قازاق كوشىن تولاستاتپاۋ كەرەك

استانا.قازاقپارات - قازاقستاننىڭ «اق جول» دەموكراتيالىق پارتياسى تاعدىردىڭ جازۋىمەن جات ەلدەردە ءومىر ءسۇرىپ جاتقان ءوز قانداستارىمىزدىڭ بىرتىندەپ ەلگە كوشىرۋگە جانە ولاردىڭ تۇرعىلىقتى جەرلەرىندەگى قۇقىق- مۇددەسىن قورعاۋ مەن ۇلتتىق بولمىسىن ساقتاۋىنا ەرەكشە قامقورلىق كورسەتۋگە مىندەتتىمىز دەپ سانايدى.

سوندىقتاندا پارلامەنتتە ءوزىنىڭ دەپۋتاتتىق فراكتسياسى بار پارتيا رەتىندە ۇكىمەتتىڭ وسى باعىتتاعى جۇمىسىن ءجىتى قاداعالاپ، نازارىندا ۇستاپ وتىر. بيىلعى جىلى رەسپۋبليكا ۇكىمەتى سول قانداستارىمىزدى ەلگە كوشىرۋدى جەدەلدەتۋ ماقساتىندا، قازاق كوشىن كولىكتى ەتۋدىڭ قۇقىقتىق جانە اكىمشىلىك تەتىكتەرىن وڭتايلاندىرۋعا باعىتتالعان اسا ماڭىزدى ساياسي شەشىم دە قابىلدادى. ۇلتتىق مەملەكەتىمىزدى ودان ءارى بەكەمدەۋ جولىنداعى يگى باستامالاردى قولداي وتىرىپ، «اق جول» پارتياسى مۇنىڭ ءوزىن دە جەتكىلىكسىز دەپ ساناپ، ا. ج، 12 - ماۋسىمىندا ۇكىمەتكە قۇلاشىن كەڭگە سىلتەي الاتىن مەملەكەتتىك كوشى- قون جانە قازاق دياسپوراسى اگەنتتىگىن قۇرۋ ماسەلەسىن كوتەرىپ دەپۋتاتتىق ساۋال جولداعان بولاتىن.

 وندا، شەتەلدەردە تۇراتىن قازاق دياسپوراسىنىڭ ۇلتتىق بولمىسىنا تونگەن قاتەر جىل وتكەن سايىن اۋىرلاي تۇسكەنى اشىق ايتىلدى. مىسال رەتىندە، «ميلليونعا جۋىق قانداسىمىز تۇراتىن كورشى رەسەيدە ءبىر دە ءبىر قازاق مەكتەبى جوقتىعى، كەشەگى توقسانىنشى جىلداردىڭ وزىندە 90 پايىزدان اسا بالا ءوز انا تىلىندە ءبىلىم الاتىن قىتاي مەن وزبەكستاندا قازاق مەكتەپتەرىنىڭ سانى ادام شوشىرلىق جىلدامدىقپەن كەمىپ جاتقانى» ، ت. ب. كەلتىرىلدى. ال، ولارمەن مادەني بايلانىستاردى كۇشەيتۋگە مىندەتتەلگەن دۇنيەجۇزى قازاقتارى قاۋىمداستىعىنىڭ جۇمىسى سىن كوتەرمەيدى. قوعامدىق ۇيىمدار قالاي بولعاندا دا تىم اۋىر جۇكتى كوتەرە دە المايتىنى دا انىق. سول سەبەپتى، «اق جول» يزرايل، گەرمانيا، رەسەي جانە قىتاي ەلدەرىندە ءوز دياسپورالارىنىڭ قۇقىق- مۇددەسىن قورعاۋعا باعىتتالعان ارنايى مەملەكەتتىك قۇرىلىمدار ءتيىمدى جۇمىس ىستەپ كەلە جاتقانىن، بىزدەگى ىشكى ىستەر مينيسترلىگىندەگى كوشى- قون دەپارتامەنتىنىڭ قىزمەتى تەك ۆيزالىق -  رۇحسات بەرۋمەن شەكتەۋلى ەكەنىن تىلگە تيەك ەتە وتىرىپ، كوشى- قون جانە دياسپورا اگەنتتىگىن قۇرۋدىڭ ماڭىزدىلىعىن اتاپ كورسەتكەن ەدى.

ۇكىمەتتىڭ قايتارعان جاۋابىندا اۋەلى وسى ۋاقىتقا دەيىنگى كوشى- قون پروتسەستەرىن رەتتەيتىن، «حالىقتىڭ كوشى- قونى تۋرالى» ق ر زاڭىن قوسا العاندا، جۇرتشىلىققا بەلگىلى قۇجاتتاردى، ءارتۇرلى مينيسترلىكتەردىڭ اتالعان ماسەلەدەگى قۇزىرەتتەرىن سانامالاپ كورسەتىپتى. سونىمەن قاتار ق ر ەڭبەك جانە حالىقتى الەۋمەتتىك قورعاۋ مينيسترلىگى ازىرلەگەن تۇجىرىمدامانىڭ ەتنيكالىق قازاقتار ءۇشىن قازاقستان رەسپۋبليكاسىنا كەلۋ شارتتارىن بىرىزدەندىرۋ جانە وڭايلاتۋعا باعىتتالعانىن اتاپ وتكەن. كوزىقاراقتى وقىرمان بۇدان حاباردار. ال، «اق جول» پارلامەنتتىك فراكتسياسىنىڭ ناقتى ۇسىنىسىنا كەلسەك، وعان ۇكىمەتتىڭ جاۋابى مىناداي: «جوعارىدا جازىلعاندى نازارعا الا وتىرىپ، قازىرگى ۋاقىتتا قازاقستان رەسپۋبليكاسى ۇكىمەتىنىڭ وڭتايلى قۇرىلىمى قۇرىلعاندىعىن، كوشى- قون ماسەلەلەرى بويىنشا ۋاكىلەتتى ورگاندار ايقىندالعانىن ەسكەرە وتىرىپ، كوشى- قون جانە قازاق دياسپوراسى بويىنشا جەكە مەملەكەتتىك ورگان قۇرۋدى ەرتە دەپ سانايمىز» .

 «اق جول» پارتياسى دەپۋتاتتارىنىڭ ساۋالى قازاقستان رەسپۋبليكاسى پرەزيدەنتىنىڭ «قازاقستان رەسپۋبليكاسى مەملەكەتتىك باسقارۋ جۇيەسىنىڭ رەفورماسى تۋرالى» 2014 - جىلعى 6 - تامىزداعى № 875 جارلىعىمەن قالىپتاستىرىلعان جيناقى ۇكىمەت قۇرىلعانعا دەيىن جىبەرىلگەن بولاتىن. مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋدا ۇكىمەتتىڭ جاڭا قۇرامىنا جۇكتەلەر وزەكتى مىندەتتەردىڭ مولدىعىنا «اقجولدىقتار» ەشقانداي ءشۇبا كەلتىرمەيدى. تەك، سونىڭ ىشىندە، قانداستارىمىزدىڭ ەلگە ورالۋى، قازاق كوشىن تولاستاتپاۋ مەملەكەتتىڭ نازارىندا ۇستايتىن ەڭ ماڭىزدى ماسەلەلەرىنىڭ ءبىرى رەتىندە قاراستىرىلۋى ءتيىس دەپ سانايدى. بۇل ەڭ الدىمەن دۇنيەنىڭ دۇربەلەڭى كوبەيىپ تۇرعان قازىرگى الماعايىپ زاماندا تاۋەلسىز قازاقستانىمىزدىڭ قاناتىن قاتايتىپ، كەرەگەسىن كەڭەيتىپ، ىرگەسىن بەكەمدەي تۇسەتىن، ۇلتتىق قاۋىپسىزدىگىمىزگە بايلانىستى ماسەلە ەكەندىگىن ءبىر ساتتە ەستەن شىعارماعانىمىز ابزال - قازتاگ.