تۇلەكتەر اراسىندا ەڭ تانىمال ماماندىقتار بەلگىلى بولدى

استانا. قازاقپارات - ق ر ءبىلىم جانە عىلىم مينيسترلىگى تۇلەكتەر اراسىندا ەڭ تانىمال ماماندىقتاردىڭ ءتىزىمىن جاريالادى.

«تەحنيكالىق ماماندىقتارعا دەگەن سۇرانىس جىل ساناپ ارتۋدا. ماسەلەن، «بيوتەحنولوگيا» ماماندىعىنا بولىنگەن 1 گرانتقا 6 ادامنان، «گەودەزيا»، «كارتوگرافياعا» - 4 ادامنان تالاسۋدا. «راديوتەحنيكا»، «ەلەكترونيكا جانە تەلەكوممۋنيكاتسيا»، «اقپاراتتىق جۇيەلەر»، «باسقارۋدى اۆتوماتتاندىرۋ»، «كولىكتىك قۇرىلىس»، «ەلەكتروەنەرگەتيكا» ماماندىقتارىنا دا كوپ تۇلەك قىزىعۋشىلىق تانىتىپ كەلەدى.

سونىمەن قاتار اۋىل شارۋاشىلىعى سالاسىنداعى ماماندىقتار سۇرانىستان كەمدە-كەم ەمەس. مىسالى، «جەمىس-كوكونىس شارۋاشىلىعى»، «اگرونوميا»، «توپىراق تانۋ»، اگروحيميا»، «ورمان شارۋاشىلىعى»، «اڭ شارۋاشىلىعى»، «بالىق شارۋاشىلىعى»، سىندى ماماندىقتار جاقسى كونكۋرسقا يە»، - دەدى جوعارى جانە ج و و-نان كەيىنگى ءبىلىم بەرۋ، حالىقارالىق قاتىناستار دەپارتامەنتىنىڭ باسشىسى جاسۇلان شايمەردەنوۆ ق ر ءبىلىم جانە عىلىم مينيسترلىگى ءبىلىم گرانتتارىن تاعايىنداۋ جونىندەگى رەسپۋبليكالىق كونكۋرستىق كوميسسيانىڭ وتىرىسىندا.

ونىڭ ايتۋىنشا، مەديتسينالىق ماماندىقتار تۇلەكتەر اراسىندا ءالى كۇنگە دەيىن تانىمالدىلىعىن باسەڭسىتكەن ەمەس. ءبىر گرانتقا شامامەن 2-9 ادامنان كەلەدى. سونداي-اق ەكونوميكالىق جانە زاڭگەر ماماندىقتارى دا ۇلكەن سۇرانىستا.

ال سۇرانىسى تومەن ماماندىقتارعا «مۇراجاي ءىسى»، «ەسكەرتكىشتەردى قورعاۋ»، «شەتەل فيلولوگياسى»، «فرانسۋز ءتىلى»، «مادەنيەت تانۋ»، «اعاش جونۋ تەحنولوگيالارى»، «فيزيكا»، «استرونوميا»، «گەولوگيا»، «پايدالى قازبالاردى بارلاۋ»، «كىتاپحانا ءىسى»، «ۆەتەريناريا» جاتادى. بۇندا ءبىر گرانتقا ءبىر ادامنان كەم كونكۋرس بايقالىپ وتىر.

اۆتور: جاسۇلان جولدىبايەۆ