شەتەلدەگى قازاق جاستارىن «بولاشاق» باعدارلاماسىنا قوسقان دۇرىس پا؟
- بۇل ماسەلە وتە ورىندى دەپ سانايمىن. ولاردىڭ اراسىندا دا نەبىر دارىندى، العىر، تالانتتى جاستار كوپ. سولاردى تاۋىپ، قولداۋ جاساپ، شەتەلدىڭ مىقتى جوعارى وقۋ ورىندارىندا وقىتىپ جاتسا، نۇر ۇستىنە نۇر بولار ەدى.
ارينە، «بولاشاق» باعدارلاماسى ارقىلى وقىسىن، ءبىراق بىتىرگەن سوڭ قازاقستاندا 5 جىل نەمەسە شارتتا كورسەتىلگەن كەزەڭدە جۇمىس ىستەيسىڭ» دەگەن قاتاڭ تالاپ بولۋى ءتيىس. ويتكەنى «الماقتىڭ دا سالماعى بار».
شەتەلدە العان ءبىلىمىنىڭ ناتيجەسىن ءوز وتانىندا كورسەتكەن دۇرىس. ياعني قازاقستاننىڭ وركەندەۋىنە، دامۋىنا ۇلەس قوسۋى ءتيىس.
مەنىڭشە، بۇل باستاما الداعى ۋاقىتتا قولداۋ تابادى دەپ ويلايمىن.
كارىمبەك قۇرماناليەۆ، فيلولوگيا عىلىمدارىنىڭ دوكتورى، پروفەسسور:
- ءوزىنىڭ تاريحي وتانىنان كەزىندە تاعدىردىڭ تالايىمەن الىستاپ كەتكەن اعايىنداردىڭ اراسىندا ءبىلىمدى دە بىلىكتى ازاماتتار جەتكىلىكتى. سونداي جاستاردى وزىمىزگە تارتۋ ءۇشىن «بولاشاق» باعدارلاماسى ارقىلى كۆوتا ءبولىپ، وقىتىپ، ءوز ەلىمىزدە قىزمەت بەرىپ جاتساق، جامان با؟ ولار دا قازاقستاننىڭ دامۋىنا ۇلەسىن قوسۋدان ايانباس ەدى. ءبىراق مۇنىڭ ءبارىن زاڭ اياسىندا شەشۋ كەرەك.
قانداستارىمىز تۇراتىن مەملەكەتتەرمەن حالىقارالىق كەلىسىمشارتتار شەڭبەرىندە كەلىسە وتىرىپ اتقارعان ءجون. مەنىڭشە، بۇل جەردە سول مەملەكەتتەردە جۇمىس ىستەپ جاتقان ەلشىلەرىمىز تالانتتى جاستارىمىزدى تاۋىپ، باعىت-باعدار بەرگەنى ءجون. وسىلايشا، «بولاشاق» باعدارلاماسىمەن سىرتتا جۇرگەن قانداستارىمىزدىڭ دا قامىن جەگەن دۇرىس.
دوس كوشىم، «ۇلت تاعدىرى» قوعامدىق قوزعالىسىنىڭ ءتوراعاسى:
- مۇنداي باستاماعا تەك وڭ كوزبەن قاراۋ كەرەك. قۋانا قولداۋ قاجەت. نەگە دەسەڭ، ولار دا ءوز قانداستارىمىز.
ءتىپتى ولاردى وسى باعدارلاما اياسىندا وقىتىپ، ء«بىز قارجى تولەدىك» دەپ بۇلداپ، ەلگە شاقىرۋدىڭ قاجەتى دە جوق. ول ازاماتتار ەشۋاقىتتا قازاقستاننىڭ كومەگىن قاي جەردە جۇرسە دە ۇمىتپايدى. وسىنداي اتامەكەنىمىز بار، تاريحي وتانىمىز بار، ارقا سۇيەر، قاجەت كەزىندە قول ۇشىن سوزار ەلىمىز بار دەپ ەسكە الىپ، ايتا جۇرەدى. بۇل ەلىمىزدىڭ قانداستار الدىندا دا، وزگەلەر الدىندا دا بەدەلىن كوتەرەر ەدى.
ساۋالنامانى دايىنداعاندار سەيسەن امىربەك ۇلى، اليما مۇرات.
«ايقىن»
