كورەيالىق عالىمعا قورقىت اتا ۋنيۆەرسيتەتىنىڭ قۇرمەتتى دوكتورى اتاعى بەرىلدى
مارتەبەلى مەيماندار الدىمەن «ەلباسى جانە تاۋەلسىز قازاقستان» اتتى وقۋ-كورمە زالىمەن «ارحەولوگيا جانە ەتنوگرافيا» عىلىمي-زەرتتەۋ ورتالىعىنىڭ كورمە زالىن ارالاپ، قۇندى جادىگەرلەردى تاماشالادى.
كورەيا رەسپۋبليكاسىنان كەلگەن دەلەگاتسيا ودان ءارى ۋنيۆەرسيتەتتىڭ وقىتۋشى- پروفەسسورلارىمەن كەزدەستى. جيىندا ءسوز العان ۋنيۆەرسيتەت رەكتورى، تەحنيكا عىلىمدارىنىڭ دوكتورى، پروفەسسور قىلىشباي بيسەنوۆ: «ءبىزدىڭ كورەيا رەسپۋبليكاسىنىڭ جوعارى وقۋ ورىندارىمەن بايلانىسىمىز تىعىز. بۇل بايلانىستىڭ تاريحى تەرەڭدە جاتىر. قازىرگى تاڭدا تىلدىك باعدارلامالار بويىنشا جانە ارىپتەستىك بايلانىستاردى دامىتۋ اياسىندا ستۋدەنتتەر مەن وقىتۋشىلار كانگنام، كەنگي، چۋن-انگ ۋنيۆەرسيتەتتەرىندە، كانگۆون جانە اندون ۇلتتىق ۋنيۆەرسيتەتتەرىندە بىلىكتىلىكتەرىن كوتەرۋدە» - دەپ، «مۋدانگ يلبو» گازەتىنىڭ باس رەداكتورى كيم گاب دجە مىرزاعا ۋنيۆەرسيتەتتىڭ عىلىمي كەڭەسىنىڭ شەشىمىمەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ فيلوسوفيا دوكتورى قۇرمەتتى اتاعىن بەردى.
ءوز كەزەگىندە كيم گاب دجە مىرزا: «قازاقستاندا ءوزىنىڭ تاريحى جانە داستۇرىمەن ماقتانا الاتىن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ فيلوسوفيا دوكتورى اتاعىن الۋ مەن ءۇشىن ۇلكەن قۇرمەت. ءبىلىم ورداسى 1937- جىلى قيىر شىعىستاعى كورەي پەداگوگيكالىق ينستيتۋتىنىڭ سىر وڭىرىنە كوشىرىلۋى نەگىزىندە ىرگەتاسى قالانىپ، بۇگىنگى كۇنى ىرگەلى جوعارى وقۋ ورىندارىنىڭ بىرىنە اينالىپ وتىر. ەكى ەل اراسىنداعى دوستىق قارىم-قاتىناستى جانە ۋنيۆەرسيتەت باعدارلاماسى بويىنشا كورەي ءتىلىن دامىتۋعا قىزمەت جاسايمىن»، - دەپ سەندىردى.
كورەيا رەسپۋبليكا ەلشىلىگىنىڭ اعارتۋ ورتالىعى مەن حالىقارالىق بىرلەسىپ قىزمەت جاساۋ جونىندەگى كورەي اگەنتتىگىنىڭ وقىتۋشى- ۆولونتەرلەرى 1992- جىلدان باستاپ قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە جۇمىس جاسايدى. 2013-2014 وقۋ جىلىندا ۋنيۆەرسيتەتتە «اعىلشىن ءتىلى - ەكى اعىلشىن ءتىلى»، «اعىلشىن- كورەي»، «اعىلشىن- اراب»، «اعىلشىن- قىتاي» تىلدەرى وقىتىلۋدا. سونىڭ ىشىندە 9 ستۋدەنت اعىلشىن- كورەي تىلدەرىن تاڭداپ، ءبىلىم الۋدا.
جيىن سوڭىندا كورەيا رەسپۋبليكاسىنان كەلگەن دەلەگاتسيا ۇجىمىنا ەستەلىك سىيلىقتار تاپسىرىلدى.
اۆتور: ەلۋباي اۋەزوۆ
