قازاق رۋحانياتىنىڭ جوقتاۋشىسى «سەن قازاق» سايتى نەگە جابىق تۇر؟
بۇل قازاق ەلىنىڭ اقپاراتتىق دامۋ جاعىنان الەمدىك كوشتە العاشقى ەلدەردىڭ ءبىرى ەكەنىنىڭ ايقىن كورىنىسى. ءتىپتى، بۇل كوشتەن قازاقستاننان تىسقارى جەرلەردە تۇراتىن قازاقتاردا قالىس قالعان ەمەس. سولاردىڭ ىشىندە ينتەرنەت سايتتارى ەرەكشە دامىعانى - قىتايداعى قانداستارىمىز.
ولاردىڭ ءار ءتۇرلى باعىتتا ەل يگىلىگىنە ارنالعان 50 گە جۋىق سايتى اقىن، اعارتۋشى، قوعام قايراتكەرى قازاقتىڭ قاسقا ماڭداي ازاماتى احمەت بايتۇرسىنوۆ قالىپتاستىرىپ كەتكەن توتە جازۋ ۇلگىسىمەن جارىق كورىپ كەلەدى.
بۇل سايتتاردىڭ مەكەن- جايىن ءار جەردەن جەكە- جەكە ىزدەمەي- اق، مىنا kz321.com- سىلتەمەسىن باسىپ قالساڭىز ايتىپ وتىرعان اڭگىمەمىزدىڭ اقيقاتىنا كوز جەتكىزەسىز. ءار سايتتىڭ توپتاستىرىلعان اتى- ءجونىن انىق كورۋگە بولادى. كەز- كەلگەن بىرەۋىن باسىپ قالساڭىز سول سايتتىڭ وقىرمانى بولدىم دەپ ەسەپتەي بەرىڭىز.
جوعارىدا اتاپ وتكەنىمىزدەي ءار سايت ءار ءتۇرلى باعىتقا ارنالعان. سونىڭ ىشىندە «senkazakh.com» سايتىنىڭ ورىنى ەرەكشە! جالپى شەتتەگى قازاق ءتىلدى سايتتار تۋرالى سۇراساڭىز ەل اۋزىنا بىردەن وسى سايىت ىلىنەدى. ولاي دەيتىنىمىز اتالعان سايت ارقىلى ارعى بەتتەگى قانداستارىمىز اتا- جۇرتىنداعى قىبىر ەتكەن قۇبىلىستىڭ بارلىعىنان قۇلاعدار بولىپ كەلەدى. ال، ءبىز دە وسى اقپارات كوزى ارقىلى سول جاقتاعى قانداستارىمىزدىڭ تۇرمىس- تىرشىلىگىنەن، كۇندەلىكتى ومىرىنەن حاباردار بولىپ وتىراتىنىمىز جاسىرىن ەمەس. ءتىپتى، قانداستارىمىز عانا ەمەس، قىتايدىڭ ىشىندە بولىپ جاتقان كەيبىر ماڭىزدى اقپاراتتاردى دا وسى سايت ارقىلى ەستىپ، بىلەمىز.
سەن قازاق سايتى«Senkazakh.com» سايتى قازاقستان مەن قىتاي قازاقتارى اراسىنداعى اقپارات كوپىرى بولعالى ءبىراز جىل بولىپ قالدى. سوڭعى ۋاقىتتا بۇل سايت ەكى ەل اراسىنداعى اقپارات كوپىرى عانا ەمەس، الەمدەگى قازاقتاردىڭ عالامتورداعى ەڭ ۇلكەن رۋحاني ورداسىنا اينالدى دەسەك ارتىق ايتقاندىق بولماس. بۇلاي ايتۋداعى سەبەبىمىز - سايت تەك توتە جازۋمەن عانا شەكتەلمەي، كيريلشە نۇسقامەن دە جۇمىس ىستەيتىنى. وسىدان بىرەر جىل بۇرىن اتالمىش سايت پروگرامماسىنا توتە- كيريلدى سايكەستىرەتىن قابىلەت قوسىپ، جاڭالىق اشىپ، الەم قازاقتارىنىڭ جازۋ الشاقتىعىنان ءبولىنىپ قالعان اقپارات كەڭىستىگىن تۇتاستىرىپ، تەك قىتاي عانا ەمەس، قازاقستان، رەسەي، قىرعىزستان، وزبەكستان، مۇڭعۇليا، تۇركياداعى قانداستارىمىزدىڭ ءبىر- بىرىمەن رۋحاني توعىسۋ الاڭىن قالىپتاستردى. بۇل سايتتىڭ ەلىمىزدەن تىسقارى جەردە ءومىر ءسۇرىپ جاتقان قانداستارىمىزدى تامىرى ءبىر ۇلتتىق قۇندىلىقتارىن بولىسۋگە، الماستىرۋعا قوسىپ جاتقان ولشەۋسىز ەڭبەگى دەپ باعالاساق ارتىق بولماس.
وسىلاي «Senkazakh.com» سايتى ارقىلى ءار ەلدەگى قانداستار ءبىر- بىرىمەن جۇزبە- ءجۇز جولىقپاسا دا، جۇرەكتەرى، تىلەكتەرى توعىسىپ جاتىر. بۇگىنگى مالىمەتتەرگە سۇيەنسە، سايتقا ءبىر كۇندە 2 مىڭعا جۋىق اقپارات، ماقالا سالىنسا، كورىلىمى جاعىنان ءبىر كۇندىك كورسەتكىشى 100 مىڭنان اسىپ جىعىلادى ەكەن. ال قازىرگە دەيىن قازاق مادەنيەتىنىڭ ءار قىرىنان سىر شەرتەتىن، اقپاراتتىق تانىمدىق مالىمەتتەر 2 ميليونعا جەتسە، تۇراقتى تىركەلۋشىلەرى 60 مىڭ ادامنان اسقان.
سايت قىتاي ەلىندە بولعاندىقتان وزگە ەلدەگى قىتايتانۋشى اۋەسقويلارعا تاپتىرماس اقپارات كوزى بولىپ تۇرعانى ايتپاساق تا تۇسىنىكتى. الايدا، وسىنداي اۋىر جۇكتى ارقالاپ كەلە جاتقان «Senkazakh.com» سايتى سوڭعى كەزدەرى، ناقتىراق ايتساق، تامىزدىڭ ورتاسىنان بۇگىنگە دەيىن بىردە اشىلىپ، بىردە مۇلدەم اشىلماي كەلەدى.
وسىعان بايلانىستى الەۋمەتتىك جەلىلەر ارقىلى سايت جەتەكشىسى اقىتبەك شەريزات ۇلىمەن سويلەسكەن ەدىك. قازىر تەحنيكالىق سەبەپتەرگە بايلانىستى سايتتىڭ توقتاپ تۇرعانىن ايتتى. سونىمەن قاتار سايتتىڭ تاعدىرى جابىلىپ قالۋ قاۋپىندە تۇرعانىن دا جاسىرمادى. بۇگىنگە دەيىن بۇل اقپارات كوزى ەڭبەكقور ۇجىم مۇشەلەرى مەن ءبىرقاتار ۇلتجاندى ازاماتتاردىڭ كومەگىمەن كۇن كورىپ جاتقانىن ايتتى. ارينە، ءبىر سايتتى وسىنداي دەڭگەيگە جەتكىزۋ، ۇستاپ وتىرۋ قانشاما قارجىنى تالاپ ەتەتىنى تۇسىنىكتى.
ەگەر، قىتايداعى قانداستارىمىزدىڭ باستى اقپارات كوزىنە اينالعان «Senkazakh.com» سايتى ءومىر ءسۇرۋىن توقتاتاتىن بولسا، ونسىز دا شۇبارلانىپ بارا جاتقان ونداعى ۇرپاقتاردىڭ ءتىلى دە بىرگە جوعالارى ءسوزسىز. بۇل سايت ەكى ەل اراسىنداعى اقپارات كوپىرى عانا ەمەس، سول جاقتاعى قانداستارىمىزدىڭ تىلدىك قورىنىڭ دا التىن باستاۋى ەكەنىن ەستەن شىعارماعانىمىز ابزال.
ءيا، «Senkazakh.com» سايتى ءدال ءقازىر وندىرىستىك بايلانىستان اجىراپ تۇر. مۇمكىن، ەكونوميكالىق قيىنشىلىق، مۇمكىن، بەلگىسىز قوعامدىق قىسىم سالدارىنان، نەمەسە باسقالاي سەبەپتەرگە بايلانىستى ەسىگىن جاۋىپ تاستاعان بولار. الايدا، ونداعى الاش اماناتىنا قيانات جاسامايتىن باتىر باۋىرلارىمىز اتالمىش اقپارات كوزىنىڭ ەسىگىن قايتادان ايقارا اشادى دەگەن سەنىمدەمىز.
شەتتەگى ءبىر قازاق بالاسى جەتىستىككە جەتسە، ءبىزدىڭ دە مەرەيىمىز تاسىپ، ابىرويىمىز اسىپ جاتادى. كەرىسىنشە، كەلەڭسىز وقيعالاردى ەستىگەندە كوڭىلىمىز ءپاس تارتىپ قالادى. مىنە، الەم قازاقتارى اراسىنداعى اقپاراتتىڭ التىن كوپىرىنە اينالعان «Senkazakh.com» سايتىنىڭ باسىنا «قاۋىپ ءتونىپ تۇر» دەگەندى ەستىگەندە جابىرقاپ قالعانىمىز شىندىق. بۇل سايتتى الىستاعى اعايىندارىمىز اشسا دا، قازاق تىلىندە، قازاقتىڭ وركەنيەتىنە ەڭبەك ەتىپ جاتقانى ءۇشىن قازاق باسپا ءسوزىنىڭ ءبىر بۇتاعى دەپ ەسەپتەيىك اعايىن. ال بۇتاقتى سىندىرىپ الۋ ءار ءبىر قازاق ازاماتىنا سىن...
مۇرات الماسبەكوۆ، جۋرناليست، استانا قالاسى
