قاز داۋىستى قازىبەك ءبيدىڭ ۇرپاعى - ءمادي ءباپي ۇلى
قاز داۋىستى قازىبەك ءبيدىڭ ۇرپاعى. قۇنانبايدىڭ قۇداسى بولعان، ارقانىڭ اتاقتى بايى الشىنبايدىڭ ءباپي ەسىمدى ەكىنشى ۇلىنىڭ بالاسى.
اتاسى التى الاشقا اتاعى جايىلعان باي بولسا دا، ءباپيدىڭ جۋاستىعىن پايدالانعان اعاسى قاراباي (الشىنبايدىڭ ۇلكەن ۇلى)، بارلىق مال-مۇملىكتى ءوز يەلىگىنە باسىپ الىپ، ءىنىسىن ەسىكتەگى قۇل ەسەبىندە جۇمسايدى.
بالا كۇنىنەن جوقشىلىقتىڭ تاۋقىمەتىن تارتقان ءمادي، اكەسى ءتارىزدى جۋاس، ەز ەمەس اتاسىنا تارتقان ءور كەۋدە، نامىسقوي بولىپ شىعادى. بالا كۇنىنەن باستاپ، اعاسى قارابايمەن جاۋلاسىپ، اكەسىنە تيەسىلى ەنشىنى ءبولىپ بەرۋىن تالاپ ەتكەن.
ءبىراق، اعاسى دەگەنىنە كونبەي، كۇشكە سالادى. وعان ۇرى دەگەن جالا جابىلىپ، اتباسار، قارقارالى، سەمەي، ومبى تۇرمەلەرىندە بولادى. قاماۋدا ەلىن، جەرىن ساعىنىپ، ادىلەتسىز زامانعا نالىعان ءمادي ءوزىنىڭ اتاقتى "قاراكەسەك" ءانىن شىعارادى.
1915 - جىلى ءمادي تۇرمەدەن قاشىپ شىعادى. بۇل كەزدە ونىڭ اندەرى حالىققا تاراپ كەتكەن ەدى. ءمادي جونىندە تالاي اڭىزدار دا ايتىلا باستاعان. اتقامىنەر جاندايشاپتاردان جاسىرىنىپ، ۇزاق ۋاقىت تۋعان جەرگە ات ءىزىن سالا المايدى. «شىركىن-اي» ءانى وسى كەزدە تۋعان.
1916 - جىلى ول ەلىنە ورالادى.
1917 - جىلى بولىس بيلەۋشى ايتقوجا تەمىرجانوۆ، ءماديدى «جىلقى ۇرلادى، تۇرمەدەن قاشتى» دەپ ايىپتاپ، تاعى دا تۇرمەگە جونەلتەدى. قازان توڭكەرىسىن ءمادي قارقارالى اباقتىسىندا وتىرىپ قارسى الادى.
1918 - جىلى بوستاندىققا شىعادى. كومپوزيتوردىڭ حالىق اراسىنا كەڭ تاراعان اتاقتى «ءمادي» ءانى وسى كەڭەستىك كەزەڭمەن بايلانىستىرىلادى. كەڭەس وكىمەتى كەزىندە 1919 - جىلى ءمادي كولچاكقا قارسى شايقاستارعا قاتىسادى. اق گۆاردياشىلاردى قارقارالىدان قۋىپ شىعىسىمەن، جاڭا ءومىردى نىعايتۋعا كىرىسەدى.
ءبىراق قاستاسقان جاۋلارى ونى ەبىن تاۋىپ ءولتىرۋدى ۇيعارادى. 1921 - جىلدىڭ اقپان ايىندا، قاستاسقان دۇشپاندارى ءماديدى اباقتىدان الىپ شىعىپ، قارقارالىنىڭ تار كوشەلەرىنىڭ بىرىندە، سىرتىنان اتىپ ولتىرەدى. باتىرمەن بەتپە-بەت كەلىپ، وق اتۋعا ءداتى شىداماسا كەرەك.
ءمادي ءباپي ۇلى جايىندا تولىق اقپاراتتى ءا. ابىشيەۆتىڭ «نايزاعاي» رومانىنان الۋعا بولادى.
ءمادي ءباپي ۇلىنا ورناتىلعان، قارقارالىداعى تاس ءمۇسىن.
