قاجىمۇقان بابامىزدى قورلاعانى - قازاقتى قورلاعانى

استانا. قازاقپارات- ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ نازارىنا اشىق حات. بۇل اشىق حاتتى ءسىزدىڭ نازارىڭىزعا الماتى قالاسىنداعى قازاق سپورت جانە تۋريزم اكادەمياسىنىڭ ۇلتتىق سپورت تۇرلەرى كافەدراسىنىڭ ۇستازدار قاۋىمى مەن ستۋدەنتتەرى جانە ماسكەۋ وليمپياداسىنىڭ چەمپيونى جاقسىلىق ۇشكەمپىروۆ باستاعان سپورت ارداگەرلەرى جولداپ وتىر.

 اتالعان حاتتى جازۋعا حالىقارالىق «قازاقستان- زامان» گازەتىنىڭ 32- نومىرىندە جاريالانعان (14- تامىز 2014 - جىل) «قاجىمۇقان بابامىزدى قورلاعانى - قازاقتى قورلاعانى» اتتى ماقالا تۇرتكى بولدى.

وسى ماقالادا اۆتور ەرتاي ايعالي ۇلى: «جاقىندا ورىستار «يۆان پوددۋبنىي» اتتى فيلم ءتۇسىرىپ، ءبىزدىڭ بابامىزدى قورلاعانداي بولدى. وندا تۇرىكتىڭ پالۋانى حادجيمۋحاندى پوددۋبنىي باسىنان اينالدىرا جەرگە قاداپ، جۇلىنىن ۇزەدى. بۇل قاجىمۇقان بابامىزدى عانا ەمەس، ءبىزدىڭ ۇلتتىق رۋحتى تابانعا سالىپ جانىشتاعانداي بەينەكورىنىس» ، - دەپ اشىنا جازعان- دى.

شىنىندا دا، مۇنى تاريحي فاكتىنىڭ ءوڭىن اينالدىرىپ، بولماعان نارسەنى بولدى دەپ كورسەتۋ ارقىلى ۇلتىمىزدىڭ ماقتانىشى قاجىمۇقان اتامىزدىڭ عانا ەمەس، كۇللى قازاق جۇرتىنىڭ ار- نامىسىن اياققا باسىپ، كوپە- كورنەۋ قورلاۋ دەپ تۇسىنگەن ءجون. اتاقتى پالۋان اتامىزدىڭ سپورتتىق جولىن باستاعان بالاڭ كەزىندە وزىنەن ءبىر مۇشەل جاس ۇلكەن، كوزىنىڭ تىرىسىندە «چەمپيونداردىڭ چەمپيونى» دەگەن اتاققا يە بولعان ي. پوددۋبنىيدان جەڭىلگەنى راس تا بولار، ءبىراق، ودان جۇلىنى ۇزىلمەگەنى حاق. ەگەر ورىس كينوشىلارى كورسەتكەندەي بابامىزدىڭ جۇلىنى ۇزىلسە، ول ەكىنشى دۇنيەجۇزىلىك، ۇلى وتان سوعىسىنا كۋا بولىپ، ءوزى جيناعان قاراجاتقا ۇشاق جاساتقىزار ما ەدى؟

 سوسىن، ي. پوددۋبنىي ۋكراين، قاجىمۇقان قازاق بولعانىمەن، كەزىندە فرانسۋز جانە امەريكان كۇرەستەرى بويىنشا پاتشالى رەسەيدىڭ نامىسىن قورعاعان ەدى عوي. ءتىپتى جاپوندىق پالۋان ساراكيكي دجيندوفۋمەن دجيۋ- دجيتسۋ كۇرەسى بويىنشا بوزكىلەمدە بەلدەسىپ، ولمەي بەرىسپەيتىن كۇرەستە جاراقات العان دا وسى ءبىزدىڭ نامىسقوي بابامىز ەدى عوي. سوندىقتان ءبىز مينيسترلىكتىڭ رەسەيلىك ارىپتەسىنىڭ اتىنا تالاپحات جولداپ، كينوداعى ۇلتتىڭ ار- نامىسىنا تيەتىن ناق وسى جەرىن ويىپ تۇرىپ الدىرتىپ تاستاۋعا كۇش سالۋى قاجەت دەپ سانايمىز.

ءبىزدىڭ كينوشىلار دا «قاجىمۇقان» اتتى فيلم تۇسىرگەن. ءبىراق، وندا تاريحي دەرەكتەر بۇرمالانباي، قاجەكەڭ يۆان ماكسيموۆيچ پوددۋبنىيدى ءوزىنىڭ ۇستازى، جاسى ۇلكەن اعاسى رەتىندە سىيلاپ وتكەنى جاقسى كورسەتىلگەن. تاريحي دەرەكتەرگە جۇگىنسەك، قاجىمۇقان اتامىز سوعىس كەزىندە قاتتى قيىنشىلىق كورگەن پوددۋبنىيعا اقشالاي كومەك كورسەتىپ وتىرسا، پوددۋبنىي ءبىر ستانيتسانى اسىراعان.

 اتىن جالپاق الەمگە جايعان پاتشالى رەسەي مەن ونىڭ مۇراگەرى ك س ر و پوددۋبنىيعا «ك س ر و- عا ەڭبەگى سىڭگەن ءارتىس» اتاعىن بەرسە، مۇنداي باقىتقا بابامىزدىڭ قولى جەتپەي كەتتى. بالكىم، بۇراتانا حالىقتىڭ وكىلى دەپ كەمسىتكەندىكتەن بولار. وسى ولقىلىقتىڭ ورنىن تولتىرىپ، ءبىز بابامىزعا «حالىق قاھارمانى» قۇرمەتتى اتاعىمەن قوسا «قازاقستانعا ەڭبەگى سىڭگەن ءارتىس» اتاعىن بەرسەك، بابامىزدىڭ رۋحىنا جاساعان جاقسىلىعىمىز بەن قۇرمەتىمىز وسى بولار ەدى دەپ ەسەپتەيمىز.

جاقسىلىق ۇشكەمپىروۆ - الەم جانە ماسكەۋ وليمپياداسىنىڭ چەمپيونى؛

مۇحتار ەسقاليەۆ - قاز س ت ا- نىڭ تاربيە جانە سپورت جونىندەگى پرورەكتورى، پ. ع. ك؛

ماكس بالعوجا ۇلى كيزيكەنوۆ - قاجىمۇقان ءومىرىن زەرتتەۋشى- عالىم، ق ر- دىڭ ەڭبەك سىڭىرگەن جاتتىقتىرۋشىسى؛

ەرعالي مۇحيددينوۆ -  قاز س ت ا- نىڭ ۇلتتىق سپورت تۇرلەرى كافەدراسىنىڭ مەڭگەرۋشىسى، پ. ع. ك، پروفەسسور، قازاقستاننىڭ ەڭبەك سىڭىرگەن جاتتىقتىرۋشىسى، سپورت شەبەرى؛

جۇماتاي نۇرشين - بەلبەۋ كۇرەستەن وزبەكستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، ك س ر و سپورت شەبەرى؛

تالعار احماديەۆ - دوتسەنت، حالىقارالىق دارەجەدەگى سپورت شەبەرى؛

جەتكەرگەن مالشيەۆ - جاتتىقتىرۋشى، سپورت شەبەرى؛

كەندەباي ابىشيەۆ - ات سپورتىنىڭ مامانى، پ. ع. ك؛

نۇرجان وتەنوۆ - اعا وقىتۋشى، ق ر- نىڭ ەڭبەك سىڭىرگەن جاتتىقتىرۋشىسى؛

ءادىلجان ىستىبايەۆ - ستۋدەنت، جاستار اراسىنداعى ازيا جانە الەم چەمپيونى، حالىقارالىق دارەجەدەگى سپورت شەبەرى؛

عۇمار قىرعىزبايەۆ - ستۋدەنت، ازيا چەمپيونى، حالىقارالىق دارەجەدەگى سپورت شەبەرى؛

عۇسمان قىرعىزبايەۆ - ستۋدەنت، قازاقستان چەمپيونى، سپورت شەبەرى، ت. ب.

Kazakhstanzaman.kz