استانا ارلاندارنىڭ قۇرامى تولىق جاساقتالعان جوق
بەسىنشى ماۋسىمدا «ارلاندار» «B» توبىندا ونەر كورسەتەدى. ولار «Argentina Condors» (ارگەنتينا)، «Venezuela» (ۆەنەسۋەلا)، «USA KnocKouts» (ا ق ش)، «Italia Thunder» (يتاليا)، «Azerbaijan Baku Fires» (ءازىربايجان) جانە «Poland Hussars» (پولشا) پەن جاقىندا انىقتالاتىن ءبىر كلۋبپەن سىنعا تۇسەدى. كوماندا جاتتىقتىرۋشىسى بەيبىت بۇركىت ۇلىنىڭ ايتۋىنشا، بيىل كوماندا قۇرامىنا جاڭادان بوكسشىلار قوسىلۋى مۇمكىن ەكەن.
- بىزگە كەيبىر سالماق دارەجەلەرىندە بوكسشىلار جەتىسپەيدى. سول ءۇشىن الداعى وتەتىن ىشكى جارىستاردا «ارلانداردىڭ» قۇرامىندا بوكستاسۋعا لايىقتى جىگىتتەردى ىرىكتەپ الۋىمىز كەرەك. ەرتەڭ الماتى مەن كوكشەتاۋدا بوكستان قازاقستان كۋبوگى جولىنداعى جارىس باستالادى. سول سىندا وزىمىزگە لايىقتى جىگىتتەردى ىرىكتەپ كورەمىز. 8- تامىزدا قازاقستان كۋبوگى اقتوبە مەن قاراعاندىدا جالعاسىن تابادى. سول جارىستا دا جاس بوكسشىلاردى تاڭداۋعا مۇمكىندىك تۋادى. ەگەر ءوزىن جاقسى جاعىنان كورسەتكەن بوكسشىلار بولسا، وندا بىزبەن بىرگە جاتتىعۋ جيىندارىنا قاتىسادى. كوڭىلىمىزدەن شىعىپ جاتسا، كەلىسىم-شارت ۇسىنۋعا بارمىز، - دەپ مالىمدەدى.
سونىمەن قاتار، «ارلاندار» قۇرامىندا ونەر كورسەتەتىن بوكسشىلار بۇگىن باستالعان قازاقستان بوكس فەدەراتسياسىنىڭ كۋبوگى تۋرنيرىنە دە قاتىسادى. بەرىك ءابدىراحمانوۆ، ءمادي شولاقوۆ (60 كەلى)، ماديار اشكەيەۆ (69 كەلى)، ەرىك ءالجانوۆ، سۇلەيمەن بەردىقايەۆ (75 كەلى) پەن ادىلبەك نيازىمبەتوۆ (81 كەلى) ماڭعىستاۋ ءوڭىرىنىڭ اتىنان رينگكە شىعاتىن بولسا، تەمىرتاس ءجۇسىپوۆ 49 كەلىدە اقمولا وبلىسىنىڭ نامىسىن قورعايدى. ال انۆار مۇزافاروۆ (52 كەلى) پەن اسحات ءۋاليحانوۆ (69 كەلى) الماتى قالاسىنىڭ اتىنان سىنعا تۇسەتىن بولادى.
دايىنداعان: ومىربەك سانسىزباي
massaget.kz
