ەلەكتروندى جايناماز بەينەنۇسقاسىن قوسۋمەن جەتىلدىرىلمەك - كەسكىن

استانا. قازاقپارات - ەلەكتروندى جايناماز ويلاپ تاپقان الماتىلىق ازامات ءوزىنىڭ ونەرتابىسىن ودان ءارى جەتىلدىرمەكشى.

ونىڭ زاماناۋي قۇرىلعىسى نامازدى وقىپ-ۇيرەنۋگە نيەت ەتكەن جاندارعا ارنالعان.

بەس ۋاقىت ناماز بەن ءۇتىر نامازىن وقۋدى ۇيرەتەتىن ەلەكتروندى جاينامازدى ويلاپ تابۋ ءۇشىن الحانباي ساتىبالدى ەكى جىل بويى ەڭبەكتەنگەن.

ونەرتاپقىشتىڭ ءتورت اي بۇرىن جاساپ شىعارعان تۋىندىسىنداعى كىشكەنتاي عانا قۇرىلعىعا نامازدا وقىلاتىن سۇرەلەردىڭ بارلىعى جازىلعان.

«ناماز اراب تىلىندە وقىلادى. سوندىقتان كوپتەگەن كىسىلەر جاتتاي المايدى. ەسىمىزدەن شىعىپ كەتەدى دەيدى. سونى جەڭىلدەتۋ ءۇشىن وسىنداي جايناماز جاسادىق. مۇندا بەس پارىز ناماز بەن ءۇتىر ناماز جازىلعان. ءمۇفتياتتىڭ ساراپتاماسىنان وتكەن. قۇلاققا قۇلاققاپ سالىپ الىپ ىلەسىپ وقي بەرەسىز. قابىلەتىڭىزگە قاراي ۇيرەنگەنگە دەيىن مۇنى پايدالانۋعا بولادى»، - دەيدى الحانباي ساتىبالدى.

زاماناۋي قوندىرعى ورناتىلعان جايناماز اسىرەسە، زاعيپتار مەن ءتىلىنىڭ مۇكىستىگى بار جاندارعا ءتيىمدى ەكەن. ونى ونەرتاپقىش قازاقي ويۋ-ورنەكپەن كومكەرىپ، كورىكتى ەتىپ جاساعان. سونداي-اق كىلەمشەنىڭ كولەمى دە ءبىراز وزگەرتىلىپتى.

«بۇكىل دۇنيەجۇزىلىك ولشەم بويىنشا جاينامازدىڭ ۇزىندىقتارى - 1,10 س م ەتىپ شىعارىلىپ جاتىر. ونىڭ دۇرىس ەمەستىگىنە كوزىم جەتتى دە، 1,40 س م قىلىپ وزگەرتتىك. ءسويتىپ ءبىر جاينامازعا ءۇش ءتۇرلى جاڭالىق ەنىپ وتىر»، - دەيدى ەلەكتروندى جاينامازدىڭ اۆتورى.

وتاندىق ءونىم بولاشاقتا تاعى دا جەتىلدىرىلە تۇسپەك. ياعني، ونەرتاپقىش ناماز وقۋ بارىسىنداعى ءىس-قيمىلداردى دا ۇيرەتۋ ءۇشىن وعان ەكران ورناتىپ، ۆيدەونۇسقاسىن قۇراستىرۋدى قاراستىرىپ جاتىر، دەپ حابارلايدى جەتىنشى ارنا.