استانادا تۇراقتاعىسى كەلەتىن ورالماندارعا «ورالمان كۋالىگىن» بەرۋدى توقتاتتى
بۇل تۋرالى قازاقپارات تىلشىسىنە استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسى كوشى- قون ءبولىمىنىڭ باسشىسى بەيىمبەت ۇسىپبەك ايتتى.
ماماننىڭ ايتۋىنشا، وسى ۋاقىت ارالىعىندا باسقارماعا 39 وتباسى ورالمان كۋالىگىن الۋ ماسەلەسىمەن كەلگەن. كۇن سايىن تەلەفونمەن حابارلاسىپ، كەڭەس الاتىندار دا كوپ كورىنەدى. باسقارما قىزمەتكەرلەرى ولارعا قاۋلى بويىنشا بارلىق زاڭنامالاردى ءتۇسىندىرىپ، ەلىمىزدىڭ باسقا وڭىرلەرىنە بارۋعا كەڭەس بەردى.
«قازىر استاناعا تۇرعىلىقتى تۇرام دەيتىن قانداستارىمىز باسقا دا شەتەل ازاماتتارىمەن تەڭ قۇقىققا يە. ياعني ولار الدىمەن تۇرعىلىقتى جەردىڭ انىقتاماسىن الىپ، سول ارقىلى ازاماتتىققا تاپسىرادى. بانكتە تولەم قابىلەتىن راستايتىن 2,5 ميلليون تەڭگەسى بولۋى شارت. دەگەنمەن وسىعان قاراماستان بىزگە كەلىپ حابارلاساتىن قانداستارىمىز بۇرىنعىدان ازايعان جوق. ال كۆوتا العىسى كەلەتىندەر استانا مەن الماتى قالالارىنان باسقا ەلىمىزدىڭ بارلىق وڭىرلەرىنە قونىستانا الادى. سول جەردە ولار باسپانامەن دە، جۇمىس ورنىمەن دە قامتاماسىز ەتىلەدى» ، - دەدى ب. ۇسىپبەك.
ايتا كەتەيىك، جوعارىدا اتالعان قاۋلى بويىنشا ورالمانداردىڭ قونىستانۋىنا ەلىمىزدىڭ سولتۇستىك وڭىرلەرى بەلگىلەنگەن بولاتىن. ال قازاقستان رەسپۋبليكاسى ۇكىمەتىنىڭ 2014 - جىلعى 20 - ناۋرىزداعى № 248 قاۋلىسىمەن ەنگىزىلگەن وزگەرىستەر بويىنشا قانداستارىمىز استانا مەن الماتى قالالارىنان باسقا كەز كەلگەن ەلدى مەكەنگە قونىستانا الادى.
اۆتور: ءابۋ- اسقار مەكەش ۇلى
