09:28, 12 - تامىز 2014 | GMT +5
بريتانيا حالقى گازا ايماعىنداعى بۇلىككە اراشا تۇسپەگەنى ءۇشىن ەلدىڭ پرەمەر-ءمينيسترىنىڭ وتستاۆكاعا كەتۋىن تالاپ ەتتى
استانا. قازاقپارات - وتكەن سەنبىدە ۇلى بريتانيا مەملەكەتىنىڭ استاناسى لوندون قالاسىندا گازا ايماعىنداعى تىنىشتىقتىڭ ورناۋىن تالاپ ەتكەن مىڭداعان جاننىڭ بەيبىت شەرۋى بولىپ ءوتتى، دەپ جازادى muslim.kz.
اتالمىش اكسياعا اتسالىسقانداردىڭ كوپتىگى سونشالىق، قولدارىنا پالەستينا مەن ەۋرو وداق تۋلارىن كوتەرگەندىڭ قاتارى BBC كورپوراتسياسىنىڭ شتاب-پاتەرىنەن گايدپارككە دەيىنگى ارالىقتى تولتىردى.
ەل بيلىگى قاۋىپسىزدىك شارالارىن مەيلىنشە قاتاڭداتىپ، جاعدايدى باقىلاۋدا ۇستاۋعا مىڭداعان ءتارتىپ ساقشىلارى جۇمىلدىرىلدى. ءتىپتى، لوندون اسپانىن اسكەري ۇشاقتار قاراۋىلداعان.
شەرۋشىلەر يزرايلدىكتەردىڭ پالەستيناداعى اسكەري ارەكەتىن دەرەۋ توقتاتۋدى جانە دە باسىپ العان جەرلەرىن بوساتۋدى تالاپ ەتتى. اكسيا اياسىندا ۇلى بريتانياداعى 100000 ەۆرەيدىڭ قولى قويىلعان پەتيتسيا تابىستالدى.
سونداي-اق، بەيبىت شەرۋشىلەر گازا ايماعىندا باسقىنشىلىق سوعىسىنا توقتاۋ قويماعاندىعى ءۇشىن ەلدىڭ پرەمەر-ءمينيسترى دەۆيد كەمەروننىڭ وتستاۆكاعا كەتۋىنە تالاپ قويدى.
