ۋكرايناداعى جاعداي شيەلەنىسە ءتۇستى

استانا. قازاقپارات - ناتو بۇگىن بريۋسسەلدە شىعىس ۋكرايناداعى جاعدايدى تالقىلايتىن جيىن وتكىزبەك. بۇل ۇيىم ۋكرايناعا رەسەيدىڭ مىڭ شاقتى جاۋىنگەرى كىرگەنىن مالىمدەدى. ال رەسەي پرەزيدەنتى پۋتين ۋكرايناداعى كوتەرىلىسشىلەرگە ۇندەۋ جاريالادى.

كەشە ناتو رەسەي جاۋىنگەرلەرىنىڭ ۋكرايناعا كىرگەنىن دالەلدەيتىن سپۋتنيك فوتوگرافيالاردىڭ بار ەكەنىن حابارلادى.

ناتو شتابىنىڭ گەنەرالى نيكو تاك رەسەيدىڭ «استىرتىن ارەكەتتەرى كۇن وتكەن سايىن ايقىن كورىنىپ كەلەدى» دەپ مالىمدەدى.

ونىڭ پىكىرىنشە «رەسەي تاكتيكاسى - سەپاراتيستەردىڭ جەڭىلۋىنە جول بەرمەي، ۋكراينانىڭ شىعىسىنداعى قاقتىعىستى شەشىلمەيتىن بىتەۋ جاراعا اينالدىرۋ، سول ارقىلى بۇل ەلدەگى داعدارىستى سوزا ءتۇسۋ».

ا ق ش، ب ۇ ۇ، گەرمانيا جانە فرانسيانىڭ رەاكتسياسى

ا ق ش پرەزيدەنتى باراك وباما دا تامىزدىڭ 28 ءى كۇنى رەسەيدى «ۋكرايناداعى سەپاراتيستەردى دايىنداپ، قارجىلاي قولداپ، قارۋلاندىرىپ وتىر» دەپ ايىپتادى. وباما «ۋكراينادان تۇسىرىلگەن رەسەي جاۋىنگەرلەرىنىڭ سپۋتنيكتەن تۇسىرگەن سۋرەتتەرى كرەملدىڭ بۇل ارەكەتتەرىن اشكەرەلەپ وتىر»، - دەيدى.

ۋكرايناعا كىرگەن رەسەي اسكەرى دەپ جاريالاعان ناتو سۋرەتتەرى.

ءبىراق ول «ا ق ش-تىڭ ۋكرايناداعى ۇرىستارعا ارالاسپايتىنىن» ايتتى.

وباما گەرمانيا كانتسلەرى انگەلا مەركەلمەن سويلەسكەنىن، رەسەيدىڭ ءوز ارەكەتتەرىنە جاۋاپ بەرۋى ءتيىس ەكەنىنە مەركەلدىڭ دە كەلىسكەنىن مالىمدەدى.

تامىزدىڭ 28 ءى كۇنى ب ۇ ۇ قاۋىپسىزدىك كەڭەسى دە شۇعىل جيىن وتكىزدى. ب ۇ ۇ- داعى باتىس ەلدەرى وكىلدەرى رەسەيدىڭ كەيىنگى ارەكەتتەرىنە نارازىلىق ءبىلدىردى. وسى ۇيىمداعى ا ق ش ەلشىسى سامانتا پاۋەردىڭ پىكىرىنشە، رەسەي ۋكرايناعا باسقىنشىلىعىن «جاسىرىپ، مويىنداماي وتىر». ول ا ق ش پەن «ۇلكەن جەتىلىك» (G7) جانە ەۋروپا ەلدەرى «رەسەيدىڭ ارەكەتتەرىن توقتاتۋعا تىرىساتىنىن» ايتتى.

فرانسيا بيلىگى دە رەسەي ۋكرايناداعى جاعدايدى ودان بەتەر شيەلەنىستىرە بەرسە، جاڭادان قاتاڭ سانكتسيالار سالاتىنىن ەسكەرتتى.

پۋتيننىڭ كوتەرىلىسشىلەرگە ۇندەۋى

رەسەي پرەزيدەنتى ۆلاديمير پۋتين «نوۆوروسسيا جاساقتارىنا ۇندەۋ» جاريالادى. رەسەي پرەزيدەنتىنىڭ رەسمي سايتىنا بۇل ۇندەۋ تامىزدىڭ 29 ىنا اۋعان ءتۇنى ساعات بىرلەر شاماسىندا ىلىنگەن.

ۇندەۋدە «كوتەرىلىسشى جاساقتاردىڭ كيەۆتىڭ اسكەري وپەراتسياسىن تويتارۋدا ۇلكەن جەتىستىكتەرگە جەتكەنى»، ءبىراق ول وپەراتسيالاردىڭ دونداسس تۇرعىندارىنا قاسىرەت اكەلگەنى، كوپتەگەن بەيبىت ادامداردىڭ قازا تاپقانى جازىلعان.

ۋكراينامەن شەكارالاس روستوۆ وبلىسىندا كەتىپ بارا جاتقان اسكەري كولوننا. رەسەي، 28- تامىز 2014-جىل.

رەسەي پرەزيدەنتى «ۋكراينا جاۋىنگەرلەرىنىڭ كوبى قورشاۋدا قالعانىن» مالىمدەپ، كوتەرىلىسشى جاساقتاردى «ولارعا قورشاۋدان شىعاتىن ءدالىز بەرۋگە، سول ارقىلى ۋكراينا جاۋىنگەرلەرىنىڭ وتباسىلارىمەن تابىسۋىنا جاعداي جاساۋعا، جارالانعاندارىنا دارىگەرلىك كومەك كورسەتۋگە» شاقىرعان. پۋتين «رەسەيدىڭ دونداسس حالقىنا گۋمانيتارلىق جاردەم جەتكىزەتىنىن ايتىپ، ۋكراينا بيلىگىن كوتەرىلىسشىلەرمەن كەلىسسوزدەردى باستاۋعا شاقىرعان.

رەسەيدىڭ ب ۇ ۇ-داعى ەلشىسى ۆيتالي چۋركين ۋكرايناداعى قاقتىعىستارعا رەسەي ازاماتتارىنىڭ قاتىسىپ جاتقانىن تەرىسكە شىعارمايدى، ءبىراق ولاردى «ەرىكتىلەر» دەپ اتايدى.

كيەۆ مالىمدەمەلەرى

28- تامىز كۇنى ۋكراينا بيلىگى «رەسەي اسكەرىنىڭ تانكىلەر كومەگىمەن شەكاراعا تاياۋ نوۆوازوۆسك قالاسىن باسىپ العانىن» حابارلادى. كيەۆتىڭ بولجامى بويىنشا، «ماسكەۋگە قىرىمعا باراتىن قۇرلىق جولى كەرەك، سوندىقتان كرەمل قارا تەڭىز جاعالاۋىنداعى ماريۋپول قالاسىن باسىپ الۋدى جوسپارلاۋى مۇمكىن». رەسەي قىرىمدى ناۋرىز ايىندا اننەكسيالاعان ەدى.

ۋكراينانىڭ نوۆوازوۆسك قالاسىنىڭ ماڭىندا جۇرگەن ۋكراينا جاۋىنگەرلەرى. دونەتسك وبلىسى، 27- تامىز 2014 -جىل.

ۋكراينا قاۋىپسىزدىك كۇشتەرىنىڭ باسپا ءسوز حاتشىسى اندرەي لىسەنكو ۇكىمەتتىڭ ماريۋپولدى قورعاۋ ءۇشىن اسكەر شوعىرلاندىرىپ جاتقانىن حابارلادى. ونىڭ سوزىنە قاراعاندا رەسەيدىڭ قىرىمداعى اسكەرى دە بەلسەنە باستاعان - ۋكراينا ارمياسى حەرسون وبلىسىنا كىرمەك بولعان رەسەيلىك شولعىنشى جاۋىنگەرلەردى بايقاعان.

ۋكراينانىڭ شىعىسىنداعى ۇكىمەت اسكەرى مەن رەسەيشىل سەپاراتيستەر اراسىنداعى قاقتىعىس، ماسكەۋ بۇل ەلدىڭ قىرىم تۇبەگىن اننەكسيالاپ العاننان كەيىن، ءساۋىر ايىندا باستالعان ەدى.

«الاش ايناسى»