رەسەي ءوز سانكسياسىنا ءوزى ءسۇرىنىپ جاتىر
بۇل تۋرالى ورىستىڭ بەلگىلى ساياساتكەرى، ر ف ۇكىمەتىنىڭ بۇرىنعى باسشىسى ميحايل كاسيانوۆ "ەحو موسكۆى" راديوسىنداعى سۇحباتىندا ءمالىم ەتتى دەپ حابارلايدى "الاش ايناسى".
"رەسەي يمپورت تاۋاردى كوپ تۇتىنادى. ال ەلدەن ۇلكەن سوماداعى قاراجاتتار اعىلىپ كەتىپ جاتقاندا، مۇناي باعاسى قۇلاعاندا وسى باعىتتاعى شىعىن اقشانى ازايتۋ كەرەك، ياعني يمپورتتى. ءبىراق حالىققا "انانى، مىنانى ساتىپ الما" دەپ تاعى بۇيىرا المايسىز. سودان كەيىن باتىس ازىق-تۇلىگىنە تىيىم سالىندى.
سانكسياعا بەرگەن جاۋابىمىز دەپ ءبىر جاعىنان وعان ساياسي رەڭك بەرىپ قويدىق. وسىلايشا قىزىل كرەمل «ەكى قوياندى ءبىر وقپەن اتۋعا» تىرىستى. الايدا ءوزىمىز ەشتەڭە وندىرمەيمىز. ارتىنان، ەرىكسىز يمپورتتى بەلارۋس ارقىلى قابىلداۋعا ءماجبۇر بولدىق. الايدا ۇيات قوي... يمپورت قابىلدامايمىز دەپ بارشاعا جاريا ەتىپ قويدىق. سوندىقتان بەلارۋس تاۋارلىق بەلگىلەرىن سوعىپ، يمپورتتى تەرىسىن اينالدىرىپ قابىلداي باستادىق. ءبىر سوزبەن ايتقاندا، بۇل ارادا كونترابانداعا رۇقسات بەرىلىپ وتىر...
بەلورۋسسيادان ونى ءبىز رۋبلگە ساتىپ الامىز، ال بەلورۋستار بۇل تاۋارلارعا وزىندەگى شەتەل ۆاليۋتاسىن شىعىنداۋى كەرەك. ولار بۇل باعىتقا ءوز اقشالارىن جۇمساپ تا كەلدى. ال ەندى ەستىگەن شىعارسىزدار؟.. ءبىز ولارعا 1 ميلليارد دوللار قوسىمشا نەسيە بەرمەكشىمىز. ويتكەنى لۋكاشەنكو ماسكەۋدى اسىراۋ ءۇشىن نەمەسە يمپورت تاۋارلاردى ءوزى ارقىلى تاسىمالداۋ ءۇشىن ەلىنىڭ ۆاليۋتالىق قورىن جۇمساعىسى كەلمەيدى.
سوندىقتان بۇل ارادا جالپى ماكروەكونوميكالىق جاعدايدى جۇيەلى شەشىمنەن تىس تاسىلدەرمەن ازايتۋعا كۇش جۇمسالىپ جاتقانى انىق كورىنىپ قاپ جاتىر. ال بۇل نە دەگەن ءسوز؟ بۇل بيلىكتىڭ توبە شاشىن ءوزى جۇلا باستاعانىن بىلدىرەدى، ولار نە بوپ جاتقانىن بىلەدى، تۇسىنەدى، ءبىراق ونىڭ شەشىمىن تاپپاي ابدىراپ، جان-جاقتى سيپالاپ، ىزدەنىپ اۋرە. ولار جۇيەلى شەشىمنىڭ ورنىنا جىرتىقتى ودان سايىن ۇلكەيتىپ ، شاراسىزدىق تانىتىپ جاتىر"، - دەگەن م. كاسيانوۆ ءوز سۇحباتىندا.
اۆتور: كامشات ساتيەۆا
