07:49, 22 - قىركۇيەك 2014 | GMT +5
بيلىكتى ءبولۋ تۋرالى كەلىسىم بەكىتىلدى
استانا. قازاقپارات - اۋعانستاندا پرەزيدەنتتىك سايلاۋدىڭ ەكىنشى تۋرىنىڭ قاتىسۋشىلارى ابدۋللا ابدۋللا مەن اشراف گاني ۇلتتىق بىرلىكتىڭ ۇكىمەتىن قۇرۋ جانە بيلىكتى ءبولۋ تۋرالى كەلىسىمگە قول قويدى.
BBC-ءدىڭ جازۋىنشا، اۋعان مەملەكەتتىك تەلەارناسى اتالعان سالتاناتتى ءراسىمدى كابۋلداعى پرەزيدەنتتىك سارايدان تىكەلەي ەفير ارقىلى كورسەتۋدە.
قول قويىلعان كەلىسىمگە سايكەس، اشراف گاني پرەزيدەنت لاۋازىمىنا بەكىتىلسە، ال ابدۋللا ابدۋللا مينيسترلەر كابينەتى باسشىسىن تاڭداۋ قۇقىعىنا يە بولادى. بۇل تۇرعىدا ول وسى قىزمەتكە ءوزىن ۇسىنادى دەگەن بولجامدار بار.
پرەزيدەنتتىك سايلاۋدىڭ سوڭعى ناتيجەسى بۇگىن جاريالانادى دەپ كۇتىلۋدە. ەستەرىڭىزگە سالا كەتەيىك، سايلاۋدىڭ ەكىنشى تۋرى 14- شىلدەدە ءوتتى. قوس كانديدات تا ءبىر-ءبىرىن الاياقتىق ارەكەتىمەن ايىپتاپ سايلاۋدىڭ قورىتىندىسىن مويىنداۋدان باس تارتقان ەدى. ەلدەگى ساياسي داعدارىس ءۇش ايدان استام ۋاقىت جالعاستى.
اۆتور: رۋسلان عابباسوۆ
