتىستى. ءىس-شارا مۇسىلمان جاماعاتىنىڭ مەديسون اۆەنيۋدە ورنالاسقان مەشىتتە وقىلعان نامازبەن باستالىپ، نيۋ- يورك كوشەلەرىن كەرنەگەن شەرۋگە ۇلاستى.
قالالىق بيلىك وكىلدەرى كوشەلەردەگى كولىك قوزعالىسىن توقتاتىپ، مۇسىلمانداردىڭ بەيبىت شەرۋىنە جاعداي جاساعان. ءتۇرلى ۇلت پەن ۇلىستىڭ باسى قوسىلعان بەيبىت شەرۋگە يمميگرانت مۇسىلماندار ءوز ەلدەرىنىڭ تۋلارىن كوتەرىپ شىقتى.
بەيبىت شەرۋ بارىسىندا مۇسىلماندار جارمەڭكەسى ۇيىمداستىرىلىپ، جۇرتشىلىققا حالال تاعامدار مەن كيىمدەر، سىيلىقتار ۇسىنىلدى.
كاتوليكتەر يسلامعا باس ءيدى
ا ق ش-تىڭ بيۋت قالاسىنداعى كاتوليكتەر شىركەۋىندە يسلام ءدىنى جايىندا اعارتۋشىلىق شارالارى ۇيىمداستىرىلدى.
شىركەۋ جاماعاتى ءدىنتانۋشى عالىم، جورجتاۋن ۋنيۆەرسيتەتىنىڭ حالىقارالىق قاتىناستار پروفەسسورى، يسلام ءدىنى جونىندەگى ساراپشى جون ەسپوزيتونىڭ ءدارىسىن ۆيدەو ارقىلى تىڭداۋ مۇمكىندىگىنە يە بولدى.
اۋليە اننا شىركەۋىنىڭ قىزمەتكەرى مەري جو ماكدونالدتىڭ ايتۋىنشا، مۇنداي شارالار ءدىنارالىق تاتۋلىققا باستاپ، نانىم-سەنىمى وزگە تۇرعىنداردىڭ يسلام ءدىنى جايىندا كوبىرەك بىلۋىنە مۇمكىندىك بەرەدى.
باۋىرلاستار ليگاسى قۇرىلدى
كانادانىڭ ونتاريو شتاتىنا قاراستى ميسسيسسوگا قالاسىنىڭ مۇسىلماندارى فۋتبول وداعىن قۇرىپ، قايىرىمدىلىق ىستەرگە قارجى جيناۋدىڭ تىڭ ءتاسىلىن ويلاپ تاپتى. «ءبىز بەيتانىس ادامدارمەن تانىسىپ، دوستاسىپ، قوعامعا پايدامىزدى تيگىزگىمىز كەلەدى»، - دەيدى باۋىرلاستار ليگاسىنىڭ نەگىزىن قالاعان زاحيد مەرچانت Brampton Guardian اقپارات كوزىنە بەرگەن سۇحباتىندا.
باۋىرلاستار ليگاسى مۇسىلمانداردان جاساقتالعان 6 كوماندادان تۇرادى. كوماندالاردىڭ اتاۋى مۇسىلمان الەمىنە قاستەرلى ابباسيدتەر، ايۋبيدتەر، موعولدار، وسمانلىلار، سەلجۇكتەر جانە سۇلتاندار دەپ اتالادى.
كوماندا تۇگەلى يسلام ءدىنىن قابىلدادى
كامەرۋندىق فۋتبول كومانداسىنىڭ ويىنشىلارى مەن جاتتىقتىرۋشىسى جانە كومانداداعى ءدىني قىزمەتكەر ايەل يسلام ءدىنىن قابىلدادى. بۇل وقيعا دۋبايدا وتكەن دايارلىق جاتتىعۋلار بارىسىندا بولعان.
دۋباي امىرلىگىنىڭ يسلام ىستەرى مەن قايىرىمدىلىق دەپارتامەنتىندە كاليماعا تىلدەرىن كەلتىرگەن اتالمىش 23 كىسىنىڭ مۇنداي شەشىم قابىلداۋىنا يسلام ءدىنىنىڭ بەيبىتشىلىك پەن تىنىشتىققا نەگىزدەلۋى جانە جەرگىلىكتى حالىقتىڭ مەيىرىمدىلىگى مەن قوناقجايلىلىعى سەبەپ بولعان.
«شەتەلدىكتەردىڭ اسىل ءدىنىمىزدى قابىلداۋىنا كوپ جاعدايدا يسلامنىڭ جوعارى ادامگەرشىلىك قۇندىلىقتارى مەن تولەرانتتىلىق قاعيدالارى جانە مۇسىلمانداردىڭ ءوزارا مەيىرباندىعى سەبەپ بولادى» - دەيدى دەپارتامەنت ديرەكتورى حاماد شايباني.
شاريعات پوليتسياسى كوشە كۇزەتەدى
گەرمانيانىڭ ۆۋپپەرتال قالاشىعىندا مۇسىلمان جاستارىنان قۇرالعان «شاريعات پوليتسياسى» پايدا بولدى. جارقىن ءتۇستى جازۋلارى بار ارنايى كيىم كيىنگەن شاريعات پوليتسيانىڭ مۇشەلەرى كەشكىسىن قالاشىقتاعى ءتارتىپتى قاداعالاپ، مەيرامحانا مەن تۇنگى كلۋب ماڭىنداعىلارعا ادەپكە جات قىلىقتار جاساماۋىن ەسكەرتەدى.
وسىلايشا، ولار مۋزىكا قاتتى قويىلىپ، اراق-شاراپ ءىشىلىپ، قۇمار ويىندارى قىزعان جەرلەرگە بارىپ، ولارعا ۋاعىز ايتىپ، ۇگىتتەۋگە كىرىسكەن. ماسەلەن، سۆەن لاۋ ەسىمدى شاريعات پوليتسياسىنىڭ ايتۋىنشا، ول وسىنداي وپا بەرمەيتىن وتىرىستىڭ ەرتەرەك اياقتالۋىنا ۇلەس قوسىپتى.
«جولدا كەزىكتىرگەن ءۇش جىگىت كازينوعا بەت العان ەدى، - دەيدى ول. - قاستارىندا ءبىزدىڭ كەلە جاتقانىمىزعا قاراماستان، ولار ويناۋعا بارا جاتقاندارىن جاسىرمادى. دەگەنمەن، جەمە- جەمگە كەلگەندە، ەكەۋىنىڭ ۇياتتارى ويانىپ، كازينوعا كىرمەي قالدى. ءۇشىنشىسى امالدىڭ جوقتىعىنان سولاردىڭ سوڭىنان ىلەستى. قالاي دەگەندە دە، ءبىز ولاردى بۇرىس جولدان ءبىر رەتكە بولسىن ساقتاپ قالدىق» .
ايەلدەرگە ارنالعان تاكسي بار
نيۋ- يورك قالاسىنىڭ تاكسي ورتالىعى مۇسىلمان جانە يۋدەي قىز-كەلىنشەكتەرىنە ارنالعان جاڭا قىزمەت ءتۇرىن ىسكە قوستى.
«SheRides» ديسپەتچەرلىك قىزمەت ءتۇرى كۇندەلىكتى ومىرلەرىندە بوگدە ادامنىڭ ارالاسۋىنا قارسى ايەلدەر ءۇشىن قۇرىلعان. الايدا، اتالمىش جوبانىڭ تولىق ىسكە قوسىلۋى ءۇشىن ءالى ءبىرقاتار قۇزىرەتتى ورىنداردىڭ رۇقساتى كەرەك كورىنەدى.
ءتۇيىن:
الەمدە تالاي قىزىق بار. ءبىراق سونىڭ بارلىعى ادامزات پەن ونىڭ ۇرپاعىنا تەك جاقسىلىق اكەلىپ جاتسا، نۇر ۇستىنە نۇر. قاسيەتتى قۇربان ايت قارساڭىندا سىزدە جاقسىلىق جاساۋعا اسىعىڭىز، تاتۋلىقتىڭ تاتتىلىگىن، سىيلاستىقتىق سىرى بولەكتىگىن، قامقورلىقتىڭ قانشالىقتى قادىرلى ەكەندىگىن ناسيحاتتاڭىز.
«ايقىن»
