ماڭگىلىك ماحابباتتى ارقالاعان قۇلىپتار - فوتو

استانا. قازاقپارات - ماحاببات قۇلپى - عاشىق جۇپتاردىڭ ءوز ماحابباتىنىڭ ماڭگى ەكەنىن ءبىلدىرۋ ءۇشىن كوپىرلەرگە، قاقپالارعا، تاعى سول سياقتى قوعامدىق ورىنداردا بەكىتەتىن قۇلىپتار.

ال قالا باسشىلارى مۇنى قالالاردى لاستاۋدىڭ، ءۆانداليزمنىڭ ءبىر ءتۇرى دەپ ەسەپتەيدى، ءتىپتى بۇل قۇلىپتاردى الىپ تاستاۋ ءۇشىن دە ءبىراز قارجى بولىنەدى ەكەن.

پايدا بولۋ تاريحى

ماحاببات قۇلىپتارىنىڭ پايدا بولۋ تاريحى ءسال ەرتەدە، ءبىرىنشى دۇنيەجۇزىلىك سوعىس جىلدارى سەربيانىڭ كۋرورتتىق قالاسى ۆرنياچكا-بانيادا ورنالاسقان ماحاببات كوپىرىنەن باستالعان. وسى قالادا ءمۇعالىم بولىپ قىزمەت ەتەتىن نادا ەسىمدى قىز سەرب وفيتسەرىنە عاشىق بولادى.

سوعىس باستالعاندا وفيتسەر مايدانعا كەتەدى. وسىلاي، گرەكياداعى سوعىس كەزىندە كورفۋ قالاسىنىڭ ءبىر ايەلىنە عاشىق بولىپ، سونىمەن قوسىلادى. باقىتسىز ماحاببات نادانى ابدەن قالجىراتىپ، ءبىراز ۋاقىتتان سوڭ ءولىم قۇشادى. وسى وقيعادان كەيىن ۆرنياچكا-بانيا قالاسىنىڭ بارلىق ايەلدەرى نادا مەن وفيتسەردىڭ ءجيى كەزدەسكەن كوپىرىنە بارىپ، ءوز ماحابباتتارى مەن جاقىندارىن قورعاۋ ءۇشىن تىلەك ايتىپ، قۇلىپ سالاتىن بولعان.

ەۋروپانىڭ باسقا ەلدەرىندە ماحاببات قۇلىپتارى 2000- جىلداردان باستاپ كەڭ ەتەك جايعان. بۇل ءداستۇر تۋرالى العاش رەت يتاليالىق جازۋشى فرەدەريكو موچچيانىڭ 2006- جىلى جارىق كورگەن «مەن سەنى قالايمىن» اتتى كىتابىندا ايتىلادى. 2007- جىلى بۇل كىتاپ ەكراندالىپ، كورەرمەنگە جول تارتتى.

پاريج، فرانسيا:

پاريج - بۇكىل الەم مويىنداعان «ماحاببات قالاسى». وسى قالادا ورنالاسقان «ونەر» كوپىرىنە الەمنىڭ تۇكپىر-تۇكپىرىنەن كەلگەن عاشىقتار ماحاببات قۇلپىن سالىپ، كىلتىن سۋ تۇبىنە تاستايدى. سوڭعى جىلدارى ماحاببات قۇلىپتارى بۇكىل كوپىر سۇيەۋىشتەرىن «جاۋىپ» تاستاعان، سونىڭ اسەرىنەن كوپىردىڭ سالماعى ارتىپ، بىرنەشە جەرى سىنعان بولاتىن، ءتىپتى، كوپىر استىنان ءجۇزىپ وتەتىن كەمەلەرگە دە زيان كەلتىرگەن.

وسى جىلدىڭ ناۋرىز ايىندا پاريجدە تۇراتىن جاس ەكى امەريكالىق تۇرعىن ماحاببات قۇلىپتارىنىڭ كوپىرگە قاۋىپ توندىرەتىنى جانە ولاردىڭ ۇسقىنسىز كورىنەتىنىن ايتىپ، پەتيتسيا باستاعان. كەيىننەن، ينتەرنەت بەتتەرىندە كوپىردەگى قۇلىپتاردىڭ جالپى سالماعى 40 توننانى قۇرايتىنى تۋرالى اقپارات تاراعان بولاتىن. ناتيجەسىندە قالا باسشىلىعى قۇلىپتاردى الىپ تاستاۋعا بۇيرىق بەرگەن. شەكسپير ايتپاقشى، «ماحاببات حيكاياسى ءاردايىم باقىتتى بولا بەرمەيدى».

سەۋل، وڭتۇستىك كورەيا:

كورەيانىڭ سەۋل قالاسىنداعى نامسان تەلەمۇناراسى دا عاشىقتاردىڭ ءجيى كەلەتىن ورنى. مۇنى كورەيلىك مەلودرامالاردان دا ءجيى كورۋگە بولادى. بۇل جەردە ءوز عاشىعىڭمەن بىرگە تۇسكەن سۋرەتتى جابىستىرىپ، تىلەك جازاتىن ارنايى ورىندار بار.

ماڭگىلىك ماحابباتتى ساقتايتىن قۇلىپتارعا ارنالعان شىرشالار دا ورناتىلعان.

سونىمەن بىرگە، نىساننىڭ قورشاۋلارى دا ماحاببات قۇلىپتارىنا تولى.

 

مونتيەۆيدەو، ۋرۋگۆاي:

ۋرۋگۆايداعى مونتيەۆيدەو قالاسىندا «تاۋەلسىزدىك» الاڭىنا جاقىن جەردە عاشىقتارعا ارنالعان سۋبۇرقاق بار. وسى سۋبۇرقاقتىڭ جانىندا اعىلشىن جانە يسپان تىلىندە جازۋى بار مەموريالدى تاقتا ورناتىلعان.

اعىلشىنشا نۇسقاسىندا «بۇل جاس سۋبۇرقاق تۋرالى مىناداي اڭىز بار: قۇلىپتا ەكى عاشىقتىڭ ەسىمدەرى جازىلىپ، ەكەۋى سۋبۇرقاققا بىرگە بارۋى ءتيىس، وسىدان كەيىن ولاردىڭ ماحابباتتارى ماڭگىلىك بولادى» دەپ جازىلعان.

مەلبۋرن، اۋستراليا:

ماحاببات قۇلىپتارى مەلبۋرن قالاسىنا دا بارىپ ۇلگەرگەن. ءبىراق بيلىك وكىلدەرى بۇل ۇردىسكە قارسى شىقتى. اۋستراليانىڭ قورشاعان ورتانى قورعاۋ ءمينيسترى گرەگ حانت مۇنداي بەدەلدى قالادا كوشە ءسانىن قۇرتاتىن قۇلىپتاردىڭ بولۋى دۇرىس ەمەس دەپ ەسەپتەيدى.

تايچۋن، تايۆان

تايۆاندا ماحاببات قۇلىپتارىن تەمىرجول وتپەلەرىنە جۇبىمەن بىرگە قادايدى. بۇل ەلدە مۇنداي قۇلىپتاردى «تىلەكتەردى ورىندايتىن قۇلىپ» دەپ اتاپ كەتكەن.

بۇل اتاۋعا تۇرتكى بولعان جەرگىلىكتى تۇرعىنداردىڭ سەنىمى مىنادان شىققان: پويىز تەمىرجولمەن وتكەن ۋاقىتتا ماگنيتتىك ءورىس پايدا بولادى. ماگنيتتىك ورىستەر قۇلىپتاعى تىلەكتەردىڭ ورىندالۋىنا اسەر ەتەتىن ەنەرگيا شىعارادى دەيدى.

الماتى، قازاقستان:

الماتى قالاسىنداعى كوپىرلەرگە قۇلىپ سالۋ ءداستۇرى عاشىقتار اراسىندا كەڭىنەن تارالىپ جاتىر. مۇنىڭ ايعاعى ەسەنتاي جاعالاۋىنداعى قۇلىپتار.

بۇل جاققا سۇيگەن جاندار ارنايى كەلىپ، كوپىردىڭ تەمىر تۇتقالارىنا وزدەرىنىڭ ەسىمدەرى قاشاپ جازىلعان قۇلىپ تاعىپ كەتەدى. قۇلىپتى كوپىر تۇتقالارىنا بەكىتكەن سوڭ، ەكى عاشىق ءوز سەزىمدەرىنىڭ كۋاگەرى بولىپ تۇرعان سۋعا كىلتتى لاقتىرىپ جىبەرەدى.

دايىنداعان: نازەركە سماعۇل

massaget.kz