ەلباسى شەنەۋنىكتەرگە بيزنەس-قالتانى مەملەكەتتىڭ جۇمىسىمەن ەش شاتاستىرماۋدى قاتاڭ ەسكەرتتى

استانا. قازاقپارات - بۇگىن اقوردادا وتكەن ۇكىمەتتىڭ كەڭەيتىلگەن وتىرىسى بارىسىندا اتقارۋشى بيلىكتىڭ جاڭارتىلعان قۇرامى ايقىندالدى. سوعان وراي، ق ر پرەزيدەنتى ن. نازاربايەۆ ۇكىمەت مۇشەلەرىنىڭ الداعى جۇمىسىنا دا توقتالعان بولاتىن.

«ەگەر بيزنەس-قالتاڭدى مەملەكەت جۇمىسىمەن شاتاستىرساڭ، ەرتەسىندە-اق جۇمىستان قۋىلاسىڭ»، - دەپ ەسكەرتتى نۇرسۇلتان نازاربايەۆ ۇلتتىق ەكونوميكا ءمينيسترى رەتىندە ەربولات دوسايەۆتى تانىستىرا وتىرىپ.

«بۇل بىرەۋىڭە عانا ەمەس، بارىڭە دە بايلانىستى. شىندىعىندا، بيزنەس سەكتوردان تاجىريبەلى ازاماتتاردى تارتۋدىڭ ەش ايىبى جوق. بۇندا ءبىز ونداي كاسىبي باسشىلاردىڭ ءىستى باسقارۋعا سەپتىگىن تيگىزەتىنىن ەسەپكە الامىز»، - دەدى ن. نازاربايەۆ.

«ەربولات دوسايەۆ ۇلتتىق ەكونوميكا مينيسترلىگىن باسقارۋعا قۇزىرى جەتەدى، كەزىندە قارجى مينيسترلىگىندە قىزمەت ەتتى، دەنساۋلىق ساقتاۋ ءمينيسترى بولدى. بيزنەستە دە جۇمىس ىستەدى. ونى وسىندا بيزنەستەن شاقىرتتىق. جاس، اعىلشىن ءتىلىن بىلەدى»، - دەدى ن. نازاربايەۆ.

اۆتور: قانات مامەتقازى ۇلى