اسقار اقايەۆ اعاسىنىڭ جانازاسىنا كەلۋدەن باس تارتتى

استانا.  قازاقپارات -  قىرعىزستاننىڭ بۇرىنعى پرەزيدەنتى اسقار اقايەۆ بىشكەككە بارار جولدان كەرى قايتتى. كيرتاگ اگەنتتىگىنىڭ حابارلاۋىنشا، ساياساتكەر قىرعىزستاندا ءۇشىنشى ريەۆوليۋتسيانىڭ وتىن تۇتاتۋدان قورىققان. ال، بىشكەككە ول قايتىس بولعان اعاسىنىڭ جانازاسىنا قاتىسۋ ءۇشىن كەلمەك بولدى دەيدى پرەمەر-مينيستر اپپاراتىنىڭ جەتەكشىسى بەكبولات تالعاربەكوۆ.

«ءبىز ماسكەۋگە اسقار اقايەۆتىڭ وزىنە تەلەفون ارقىلى حابارلاستىق. ول ۇلىمەن بىرگە اۋەجايعا كەلە جاتىر ەكەن. ءبىز وعان جاعدايدى ءتۇسىندىرىپ ايتتىق. اقايەۆتى قىرعىزستاندا تۇتقىنداۋى مۇمكىن. ولاي بولعان جاعدايدا ونىڭ جاقتاستارى تاعى كوتەرىلىس ۇيىمداستىرىپ، ەلدە ءۇشىنشى ريەۆوليۋتسيا باستالىپ كەتەدى. بۇل اڭگىمەدەن كەيىن اقايەۆ بىشكەككە كەلمەيتىن بولىپ شەشتى. اعاسىنىڭ جانازاسىنا تەك ەكس-پرەزيدەنتتىڭ ۇلى عانا كەلدى» دەدى تالعاربەكوۆ.

ايتا كەتەيىك، اسقار اقايەۆتىڭ اعاسى بولوت بىشكەك قالاسىندا 3- تامىز كۇنى 83 جاسقا قاراعان شاعىندا قايتىس بولدى. ونى اقتىق ساپارعا شىعارىپ سالۋعا ءىنىسى اسقار اقايەۆ كەلەدى دەپ كۇتىلگەن. الايدا، رەسپۋبليكانىڭ باس پروكۋرورى ايدا ساليانوۆا ەكس-پرەزيدەنتتىڭ تەرگەۋگە شاقىرىلاتىنىن مالىمدەدى.

Baq.kz