رەسپۋبليكالىق «التىن قالام» تاۋەلسىز ادەبي بايقاۋى مارەگە جەتتى
بايقاۋدا قاتىسۋشىلار:
«جىلدىڭ ەڭ ۇزدىك پوەزياسى»
«جىلدىڭ ەڭ ۇزدىك پروزاسى»
«جىلدىڭ ەڭ ۇزدىك دراماتۋرگياسى»
«جىلدىڭ ەڭ ۇزدىك بالالار شىعارماسى»
«قازاق ادەبيەتىنە قوسقان ەلەۋلى ەڭبەگى ءۇشىن» نوميناتسيالارى بويىنشا ءوزارا سىنعا ءتۇستى.
رەسپۋبليكالىق «التىن قالام» ادەبي بايقاۋى 2010 - جىلدىڭ مامىر ايىنان باستاپ وتكىزىلىپ كەلەدى. دارىندى قالامگەرلەردى قولدايتىن «التىن قالام» بايقاۋى - قۋات دومباي، دوسىم ساتپايەۆ، راسۋل جۇمالى، ەربول جۇماعۇلوۆ، ايدوس سارىم جانە كەنجە جۇمان ۇلى سياقتى قوعامنىڭ ءار سالاسىندا وزىندىك قولتاڭباسىن قالدىرىپ جۇرگەن ازاماتتاردىڭ يدەياسى. كەز كەلگەن ادام تانىمالدىلىعىنا، كاسىبي دايىندىعىنا، شىعارماشىلىق وداقتارداعى مۇشەلىگىنە، مەكەنجايىنا جانە ت. ب جاعدايلارعا قاراماستان، جۇلدەگە قاتىسۋعا قۇقىلى. ادەبي بايقاۋدىڭ نەگىزگى ماقساتى - رۋحاني-مادەني قۇندىلىقتاردى دامىتا وتىرىپ، جاس تالانتتاردى حالىققا كەڭىنەن تانىستىرۋ. جۇلدەگە جولدانعان شىعارمالاردىڭ بارلىعى «ادەبيەت پورتالىندا» جاريالاندى. وقىرماندار ءاربىر قاتىسۋشىنىڭ شىعارمالارى جاريالانعان پاراقشاسىن اشىپ، كونكۋرس ماتەريالدارىمەن تانىسىپ، داۋىس بەردى.
سونىمەن جەڭىمپازداردىڭ تۇعىرىنان مىنا شىعارمالار وق بويى وزىپ شىقتى:
«جىلدىڭ ەڭ ۇزدىك پوەزياسى» اتالىمى بويىنشا «جول» ولەڭىمەن ورازبەك ساپارحان جەڭىمپاز اتانسا، «جىلدىڭ ەڭ ۇزدىك پروزاسى» اتالىمى بويىنشا «مۇڭلىق» اڭگىمەسىمەن ساكەن سىبانباي، «جىلدىڭ ەڭ ۇزدىك دراماتۋرگياسى» اتالىمى بويىنشا اقىلبەك شاياحمەتتىڭ «زاۆەشانيە يبرايا» شىعارماسى، «جىلدىڭ ەڭ ۇزدىك بالالار شىعارماسى» اتالىمى بويىنشا بوتاكوز جالماعانبەتوۆا «كيىز ءۇي» تۋىندىسىمەن، «قازاق ادەبيەتىنە قوسقان ەلەۋلى ەڭبەگى ءۇشىن» اتالىمىمەن اقىن ەسەنعالي راۋشانوۆ ۇزدىكتەردىڭ ۇزدىگى اتاندى.
قالامگەرلەردىڭ ەڭبەگى وسىنداي جوعارى ماراپاتقا لايىق دەپ تانىلدى. ادەبيەت تاريحىنىڭ تاعى ءبىر پاراعىنا جازىلعان ەسىمدەردى ءبىز دە قۇتتىقتايمىز.
ورازبەك ساپارحاننىڭ جۇلدەلى ولەڭى:
جول
سەكىلدەنگەن ءار قازاقتىڭ ارمانى،
تارام- تارام الماتىنىڭ جولدارى.
قايدا بارساڭ سوندا اپارار جولدار كوپ،
جاڭىلىسىپ اداسپاساڭ بولعانى.
بازارعا دا،
مازارعا دا، ەنەسىڭ...
مەشىتتەر دە كورسەتەدى توبەسىن.
شىعىسقا دا، باتىسقا دا بار شيىر،
ال، سەن ءوزىڭ قايسى جولمەن كەلەسىڭ؟!
شىركەۋگە دە، كلۋبقا دا باراسىڭ،
ارالاساڭ الماتىنىڭ قالاسىن.
ءبىر جولمەنەن تاقيالى اقساقال،
وقۋعا اكەپ تاپسىرادى بالاسىن.
شەتەلدەرگە كەتەتۇعىن ارى اسىپ،
جاتىر سودان قاي قازاقتىڭ باعى اسىپ.
كوشەدە ءجۇر جول سۇراعان سان قازاق،
كوپ جولداردىڭ كەسىرىنەن اداسىپ.
تولى جولدار مۇددەلەر مەن جارىسقا،
ال سەن دە شاپ، تۋرا جولدان قالىسپا.
وسى جولدار جىم- جىلاس بوپ جىمپيىپ،
باستاپ جاتىر قىتايعا دا، ورىسقا.
اۋەدەن دە،
جاياۋلاتىپ جەردەن دە،
الماتىعا كەلىمسەكتەر كەلگەن دە.
تولتىرعاسىن ءتوسىمىزدى وردەنگە،
اعالار عوي سول جولدى اشىپ بەرگەن دە.
بازارعا دا،
مازارعا دا...
ەنەسىڭ...
كولىكتىلەر كورسەتەدى توبەسىن.
شىعىسقا دا، باتىسقا دا بار شيىر،
ال، سەن ءوزىڭ قايسى جولمەن كەلەسىڭ؟!
