ەۋروكوميسسيا ۋكرايناداعى جاعدايدى بەيبىت جولمەن شەشۋگە شاقىردى
جۋىردا مينسكىدە وتكەن كەلىسسوزدەر بارىسىندا قازاقستان پرەزيدەنتى ن. نازاربايەۆتىڭ ۋكراينا باسشىسىن ىمىراشىلدىققا ىڭعاي بەرۋگە جانە الەمدىك قاۋىمداستىقتى ەلگە گۋمانيتارلىق كومەك كورسەتۋگە شاقىرعانى بەلگىلى. سامميت بارىسىندا ەۋروكوميسسيا ءتوراعاسى جوزە مانەۋل باروزۋ دە وسى باستامالارعا ءۇن قوستى.
مينسكىدە وتكەن كەزدەسۋ مەن ەۋرووداق ءسامميتىنىڭ كوزدەگەنى - ءبىر. ول - ۋكراينادا قالىپتاسقان احۋالدى بەيبىت جولمەن رەتتەۋ.
كەزدەسۋدە ەۋروكوميسسيا ءتوراعاسى جوزە مانۋەل بارروزۋ: «گۋمانيتارلىق جاعداي ۋكراينانىڭ تاۋەلسىزدىگىن قۇرمەتتەي وتىرىپ، شۇعىل حالىقارالىق كومەك كورسەتۋدى قاجەت ەتەدى. ەۋرازيالىق ۇشتىك باسشىلارى سياقتى بريۋسسەلدەگى سامميتكە قاتىسۋشى ەلدەر دە ۋكرايناداعى جانجالدى ساياسي جولمەن شەشۋ قاجەت دەپ ەسەپتەيدى. ەۋرووداق باسشىسىنىڭ پىكىرىنشە، بۇل - باستى ماسەلەنىڭ ءبىرى»، - دەپ پىكىر ءبىلدىردى.
جوزە مانۋەل بارروزۋ تاعى ءبىر سوزىندە: جاعداي ودان ءارى ۋشىقسا، قالىپتاسقان احۋالدى رەتتەۋ وڭاي بولمايدى. سول سەبەپتى مۇددەلى تاراپتاردى كەش بولماي تۇرعاندا، ساياسي شەشىمگە كەلۋگە شاقىرامىن، - دەدى.
ەۋروكوميسسيا ءتوراعاسى ۋكراينا پرەزيدەنتى پوروشەنكوعا ايماقتاعى بەيبىتشىلىكتى قايتارۋعا قولدان كەلگەننىڭ ءبارىن جاساۋ كەرەكتىگىن باسا ايتتى. ءوز كەزەگىندە پوروشەنكو دا: ءبىز جانجالدى قارۋدىڭ كۇشىمەن شەشە المايتىنىمىزدى جاقسى تۇسىنەمىز. قازىر ەڭ باستىسى - بەيبىت ءومىر ورناتۋ. ەۋروپاداعى قاۋىپسىزدىك جانە ىنتىماقتاستىق ۇيىمى (ە ق ى ۇ)، رەسەي جانە ۋكراينا باسشىلارىنىڭ الداعى كەزدەسۋى وڭ ناتيجە بەرەدى دەپ سەنەمىن، - دەدى.
ەۋروكوميسسيا ءتوراعاسى قازاقستان پرەزيدەنتى ن. نازاربايەۆتىڭ الەمدىك قاۋىمداستىقتى ۋكرايناعا كومەك كورسەتۋگە شاقىرعان باستاماسىنا قولداۋ بىلدىرۋگە دايىن ەكەندىكتەرىن ايتتى: «ەۋرووداق اسكەري قاقتىعىستاردان زارداپ شەككەندەرگە قوسىمشا 2,5 ميلليون ەۋرو بولەدى. سونىمەن قاتار نەسيە تۇرىندە 500 ميلليون ەۋرو جانە گرانت ەسەبىندە 250 ميلليون ەۋرو ءبولۋ قاراستىرىلدى. دۇنيەجۇزىلىك ۆاليۋتا قورىمەن كەڭەسكەننەن كەيىن نەسيە تۇرىندە تاعى 1 ميلليارد ەۋرو بولۋگە دايىنبىز. ەۋرووداق ءسامميتى مينسكىدە وتكەن كەزدەسۋدىڭ زاڭدى جالعاسى بولدى دەسەك، ارتىق ايتقاندىق ەمەس. ويتكەنى ەۋرووداق باسشىلارىنىڭ پىكىرىنشە، ۋكرايناداعى احۋالدىڭ بۇكىل الەم قاۋىپسىزدىگىنە قاتىسى بار».
