رەسەيگە سالىنعان سانكتسيا قازاقستان ءۇشىن مۇمكىندىكتەر اشۋى ىقتيمال
«كەشەگى ۇكىمەتتىڭ وتىرىسىندا ەكونوميكا ءمينيسترى التى ايدا 4 پايىزدىق ەكونوميكا ءوسىمى بولعانىن ايتتى. بۇل جامان ەمەس. دەگەنمەن، بىزدەگى وندىرىستىك ونەركاسىپ سالاسىندا 0,4 پايىز دەڭگەيىندە از عانا تەجەلۋلەر بارشىلىق. بۇل باتىستىڭ رەسەيگە جاساعان سانكتسياسىنان ەمەس، الەمدىك باعا كونيۋكتۋراسىنان ورىن الدى»، - دەيدى ابىلاي مىرزاحمەتوۆ.
سونىمەن قاتار، پالاتانىڭ باسقارما ءتوراعاسى رەسەي مەن باتىس اراسىنداعى قاراما-قايشى سانكتسيالاردان قازاقستاننىڭ ۇتار تۇسى بولاتىنىن جوققا شىعارمايدى.
«جالپى، سانكتسيادان ەشكىم ۇتپايدى، وكىنىشكە قاراي ءبارى جاپا شەگەدى. ويتكەنى، رەسەي الىپ مەملەكەت، ونىڭ ەكونوميكاسى دا اۋقىمدى، سوندىقتان سانكتسيا سالعان باتىستىڭ وزىنە دە وڭاي تيەيىن دەپ وتىرعان جوق. دەگەنمەن، مۇنداي ماسەلەدە قازاقستانعا مۇمكىندىكتەر اشىلاتىنىن بولجاۋعا بولادى. ماسەلەن، رەسەي پولشا مەن مولداۆيادان كەلەتىن جەمىس-جيدەكتەرگە، ازىق-تۇلىككە سانكتسيا بەردى. ونىڭ ورنىن رەسەي وزىندەگى ءوندىرىستى ارتتىرۋ ارقىلى جابۋعا ۇمتىلماقشى. ەندەشە، قازاقستانعا دا مۇمكىندىك تۋىپ تۇر دەگەن ءسوز. بۇل اسىرەسە اۋىل شارۋاشىلىعى تاۋارلارىن ءوندىرۋ مەن وڭدەۋ اياسىندا ابدەن ىڭعايلى بولۋى مۇمكىن»، - دەدى ا. مىرزاحمەتوۆ.
ءسوز اراسىندا پالاتا ءتوراعاسى ازىق-تۇلىك قاۋىپسىزدىگىن قامتاماسىز ەتۋ ماسەلەسىن ەلباسى ۇكىمەتكە ەرەكشە جۇكتەگەنىن اتاپ ءوتتى.
اۆتور: قانات مامەتقازى ۇلى
