حالىق قالاۋلىسى ورالماندار ماسەلەسىن قولعا الۋ كەرەكتىگىن العا تارتتى
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر پارلامەنتى ءماجىلىسىنىڭ دەپۋتاتى، «نۇر وتان» پارتياسى پارلامەنتتىك فراكتسياسىنىڭ مۇشەسى نۇرتاي ءسابيليانوۆ ءمالىم ەتتى.
ونىڭ ايتۋىنشا، 5 - سايلانىمداعى ق ر پارلامەنتىنىڭ 4- سەسسياسىنىڭ اشىلۋىندا مەملەكەت باسشىسى دەپۋتاتتار الدىنا ءبىرقاتار ماڭىزدى تاپسىرمالار قويدى. سونىڭ ءبىرى حالىقتىڭ كوشى- قون ماسەلەلەرى تۋرالى زاڭ جوباسىن باسىمدىقتى تۇردە قابىلداۋ جانە ۇكىمەتكە وسى زاڭدى اعىمداعى جىلدىڭ سوڭىنا دەيىن پارلامەنتتىڭ قاراۋىنا ەنگىزۋدى تاپسىردى.
«قازاقستان حالقىنىڭ جالپى سانىنىڭ وسۋىنە قاراماستان، جەكەلەگەن وڭىرلەردە تۇرعىنداردىڭ سانى ازايعان. ماسەلەن، سوڭعى 10 جىلدا سولتۇستىك قازاقستان وبلىسىنىڭ تۇرعىندارى - 100 مىڭ ادامعا، شىعىس قازاقستان وبلىسىنىڭ تۇرعىندارى - 60 مىڭ ادامعا، قوستاناي وبلىسىنىڭ تۇرعىندارى - 35 مىڭ ادامعا، اقمولا وبلىسىنىڭ تۇرعىندارى - 15 مىڭ ادامعا ازايعان ەكەن. تۇرعىنداردىڭ بىركەلكى ەمەس كوشىپ- قونۋى جانە قازاقستاننىڭ جەكەلەگەن وڭىرلەرىندە ەكونوميكالىق تۇرعىدان بەلسەندى ازاماتتاردىڭ ورنى تولماۋى ماسەلەسى جۇمىس كۇشىنىڭ تاپشىلىعى، مەكتەپتەردىڭ جابىلۋى جانە دە سونىڭ سالدارىنان ەلدى مەكەندەردىڭ جويىلۋىنا الىپ كەلۋدە» ، - دەپ اتاپ ءوتتى دەپۋتات.
ونىڭ ايتۋىنشا، ءبىر عانا شىعىس قازاقستان وبلىسىندا سوڭعى 5 جىلدا 70 تەن استام مەكتەپ جابىلعان. «بۇل - 70 كە جۋىق ەلدى مەكەن جويىلۋى مۇمكىن دەگەن ءسوز» ، - دەيدى حالىق قالاۋلىسى.
مۇنداي ماسەلەنىڭ الدىن الۋ جولدارىن ايتا كەلە، حالىق قالاۋلىسى ورالماندار ماسەلەسىن قولعا الۋ كەرەكتىگىن العا تارتتى.
«وسىعان بايلانىستى، مەملەكەت تۇراقتى تۇردە تۇرۋعا كەلگەن جانە مەملەكەتتىك ورگاندار بەلگىلەگەن ناقتى وڭىرلەرگە جىبەرىلگەن ورالماندارعا قولداۋ كورسەتۋگە ءتيىس. ياعني ولاردىڭ ازاماتتىق الۋىنا جاعداي جاساۋ، ۇيمەن قامتۋ جانە دە ولاردى وسى قوعامنىڭ ازاماتتارى رەتىندە قولداۋ كورسەتۋ. جۇمىسقا تۇرۋىنا، كاسىپكەرلىكپەن اينالىسۋىنا جاعداي جاسالۋى كەرەك دەپ ويلايمىن» ، - دەدى ن. ءسابيليانوۆ.
اۆتور: ءابۋ- اسقار مەكەش ۇلى
