پوليتسەي ەش سەبەپسىز بوزبالانى اتىپ ءولتىردى

استانا. قازاقپارات - ا ق ش-تىڭ ميسسۋري شتاتىنداعى فەرگيۋسون قالاسىندا پوليتسيا قىزمەتكەرى جول بويىندا 18 جاستاعى بوزبالانى اتىپ تاستادى، دەپ جازادى 24.kz.

مارقۇمنىڭ اتا-اناسىنىڭ ايتۋىنشا، وقيعا كەزىندە جاس جىگىت سەنت-لۋيستەگى اجەسىنىڭ ۇيىنە بارا جاتقان.

بۇل وقيعا تۇرعىنداردىڭ اشۋىن كەلتىرىپ، جۇزدەگەن ادام سەنت-لۋيس كوشەلەرىنە شىعىپ، نارازىلىق تانىتتى. پوليتسەيلەردىڭ ايتۋىنشا، شاھارداعى احۋال ءالى شيەلەنىسىپ تۇر. الايدا، ءتارتىپ ساقشىلارى وق اتقان ارىپتەستەرىنىڭ بۇل ارەكەتىنىڭ سەبەبىن ايتپاي، ەسىمىن دە اتاماي وتىر.

وقيعا ورنىنا 60 قا جۋىق قاۋىپسىزدىك كۇشتەرى قىزمەتكەرلەرى جۇمىلدىرىلدى. قازىر قاقتىعىستار جايلى اقپارات جوق.

مارقۇمنىڭ اناسى لەسلي ماكسپاددەن بولسا بۇل جاعدايعا سەنە الار ەمەس. ول: مەنىڭ ۇلىم ەشقاشان بىرەۋگە جاماندىق جاساماعان. جاسى نەبارى 18 دە بولاتىن. مەكتەپتى ەندى عانا ءبىتىرىپ ەدى، - دەپ بوتاداي بوزداپ وتىر.