قازاقتىڭ ءداستۇرلى اسكەري لاۋازىمدارى قالاي اتالعان؟
ءداستۇرلى قازاق قوعامىنداعى اسكەري لاۋازىمدار قالاي اتالعان؟
جالپى، اسكەر اتاۋى ارابتىڭ «اسكار»، پارسىنىڭ «لاشكار» دەگەن سوزىنەن شىققان.
قازاقتار اسكەردى «سارباز»، «جاۋىنگەر»، «جاساق»، «قول» دەپ اتاعان.
قازاق حالقى اسكەردىڭ تۇرىنە، قۇرامىنا جانە ەرەكشەلىگىنە بايلانىستى اتتى اسكەر، جاياۋ اسكەر، وندىق، جۇزدىك، مىڭدىق، تۇمەن، جاساق، قوسىن، قول، لەك، الامان، وڭ قانات، سول قانات، شەرۋ، ساپ، شەپ، تاعى باسقا ءداستۇرلى اسكەري اتاۋلاردى قولدانادى.
سونداي-اق اسكەردىڭ سارباز، جاۋىنگەر ماعىناسىنداعى باتىر (ءباھادۇر)، الامان، سىپاي، شورا، شەرىك، جاساۋىل، سارباز، جاۋىنگەر تاعى باسقا جارىسپالى اتاۋلارى بولعان. ال ءداستۇرلى لاۋازىمدار ونباسى، ءجۇزباسى، جۇزبەگى، مىڭباسى، مىڭبەگى، تۇمەنباسى، اعا (اعا باتىر)، تارحان، قولباسى، باتىرباسى، ساردار، بەك، بەگلەربەگى، ءامىر، ت. ب دەپ اتالادى.
شابۋىل كەزىندە نە قورعانىستا جەكە ارەكەت ەتىپ، جەر جاعدايىن تالعاماي تۇتقيىلدان تيىسۋگە وڭتايلىلىعىمەن ەرەكشەلەنەتىن اتتى اسكەر وتە ەرتەدە ازيا ەلدەرىندە پايدا بولعان. سودان بولار، قازاق حالقىنىڭ ەرتە زاماننان بەرگى جاۋىنگەرلىك جورىقتارى اتتى اسكەرمەن تىكەلەي بايلانىستى.
