قانداستارىمىز ۇمىت بولعان ۇلتتىق تاعامدار كورمەسىن اشتى
شارانى وتكىزگەندەر تۇركياداعى قانداستارىمىزعا قازاقتىڭ اسا باي اس ءمازىرىن كەڭىرەك تانىستىرىپ، ناسيحاتتى ارتتىرا ءتۇسۋدى دىتتەپ وتىر. اس ءمازىرى - ۇلتتىق مادەنيەتتىڭ ءبىر كورىنىسى. قازاق حالقى داستارقان بايلىعىنا ەرەكشە ءمان بەرگەن. بۇگىن ىستامبۇلدا ۇمىتىلىپ بارا جاتقان ۇلتتىق تاعامداردىڭ كورمەسى اياسىندا سيرەك دايىندالاتىن استىڭ تۇرلەرى كوپشىلىكتىڭ نازارىنا ۇسىنىلدى.
مىسالى، جاڭا سويىلعان مالدىڭ قانىنا ءىش ماي، ازداعان ەت پەن ءدان قوسىپ پىسىرىلگەن قانسوقتا شۇجىعىن ومىرىندە العاش كورگەندەر كوپ. سوندىقتان كورمەگە قاتىسۋشى تۇركياداعى قانداستارىمىز بەن جەرگىلىكتى حالىق تاڭسىق كەلگەن تاعامنان ءدام تاتۋعا اسىقتى.
«بۇل تاعامدار اعزامىزعا وتە پايدالى. كۇش-قۋات بەرەدى، قايرات بەرەدى. ەڭ ماڭىزدىسى - تازا تاعامدار. ءبىز سول نيەتپەن ناسيحات جاساۋدامىز، - دەيدى «وتباسىم» ۇلتتىق قۇندىلىقتار ورتالىعىنىڭ مۇشەسى حانىم احمەتوۆا.
سونداي-اق بۇگىن تۇركيا قازاقتارىنىڭ كىشى قۇرىلتايى اياسىندا ۇلتتىق سيپاتتاعى وسى زامانعى كيىم ۇلگىلەرىنىڭ تانىستىرۋى ءوتتى. ديزاينەر ەسرا ەسداۋلەتتىڭ ايتۋىنشا، جاڭا ءسان ۇلگىسىمەن تىگىلگەن بۇل كيىمدەر توپتاماسى جيىن-كەشتە كيۋگە ارنالعان.
«ءبىز بۇل قۇرىلتايدى ەلدەگى قازاقتارمەن قارىم-قاتىناس ورناتۋ ماقساتىندا جاسادىق. قازاقستاننان كيىم الدىردىق. ءبىزدىڭ سۇلۋ قىزدارىمىز كيىپ كورسەتەدى. كيىمدەر ادەمى، تۇركياداعى كيىمدەرگە ۇقسامايدى»، - دەيدى ەسرا ەسداۋلەت.
تۇركيا قازاقتارىنىڭ كىشى قۇرىلتايى قازاقتىڭ ونەر جۇلدىزدارىنىڭ قاتىسۋىمەن وتكەن گالا- كونتسەرتپەن اياقتالدى. القالى جيىنعا اتسالىسقان ەل ازاماتتارىنا دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ قازاقى داستۇرمەن يىقتارىنا شاپان جاۋىپ، قازاقستان شەتەلدەگى قازاق دياسپورالارىنا جان-جاقتى قولداۋ جاساۋدى جالعاستىرا بەرەتىنىن جەتكىزدى.
