باي-ولكەدە وتكەن الامان ايتىستىڭ باس جۇلدەسىن شۇعايىپ سەزىمحان ۇلى قانجىعالادى

استانا. قازاقپارات - جاقىندا باي-ولكە ايماعى ساقساي اۋدانىندا ايماقتىق اقىندار ايتىسى ءوتتى. ايتىستى ساقساي اۋدانىنىڭ اكىمى سەكەي ۇلى قونايەۆ ۇيىمداستىرعان.

بۇل دوداعا موڭعوليا قازاقتارىنا تانىمال ون ءبىر اقىن قاتىستى. ءسوز سايىسىنا ايتىس ساحىناسىندا كوپ جىلدار جۇرگەن اعا اقىندار سۇيەنىش، قايراتحان، باقىتحان، زويالارمەن بىرگە، ورالباي، سەرۋەن، ەرگەن، امانجول، ءدىنپاتشا، شۇعايىپ، سەرىك سياقتى جاس اقىندار ءسوز سايىستىردى.

ءدۇبىرلى دوداعا موڭعوليا جانە قازاقستان جۋرناليستەر وداعىنىڭ مۇشەسى اقىن جانات بوقاش ۇلى جانە اقىن سارا بالاباي قىزى گاگارين كابي ۇلى قازىلىق جاسادى.

اقىندار تەرەڭ وي، سۇبەلى ءسوز، جاراسىمدى ءازىل-قالجىڭدارىمەن جينالعان كوپشىلىكتىڭ جۇرەگىنەن ورىن الدى.

سۋىرىپ سالما ءتول ونەردى تەرەڭ ناسيحاتتاي وتىرىپ قارسىلاسقا قىرانداي ءتۇيىلىپ، قاناعاتتانار جاۋاپتار بەردى. قوعامنىڭ كەمشىلىكتەرى مەن ۇلتتىق پروبلەمالاردى دا ءسوز اراسىندا تىلگە تيەك ەتتى. حالىقتىڭ جىرعا دەگەن ءشولىن ءبىر باستى. كوركەم ءسوز، تارتىمدى شۋماقتارى كورەرمەننىڭ كوڭىلىنەن شىعىپ جاتتى.

ايتىستىڭ باسجۇلدەسى بولعان ءبىرىنشى ورىندى شۇعايىپ سەزىمحان ۇلى قانجىعاسىنا بايلاسا، ەكىنشى ورىندى ەرگەن لانحان، ءۇشىنشى ورىندى ورالباي، ءتورتىنشى ورىندى امانجول قۋانتحان ۇلى ەنشىلەدى. ايتىستان كەيىن اقىندار التى قانات اق ورداعا باس قوسىپ كەنجە قالىپ بارا جاتقان ءتول ونەر جايلى ءسوز ءوربىتتى. جيىندا ءسوز العان سەكەي ۇلى قونايەۆ جىلىندا ءبىر رەت ايتىس وتكىزىپ تۇرۋدى داستۇرگە اينالدىراتىنىن ايتتى.

ەسكەرتە كەتەيىك باس جۇلدەنى قانجىعالاعان شۇعايىپ اقىن ەلىمىزدىڭ تۇركىستان قالاسىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى. وبىلىستىق ايتىستارعا قاتىسىپ جۇلدەلى ورىنداردان كورىنىپ جۇرگەن جاس اقىنداردىڭ ءبىرى.

ايمان اقەدىل قىزى

Kazaitys.kz