جاڭا تەلەارنا «بىرلىك» ارناسى وتباسىلىق ءارى ويىن-ساۋىقتىق فورماتتا بولۋى ءتيىس - ن. نيازوۆا

الماتى. قازاقپارات - «بىرلىك» تەلەارناسى وتباسىلىق ءارى ويىن-ساۋىقتىق فورماتتا بولۋى ءتيىس.

بۇگىن الماتىدا دوستىق ۇيىندە جاڭا مەملەكەتتىك «بىرلىك» تەلەارناسىن قۇرۋ بويىنشا وتكەن دوڭگەلەك ۇستەل بارىسىندا قازاقستان تاتارلارىنىڭ «ەلداش» گۋمانيتارلىق دامۋ ورتالىعىنىڭ ءتورايىمى ءنۇريا نيازوۆا وسىنداي پىكىر ءبىلدىردى.

دوڭگەلەك ۇستەلگە جينالعان ەتنومادەني بىرلەستىكتەردىڭ وكىلدەرى جاڭا مەملەكەتتىك تەلەارنا قۇرۋ ماسەلەلەرىن جان-جاقتى تالقىلادى.

«جاڭا مەملەكەتتىك تەلەارنا قۇرۋ يدەياسى قازاقستان حالقى اسسامبلەياسىنىڭ وتكەن جىلى استانا قالاسىندا قاراشا ايىندا وتكەن مەديا-فورۋمىندا العاش رەت كوتەرىلگەن ەدى. بۇگىنگى تالقىلاۋ سونىڭ جالعاسى ىسپەتتەس.

ونىڭ ۇستىنە ەلباسى 2015 - جىلدى - قازاقستان حالقى اسسامبلەياسىنىڭ جىلى دەپ جاريالاعانى بارشاعا ءمالىم.

قازاقستان حالقى اسسامبلەياسىنىڭ قامقورلىعى اياسىندا جاڭا تەلەارنا قۇرۋعا دەگەن قاجەتتىلىك قازىر ۇلكەن! قازاقستان كوپ ۇلتتى مەملەكەت.

ءبىز ۇلت ارالىق تاتۋلىقتى كوكسەيمىز. ولاي بولسا، نەگە جاڭا فورماتتا تەلەارنا اشپاسقا؟ وندا ۇلت ارالىق دوستىقتى، بىرلىكتى جانە قازاقستاندا تۇراتىن حالىقتاردىڭ مادەنيەتىن، ءتىلىن پاش ەتۋگە بولادى. سونداي-اق، ەلىمىزدە قانشاما ينتەرناتسيونالدىق جانۇيالار، قازاقستاننىڭ وركەندەپ دامۋىنا ۇلەس قوسقان قانشاما اتاقتى تۇلعالار بار! مىنە، سولار جايىندا قىزىقتى، تانىمدىق، تاعىلىمدىق باعدارلامالار جاساۋعا بولادى. بۇل جەردە ءاربىر ۇلت ءوز مادەنيەتىن، ءتىلىن، ءداستۇرىن پاش ەتۋگە دايىن! ال بۇل وتە ماڭىزدى. بۇل تەلەارنادا سونىمەن قاتار، سوناۋ كەڭەس زامانىندا ۇلتتىق كينوستۋديالار تۇسىرگەن تاماشا كينوتۋىندىلاردى دا كورەرمەن نازارىنا ۇسىنۋعا بولادى» - دەدى ءوز سوزىندە ءنۇريا نيازوۆا.

بۇگىنگى دوڭگەلەك ۇستەلگە جينالعان ەتنومادەني بىرلەستىكتەردىڭ وكىلدەرى جاڭا باستامانى ءبىراۋىزدان قولدادى. سونىمەن قاتار، قاتىسۋشىلار جاڭا تەلەارنانىڭ كوممەرتسيالىق مۇمكىندىگى دە بولۋى كەرەكتىگىن اتاپ ءوتتى. «ويتكەنى سوندا عانا تىڭ، قىزعىلىقتى، كورۋگە تۇرارلىق باعدارلامالار جاساۋعا بولادى»، - دەيدى ولار.

جاڭا تەلەارنا 2015 - جىلى قۇرىلۋى ىقتيمال. قاتىسۋشىلاردىڭ پىكىرىنشە، وندا مەملەكەتتىك تىلمەن قاتار، 33 تىلدە حابار تاراتىلۋى مۇمكىن. ياعني، الماتى قالاسىنىڭ قازاقستان حالقى اسسامبلەياسىنىڭ بازاسىندا تىركەلگەن 33 ەتنومادەني بىرلەستىككە كوپ جاۋاپكەرشىلىك ارتتىرىلماق.

ەندى ەتنومادەني بىرلەستىكتەردىڭ وكىلدەرىنەن قۇرالاتىن جۇمىس توبى قازاقستاننىڭ وڭىرلەرىن ارالاپ، وسى تاقىرىپتا دوڭگەلەك ۇستەلدەر وتكىزبەك نيەتتە. كەيىن بارلىق ۇسىنىس، پىكىرلەر قورىتىندى قۇجاتقا جازىلىپ، قازاقستان پرەزيدەنتىنىڭ اكىمشىلىگىنە تابىستالماق.