قىتايلىقتار كەلەسى جىلى ۇلى جىبەك جولىن تۇيەمەن باسىپ وتپەك

الماتى. قازاقپارات - قىتايدىڭ «ۇلى جىبەك جولىمەن مىڭ لي» اتتى حالىقارالىق ەكسپەديتسياسى بۇگىن الماتىعا اياق باستى. بيىلعى ساپار اۆتوكولىكپەن جاسالدى. ال كەلەسى جىلى ساپاردىڭ ەكىنشى كەزەڭىن سول ءداۋىردى تولىعىمەن جاڭعىرتۋ ماقساتىندا قىتايلىقتار تۇيەمەن باعىندىرامىز دەپ وتىر.

قىتايدىڭ سيان قالاسىنان 19-شىلدەدە شىققان دەلەگاتسيا كونە جىبەك جولى مارشرۋتىمەن سەگىز ەلدىڭ اۋماعىن باسىپ ءوتىپ، سونىڭ ىشىندە قىتاي، قازاقستان، وزبەكستان، رەسەي، گرۋزيا، تۇركيا، گرەكيا، يتاليا ارقىلى ريمگە تابان تىرەمەك. شامامەن 56 كۇندە 15000 كيلومەتر جولدى ءجۇرىپ ءوتۋ مەجەلەنگەن.

ەكسپەديتسيا قازاقستان اۋماعىن 3-6- تامىز ارالىعىندا ءجۇرىپ ءوتىپ، وسى ۋاقىت ارالىعىندا قازاقستان تۋرالى رەپورتاجدار سەرياسىن دايىنداماق. سونىمەن قاتار، وندا اتاقتى 50 قازاقستاندىقتىڭ سۇحباتى دا كورسەتىلمەك.

بۇگىن قالادا «ۇلى جىبەك جولىنىڭ دوستاستىق پەن ىنتىماقتاستىق وتكەلى» تاقىرىبىندا دوڭگەلەك ۇستەل ءوتتى.

شارانى قىتاي بۇقارالىق اقپارات قۇرالدارى - شەنسي پروۆينتسياسىنىڭ تەلەراديوكومپانياسى، «شينحۋا» اگەنتتىگى، قىتايدىڭ س س ت ۆ ورتالىق مەملەكەتتىك تەلەارناسى، «گۋانمين» گازەتى، ق ح ر حالىقارالىق راديوسى مەن سپۋتنيكتىك «فەنيكس» ارناسى ۇيىمداستىرىپ وتىر.

قىتايلىقتاردىڭ تانىسۋ ساپارى ءوز كەزەگىندە قازاقستاندىق كاسىپكەرلەر ءۇشىن دە ەرەكشە قىزىعۋشىلىق تۋدىرىپ وتىر.

«پرەزيدەنت نۇرسۇلتان نازاربايەۆ شەتەلدىك ينۆەستورلار كەڭەسى وتىرىسىندا «جاڭا جىبەك جولى» جوباسىن تانىستىرعان بولاتىن. سول كەزدە مەملەكەت باسشىسى قازاقستان ەۋروپا مەن ازيانىڭ اراسىنداعى كوپىرگە اينالۋى كەرەك دەپ ايتقان بولاتىن. قازاقستانعا ساپارى كەزىندە ق ح ر ءتوراعاسى شي جينپين دە جىبەك جولى ەكونولميكالىق ايماعىن قايتا جانداندىرۋ قاجەتتىگىن باسا ايتقان ەدى. وسى باستاما اياسىندا جۇزە اسىپ جاتقان جوبالار قازاقستاننىڭ ەكونوميكاسى مەن تاريحي-مادەني دامۋى ءۇشىن ۇلكەن سەرپىن بەرەدى دەپ ويلايمىن. قازىردىڭ وزىندە قىتايلىقتاردان ءتۇرلى وتە قىزىقتى ۇسىنىستار ءتۇسىپ جاتىر. ولاردىڭ ءبارى ەكىجاقتى وتىرىستاردا پىسىقتالىپ، ماڭىزدى كەلىسىمدەر جاسالۋى مۇمكىن. مەنىڭ ويىمشا، نەگىزگى جۇمىس ساۋدا بويىنشا بولماق. جىبەك جولى بويىنا بازارلار مەن ساۋدا ورىندارى سالىنادى»، - دەدى الماتى وبلىستىق كاسىپكەرلەر پالاتاسىنىڭ ديرەكتورى ءلاززات شىڭعىسبايەۆا.

اۆتور: گۇلميرا ءعوسمانالي