14:34, 24 - قىركۇيەك 2014 | GMT +5
لاتۆيا قازاقستانمەن ارادا تىكەلەي اۋە رەيسىن اشۋعا نيەتتى
استانا. قازاقپارات - لاتۆيا استانا مەن ريگا اراسىندا تىكەلەي اۋە رەيسىن اشۋعا مۇددەلى. بۇل تۋرالى بۇگىن ەلوردا اكىمى يمانعالي تاسماعامبەتوۆپەن كەزدەسۋى بارىسىندا ريگا قالاسىنىڭ ءمەرى نيل ۋشاكوۆ ايتتى.
لاتۆيا قازاقستانمەن ەكىجاقتى قارىم-قاتىناستاردى ودان ارى دامىتۋعا نيەت تانىتاتىندىعىن باسا ايتقان ول: «ءبىز قازىرگى ۋاقىتتا تىكەلەي اۋە رەيسىن اشۋ ءۇشىن قاجەتتى جۇمىستاردى بارىنشا جانداندىرا تۇسەتىن بولامىز. سونىمەن بىرگە ريگاداعى ەلشىلىكتەرىڭىزدىڭ اشىلۋىن دا اسىعا كۇتەمىز. تىكەلەي اۋە رەيسى مەن ەلشىلىك لوگيستيكا ماسەلەسىن بىردەن مۇلدەم باسقا دەڭگەيگە اۋىستىرار ەدى»، - دەدى.
ونىڭ سوزىنە قاراعاندا، بۇگىندە ريگا تۇرعىندارىنىڭ سانى 700 مىڭعا جەتىپ وتىر. بۇل ەل حالقىنىڭ ۇشتەن ءبىرىن، ال ەڭبەككە جارامدى تۇرعىنداردىڭ 50 پايىزىن قۇرايدى. لاتۆيالىق كاسىپورىنداردىڭ دا 60 پايىزى ءدال وسى قالادا شوعىرلانعان.
اۆتور: مارلان جيەمباي
