قازاق كۇرەسىنىڭ اتاۋى وزگەرۋى مۇمكىن

استانا. قازاقپارات - قازاق كۇرەسىنىڭ اتاۋى وزگەرۋى مۇمكىن.

بۇل تۋرالى بۇگىن استانادا وتكەن باسپا ءسوز ءماسليحاتىندا ءمالىم بولدى.

«زەرتتەۋ بويىنشا قاراساق، پەتروپاۆل قالاسىندا 1928 - جىلعا دەيىنگى قۇجاتتاردىڭ ىشىندە «قازاق كۇرەسى» دەگەن اتاۋ جوق ەكەندىگىن ايتقىم كەلەدى.

«قازاق كۇرەسى» دەگەن اتاۋ كەزىندە «قازاقشا كۇرەس» بولاتىن.

ال 2000 - جىلدان باستاپ قۇجاتتار «قازاق كۇرەسى» دەپ دايىندالىپ كەلە جاتىر.

اتاپ ايتقاندا، 1928 - جىلعا دەيىنگى قۇجاتتاردا ءبىزدىڭ ەلىمىزدىڭ ىشىندە «كۇرەس»، «بالۋاندىق كۇرەس»، «جەكپە-جەككە شىعۋ»، «كۇش سىناسۋ» دەگەن اتاۋلار كەزىگەدى.

بۇنى ايتىپ وتىرعان سەبەبىم، ەندى ءبىز الەمدىك دەڭگەيگە شىقتىق.

الەمدىك دەڭگەيدە دزيۋدو كۇرەس ءتۇرى بار جانە جەكپە-جەكتەردىڭ اراسىندا تاەكۆوندو، سونداي-اق باسقا دا دودالار بار. بۇلاردىڭ بارلىعى ءبىر ەلدىڭ سپورت ونەرى بولسا دا، ءبىراق سول ەلدىڭ اتىمەن اتالمايدى.

مىسالى، جاپوننىڭ دزيۋدو كۇرەسى دەمەيدى، قىسقا عانا «دزيۋدو» دەپ اتالادى»، - دەدى قازاقتىڭ بالۋاندىق ونەرىن زەرتتەۋشى ەلەمەس ءالىمحانوۆ.

ونىڭ سوزىنە قاراعاندا، الەمدەگى كەيبىر تۇسىنىكتەر مەن تانىمدار اياسىندا قازاق كۇرەسىنىڭ عانا دامۋىنا (وليمپيادا ويىندارىنا ەنگىزۋ بارىسىندا) كەيبىر شەتەلدىك كەدەرگىلەر بار.

«بۇل اتاۋعا بايلانىستى جاقسى ويلاستىرۋ كەرەك دەپ پايىمدايمىن. حالقىمىز ءبىزدىڭ كونە بالۋاندىق ونەردىڭ اتىن قايتارىپ السا»، - دەپ ءتۇيدى ە. ءالىمحانوۆ.

وسى ورايدا ق ر مادەنيەت جانە سپورت ۆيتسە-ءمينيسترى تاستانبەك ەسەنتايەۆ تا ءوز پىكىرىن ءبىلدىردى. «ءار ەلدىڭ ءوزىنىڭ كۇرەسىنىڭ اتاۋى بار. ەندى ءبىز وليمپيادالىق ويىنداردىڭ باعدارلاماسىنا ەنگىزۋ باعىتىندا «قازاق كۇرەسى» دەپ كىرگىزۋ وتە قيىن. سەبەبى، وندا وزبەكتەردىڭ جانە قىرعىزداردىڭ كۇرەسى شىعادى. جالپى بۇل اتاۋدى جايدان-جاي وزگەرتۋ ەمەس، سونىمەن قاتار تەك وليمپيادا ويىندارىنا ەنۋ ءۇشىن وزگەرتەيىن دەپ جاتىرمىز دەگەن دە دۇرىس بولمايدى. باستى سەبەپ - ۇلتتىق كۇرەستىڭ بۇرىنعى تاريحي اتاۋىنا قايتىپ كەلۋ. سوندىقتان ءبىز قازىرگى كەزدە «كۇرەس» دەپ اتايتىن بولساق، مەن ءوز باسىم قولدايمىن. ويتكەنى ءبىزدىڭ كۇرەستىڭ دامۋىنا كوپ جەڭىلدىكتەر تۋادى»، - دەدى ۆيتسە-مينيستر.

ءسوز سوڭىندا ت. ەسەنتايەۆ قازاق كۇرەسىنىڭ اتاۋىنا بايلانىستى عىلىمي تۇردە باعا بەرىلۋى كەرەكتىگىن اتاپ ءوتتى.

اۆتور: مارلان جيەمباي