بەيبىت شەشىمگە كەلۋ تۋرالى پوروشەنكومەن ارادا كەلىسىم بار - ۆ.پۋتين

استانا. قازاقپارات - رەسەي پرەزيدەنتى ۆلاديمير پۋتين مەن ۋكراينا باسشىسى پەتر پوروشەنكو ۋكرايناداعى جاعدايدى كەلىسسوزدەر ارقىلى بەيبىت جولمەن شەشۋگە جانە بيلىكتى كۇشپەن باسىپ الۋ سياقتى قاتەلىكتەردىڭ قايتالانبايتىنىنا كەلىستى.

بۇل تۋرالى ۆ.پۋتين «ءبىرىنشى ارناداعى» «جەكسەنبىلىك ۋاقىت» حابارىندا بەرگەن سۇحباتىندا مالىمدەدى، دەپ حابارلادى «جاڭالىقتار» ر اا.

«مەنىڭشە، بۇل بارلىعىمىز ءۇشىن ساباق بولدى. بۇل قاسىرەتتى تەزىرەك بەيبىت جانە كەلىسسوزدەر ارقىلى اياقتاۋ ءۇشىن ءبىز پەتر الەكسەەۆيچپەن كەلىستىك. سونىمەن قاتار، ەشكىم دە، ەشقاشان دا مۇنداي قاتەلىكتى قايتالاماۋ كەرەكتىگىن ءسوز ەتتىك، ويتكەنى قازىر ۋكراينادا بولىپ جاتقان جاعدايدىڭ بارلىعى بيلىكتى قارۋلى كۇشپەن باسىپ الۋدان باستالعان»، - دەدى ۆ.پۋتين.