ءتاتتى سۋسىنداردىڭ بالا ميىنىڭ دامۋىنا اسەرى

استانا. قازاقپارات - وڭتۇستىك كاليفورنيا ۋنيۆەرسيتەتىنىڭ قىزمەتكەرلەرى جاس ءوسپىرىم كۇنىنە ءبىر قۇتى گازدالعان سۋسىن ىشسە، ەستە ساقتاۋ قابىلەتى ناشارلايدى دەگەن قورىتىندىعا كەلدى.

سونداي-اق، ءتاتتى سۋسىندار ولاردىڭ ءبىلىم يگەرۋ قابىلەتىنە دە كەرى اسەر ەتەدى ەكەن.

بۇدان باسقا، گازدى سۋسىن ىشكەن جاسوسپىرىمدەر اراسىندا سەمىرۋ جيىلەپ، اگرەسسياسى ارتادى ەكەن. دوكتور سكوتت كانوسكي: «ءتاتتى سۋسىنعا قوسىلعان تازارتىلعان كومىرسۋلار اسقازاننىڭ مەتابوليكالىق بۇزىلۋىنا اكەلەتىنى قۇپيا ەمەس» ەكەنىن اتاپ ءوتتى.

«مي جۇمىسىنىڭ بۇزىلۋىنا كەلسەك، ونىڭ قىزمەتى باسەڭدەپ، قورشاعان ورتا تۋرالى ماڭىزدى اقپاراتتى ەستە ساقتاۋ قابىلەتى ناشارلايدى ەكەن. ەگەر جاس ءوسپىرىم شاقتا گازدى سۋسىندى كوپ ىشسە، مۇنداي جاعدايدان قاشىپ قۇتىلا المايدى ەكەنسىڭ».

ۋنيۆەرسيتەت ءتاتتى سۋسىنعا جۇرگىزگەن تاجىريبە اياسىندا ەرەسەك تىشقاندار مەن جاس ءوسپىرىم تىشقانداردى تەستىلەۋدەن وتكىزدى، دەپ حابارلادى Meddaily. ناتيجەسىندە ەرەسەك تىشقاندار تاجىريبە باستالعاننان كەيىن ءبىر اي وتكەن سوڭ ەستە ساقتاۋ قىزمەتىنە جۇرگىزىلگەن تەستتە قالىپتى ناتيجە كورسەتتى. ال بالعىن تىشقاندار جاڭا اقپاراتتى ناشار قابىلداپ، ونى يگەرۋى باسەڭدەي ءتۇستى. ءارى ولاردىڭ ميىنىڭ ءبىلىم قابىلداۋ مەن ەستە ساقتاۋ قىزمەتىن باقىلايتىن ايماعىنىڭ قابىنعانى بايقالدى.